اڄوکے سال ساوݨ دے مینھ پاروں 135 شہری جاں بحق، 79 زخمی جݙاں جو 156 گھر متاثر تھئن، ترجمان پی ڈی ایم اے

لاہور۔20جولائی(اے پی پی) وزیراعلیٰ پنجاب مریم نواز شریف دی ہدایت دے پیش نظر پی ڈی ایم اے دی ساوݨ فیکٹ شیٹ جاری کرݙتی ڳئی اے۔ ترجمان موجب، فیکٹ شیٹ اچ ساوݨ دے مینھ دی صورتحال، پنجاب دے دریاواں، بیراج، ڈیمزاچ پاݨی دی سطح اتے ساوݨ دے مینھ نال تھیوݨ آلے ضیان دے اعداد و شمار شامل ہن۔رپورٹ موجب ، گزریل 24 گھنٹے اچ پنجاب دے کہیں وی شہر اچ مینھ ریکارڈ نئیں تھیا، مینھ دا نواں سپیل اتوار توں شروع تھیسی۔ اڄوکے سال ساوݨ دے مینھ پاروں 135 شہری جاں بحق، 156 گھر متاثر اتے 479 شہری زخمی تھئے۔ زیادہ اموات کچے مکاناں، خستہ عمارتاں و چھتاں دے ڈھݨ پاروں تھئیاں۔ آسمانی بجلی ڈھݨ، کرنٹ لگݨ اتے دریاواں اچ دھاندے ہوئیں ٻُݙݨ نال وی اموات رپورٹ تھئن۔رپورٹ موجب ، منگلا ڈیم اچ 49 فیصد جݙاں جو تربیلا اچ 79 فیصد پاݨی موجود اے۔ انڈین ڈیمز اچ پاݨی دی سطح تقریباً 34 فیصد اے۔ پنجاب دے ٻہوں سارے دریاواں اچ پاݨی دا وہݨ معمول تے ہے۔ دریائے سندھ اچ تربیلا، چشمہ اتے تونسہ دی جاہ تے درمیانے درجے دی چھل اے۔ڈی جی پی ڈی ایم اے عرفان علی کاٹھیا آکھیے جو ممکنہ چھل دے خطرے پاروں پی ڈی ایم اے دے انتظامات مکمل ہن۔ لاہور، سیالکوٹ، فیصل آباد اتے گوجرانوالہ اچ ساوݨ دے مینھ پاروں اربن فلڈنگ دا ݙر اے ۔ شہراں دی انتظامیہ ہنگامی صورتحال تے الرٹ رہوے۔ ڈی جی عرفان علی کاٹھیا آکھیا جو پی ڈی ایم اے کنٹرول روم اتے ڈسٹرکٹ ایمرجنسی آپریشن سنٹرز مسلسل صورتحال کوں مانیٹر کریندے پئن۔ انہاں آکھیا جو مزید ممکنہ مینھ پاروں واسا و انتظامیہ کوں جھکے علاقیں توں پاݨی دی نکاسی کوں یقینی بݨاوݨ دی ہدایت کر ݙتی ڳئی اے۔حکومت پنجاب دی طرفوں دریاواں، نہراں اتے برساتی نالیں اچ دھاوݨ تے مکمل پابندی لاݙتی ڳئی اے ۔ خلاف ورزی دی صورت اچ سخت کارروائی عمل اچ گھن آئی ویسی ۔ ڈی جی پی ڈی ایم اے آکھیا جو شہری خراب موسم اچ غیر ضروری سفر نہ کرن ۔ بجلی دیاں تاراں اتے کھمبیں توں ھک پاسے رہن ۔مخدوش و بوسیدہ مکاناں اچ رہائش نہ رکھن۔ ہنگامی صورتحال اچ پی ڈی ایم اے ہیلپ لائن 1129 تے کال کرن۔ ڈی جی پی ڈی ایم اے عرفان علی کاٹھیا مزید آکھیا جو وزیراعلیٰ پنجاب دی ہدایت دے پیش نظر ݙکھی خانداناں دی مالی معاونت کیتی ویندی پئی اے۔