چیئرمین سینیٹ سید یوسف رضا گیلانی دی سینئر سیاستدان میاں اظہر دے انتقال تے تعزیت

اسلام آباد۔23 جولائی (اے پی پی) چیئرمین سینیٹ سید یوسف رضا گیلانی سینئر سیاستدان اتے سابق گورنر پنجاب میاں اظہر دے انتقال تے ݙکھ تے افسوس کیتے۔ سینیٹ سیکرٹریٹ توں جاری بیان موجب سید یوسف رضا گیلانی آکھیا جو میاں اظہر دی سیاسی خدمتاں ناقابلِ فراموش ہن، او مدبر سیاستدان، عوامی نمائندے اتے قومی مفادات دے تحفظ دے علمبردار ہن، انہاں ہمیشہ جمہوری روایتاں، پارلیمانی اقدار اتے عوامی فلاح کوں مقدم رکھیا، انہاں دی رحلت ملک کیتے وݙا نقصان اے۔ چیئرمین سینیٹ مرحوم دے ٹٻر نال دلی ہمدردی اتے تعزیت دا اظہار کریندیں ہوئیں دعا کیتی جو اللہ تعالیٰ میاں اظہر کوں آپݨے جوارِ رحمت اچ بلند مقام عطا فرماوے اتے لواحقین کوں اے صدمہ صبر تے حوصلے نال برداشت کرݨ دی توفیق ݙیوے۔