وفاقی وزیرداخلہ دا اسلام آباد سیف سٹی ہیڈکوارٹرز دا دورہ، آن لائن ویمن پولیس سٹیشن، ون انفو موبائل ایپلی کیشن دا افتتاح کرݙتا

اسلام آباد 20جولائی(اے پی پی) وفاقی وزیر داخلہ محسن نقوی آکھیے جو سیف سٹی پراجیکٹ جرائم روکݨ تےوختی رسپانس اچ اہم کردار ادا کیتے، سرویلنس دے نظام کوں جدید ٹیکنالوجی اتے اے آئی نال لیس کیتا ونڄے، سارے سیف سٹیز کوں آپس اچ جوڑݨ نال ڈیٹا شیئرنگ اچ بہتری آسی۔وزارت داخلہ موجب وفاقی وزیر داخلہ محسن نقوی اسلام آباد سیف سٹی ہیڈ کوارٹرز دے دورہ دے موقع تے آن لائن ویمن پولیس سٹیشن اتے ون انفو (1info) موبائل ایپلی کیشن دا باقاعدہ افتتاح کیتا۔ انہاں آئی جی اسلام آباد پولیس علی ناصر رضوی اتے انہاں دی ٹیم دے نویں اقدامات دی تعریف کیتی تے ڈیجیٹل وال تے شہر دی مانیٹرنگ دے عمل دا مشاہدہ وی کیتا۔ محسن نقوی ایں موقع تے آکھیا جو ایپ توں ایمرجنسی شکایتاں درج کروائیاں ونڄ سڳسن۔ وفاقی وزیر داخلہ محسن نقوی تریمتاں اتے کمزور طبقیں جلدی مدد کیتے آن لائن پلیٹ فارمز کوں مزید فعال بݨاوݨ دی ہدایت کریندے آکھیا جو ایپ اتے آن لائن ویمن پولیس سٹیشن جدید ٹیکنالوجی دے استعمال دے سلسلے اچ اساݙے عزم دے عکاس ہن۔ ایں موقع تے وزیر مملکت داخلہ طلال چوہدری، سیکرٹری داخلہ، چیف کمشنر اسلام آباد اتے آئی جی اسلام آباد پولیس وی موجود ہن۔وزیر داخلہ محسن نقوی سیف سٹی ہیڈکوارٹرزاچ اہم اجلاس دی صدارت اچ آکھیا جو سیف سٹی پراجیکٹ جرائم روکݨ اتے وختی رسپانس اچ اہم کردار ادا کیتے۔ انہاں سیف سٹی دی مانیٹرنگ کوں مزید موثر بݨاوݨ دی ہدایت کریندے آکھیا جو سرویلنس دے نظام کوں جدید ٹیکنالوجی اتے اے آئی نال لیس کیتا ونڄے۔ انہاں آکھیا جو اسلام آباد کوں محفوظ ترین شہر بݨاوݨ کیتے سیف سٹی منصوبے کوں ماڈل دے طور تے اپنایا ویسی۔ وزیر داخلہ سیف سٹی اسلام آباد کوں ݙوجھے صوبیں دے سیف سٹیز نال جوڑݨ تے وی کم کرݨ دی ہدایت کیتی اتے آکھیا جو سارے سیف سٹیز کوں آپت اچ جوڑݨ نال ڈیٹا شیئرنگ اچ بہتری آسی۔وزیر داخلہ سیف سٹی سٹاف دی کارکردگی دی تعریف کیتی ، مزید محنت اتے لڳن نال کم کرݨ دی ہدایت وی کیتی۔ انہاں سیف سٹی اچ تعینات عملے کوں عوامی خدمت کوں پہلی ترجیح ݙیوݨ دی تلقین کیتی اتے سیف سٹی ٹیم دے جذبے اتے کارکردگی دی وی تعریف کیتی ۔ اجلاس دے دوران، آئی جی اسلام آباد علی ناصر رضوی وزیر داخلہ کوں سیف سٹی تے تفصیلی بریفنگ اچ ݙسیا جو وفاقی دارالحکومت دے علاقیں کوں 3100 کیمریں نال مانیٹر کیتا ویندا پئے، سسٹم کوں مزید وسعت ݙیوݨ کیتے 3100 نویں کیمرے نصب کیتے ویسن۔ بریفنگ اچ ݙسیا ڳیا جو سیف سٹی اسلام آباد سردار فہیم قتل سودھے کئی ہائی پروفائل کیسز اچ کلیدی کردار ادا کیتا، سیف سٹی کیمریں دی مدد نال ٻہوں سارے اہم مقدمیں دی تفتیش اچ پیش رفت تھئی، سیف سٹی کیمریں دی مدد نال اسلام آباد اچ جرائم دی شرح اچ نمایاں کمی آئی اے۔ علی ناصر رضوی ݙسیا جو آن لائن ویمن پولیس سٹیشن تریمتاں کیتے بݨایا ڳئے اتے تریمتاں کیتے ہیلپ لائن 1815 مختص کیتی ڳئی اے، 1815 ہیلپ لائن تے کال ٹیکر، کال ریسپانڈر اتے تفتیشی افسران وی تریمتاں پولیس اہلکار ہن