بہادر افواج اتے قانون نافذ کرݨ آلے اداریاں دے افسران و اہلکار دہشت گردی مکاوݨ کیتے پرعزم ہن، وزیر اعظم دا نیشنل پولیس اکیڈمی اچ زیر تربیت پولیس افسران نال خطاب

اسلام آباد۔22 جولائی(اے پی پی)وزیر اعظم محمد شہباز شریف آکھیے جو بہادر افواج اتے قانون نافذ کرݨ آلے اداریاں دے افسران و اہلکار دہشت گردی مکاوݨ کیتے پرعزم ہن، عوام دے جان ومال دا تحفظ اتے عام لوکاں کوں انصاف ݙیوݨ پولیس دا مقصد اے، میرٹ تے عملدرآمد ہک شاندار معاشرے دے قیام کیتے باوقار معیار اے۔ اے ڳالھ انہاں نیشنل پولیس اکیڈمی اچ زیر تربیت پولیس افسراں نال خطاب کریندے آکھین۔ تقریب اچ وفاقی وزیر داخلہ سید محسن نقوی، وفاقی وزیر اطلاعات و نشریات عطا اللہ تارڑ، وزیر مملکت برائے داخلہ طلال چوہدری اتے اعلیٰ پولیس افسران وی موجود ہن۔ وزیر اعظم آکھیا جو پولیس افسراں تربیت توں بعد میدان عمل اچ ذمے واریاں ادا کریندے ہوئیں عام لوکاں کوں انصاف ݙیوݨا ہوندے، انہاں دی جان ومال دا تحفظ کرݨا ہوندے اتے اے اوں ویلھے ممکن ہے ڄݙاں تہاݙی تربیت دا معیار بہترین ہووے، ایں سانڳے پولیس افسراں کوں ساریاں سہولتاں ݙتیاں ونجن اتے تربیت دے نصاب دا بنیادی مقصد عام لوکاں دی حفاظت اتے انہاں کوں انصاف ݙیوݨا ہووے۔ وزیر اعظم آکھیا جو کہیں وی مہذب معاشرے کیتے ایہہ سارے عوامل انتہائی اہمیت دے حامل ہوندن، اہداف دا حصول تربیت اتے بہترین سہولتاں ٻغیر ممکن کائنی۔ انہاں آکھیا جو اینڄھے ادارے دہشت گردی اتے سماج دشمن عناصر کوں مکاوݨ کیتے سرگرم کردار ادا کریندے پئن، سارے اداریاں رل تے عام آدمی دی جان ومال دے تحفظ اتے دہشت گردی دے خاتمے اچ ودھ کردار ادا کیتے، اکیڈمی اچ تربیت حاصل کرݨ آلے پولیس افسراں کوں اعلیٰ معیار دیاں سہولتاں ملݨیاں چاہیدن، پولیس اکیڈمی اچ معیاری تربیت اتے رہائش دیاں بہترین سہولتاں اچ پورا ہتھ ونݙیسوں۔ وزیر اعظم آکھیا جو میرٹ تے عملدرآمد ہک شاندار معاشرے دے قیام کیتے باوقار معیار اے، اساں نیشنل پولیس اکیڈمی دے ماحول کوں بہتر بݨاوݨے، اکیڈمی اچ اینجھا ماحول قائم تھیسی جیڑھا کہیں وی تربیت گاہ اچ ہووݨا لازم اے، پولیس اکیڈمی اچ ماسٹرز دی ڈگری ݙتی ویسی۔ انہاں آکھیا جو 25 ایکڑ تے مشتمل نیشنل پولیس اکیڈمی ٻݨائی ویندی پئی اے، بیدیاں لاہور اچ ایلیٹ ٹریننگ سکول آلی کار اسلام آباد اچ وی ایں توں وی بہتر ایلیٹ ٹریننگ سکول قائم کیتا ویسی۔ ایںدے علاوہ فائرنگ رینج وی بݨائی ویسی، زیر تربیت افسراں کیتے ہاسٹل وی تعمیر کیتا ویسی، پولیس افسراں کوں ہک مہینے دی تربیت کیتے چین وی بھیجا ویسی۔ وزیر اعظم آکھیا جو زیر تربیت پولیس افسران قوم دے مایہ ناز پتر اتے دھیاں ہن، انہاں دا تعلق پنجاب، سندھ، خیبرپختونخوا، بلوچستان اتے آزاد کشمیر توں اے، وزیر داخلہ گلگت بلتستان دے کوٹے تے عملدرآمد کوں وی یقینی بݨاون۔ وزیر اعظم آکھیا جو شہداء اچ اساݙے پولیس دے افسران اتے جوان وی شامل ہن، ایں توں وݙی اتے کوئی قربانی نئیں تھی سڳدی۔ وزیر اعظم آکھیا جو دہشت گردی دے خاتمے کیتے اساݙی بہادر افواج پاکستان، قانون نافذ کرݨ آلے اداریاں دے اہلکار، رینجرز اتے ایف سی بہادری نال دہشت گرداں دا مقابلہ کریندے پئن، اپݨے بچیاں کوں یتیم کر تے لکھاں بچیاں کوں یتیم تھیوݨ توں بچیندے پئن اساں انہاں کوں سلام پیش کریندے ہیں۔ ایں موقع تے وزیر اعظم زیر تربیت پولیس افسراں اچ لیپ ٹاپ ونݙے اتے زیر تربیت پولیس افسراں کوں سہولتاں ݙیوݨ اتے تربیت دے معیار دی بہتری کیتے فائرنگ رینج اتے ہاسٹل دی تعمیر دے ݙو منصوبیاں دا وی سنگ بنیاد رکھیا۔ ایں توں پہلے وزیر داخلہ محسن نقوی وزیر اعظم کوں منصوبیاں بارے تفصیلی بریفنگ ݙتی۔