وفاقی وزیر داخلہ دی بنگلہ دیشی ہم منصب نال ملاقات، آپسی دلچسپی دے معاملے اتے ݙو پاسہ تعلقات بارے ڳالھ مہاڑ

ڈھاکہ۔23 جولائی (اے پی پی) وفاقی وزیر داخلہ محسن نقوی بنگلہ دیش دے ہم منصب لیفٹیننٹ جنرل (ر) جہانگیر عالم چوہدری نال ملاقات کیتی اتے آپسی دلچسپی دے معاملے اتے پاک بنگلہ دیش ݙو پاس تعلقات بارے ڳالھ کیتی، وزارت داخلہ آوݨ تے بنگلہ دیشی ہم منصب انہاں دا پرتپاک خیرمقدم کیتا۔ وزارت داخلہ توں جاری بیان موجب وزیر داخلہ محسن نقوی دے آوݨ تے بنگلہ دیشی ہم منصب انہاں دا پرتپاک خیرمقدم کیتا اتے انہاں کوں گارڈ آف آنرز پیش کیتا ڳیا۔ ݙوہیں رہنماواں ملاقات اچ آپسی دلچسپی دے امور اتے پاک بنگلہ دیش ݙو پاسہ تعلقات بارے ڳالھ کیتی۔ ملاقات اچ سفارتی تے سرکاری پاسپورٹس تے ویزا فری انٹری تے وݙی پیش رفت تھئی، ݙوہاں ملکاں سفارتی تے سرکاری پاسپورٹس کوں ویزا فری انٹری دی سہولت ݙیوݨ دا اصولی فیصلہ کیتا۔ وزرائے داخلہ انٹرنل سکیورٹی اتے پولیس ٹریننگ دے شعبیاں اچ تعاون ودھاوݨ تے وی اتفاق کیتا۔ فریقین انسداد منشیات تے انسداد انسانی سمگلنگ کیتے اشتراک کار ودھاوݨ تے گالھ مہاڑ کیتی اتے انسداد دہشت گردی کیتے سانجھے اقدامات بارے وی ڳالھ کیتی۔ پولیس اکیڈمیز اچ ٹریننگ پروگرامز دے آپسی تبادلیاں تے وی گالھ مہاڑ تھئی۔ بنگلہ دیشی وزیر داخلہ آکھیا جو او ڈھاکہ آوݨ تے اپݨے بھرا کوں دلوں خوش آمدید آکھدن۔ انہاں محسن نقوی توں آکھیا جو تہاݙا دورہ پاک بنگلہ دیش ݙو پاسہ تعلقات دے ودھارے کیتے انتہائی اہم اے۔ بنگلہ دیشی وزیر داخلہ پولیس ٹریننگ دی پیشکش تے وزیر داخلہ محسن نقوی دا شکریہ ادا کیتا۔ بنگلہ دیش دے وزیر مملکت برائے داخلہ خدا بخش، سیکرٹری داخلہ نسیم الغنی، ایڈیشنل سیکرٹری سکیورٹی ڈویژن شمیم خان، پاکستانی ہائی کمیشن دے ناظم الامور محمد واصف، پولیٹیکل قونصلر کامران دہینگل اتے اعلیٰ حکام وی ایں موقع تے موجود ہن۔