وزیرمملکت وفاقی تعلیم وجیہہ قمرنال ورلڈ فوڈ پروگرام دی کنٹری ڈائریکٹر کوکو اوشیاما دی ملاقات

اسلام آباد۔23 جولائی (اے پی پی) وزیر مملکت وفاقی تعلیم و پیشہ ورانہ تربیت وجیہہ قمر نال ورلڈ فوڈ پروگرام (ڈبلیو ایف پی) پاکستان دی کنٹری ڈائریکٹر کوکو اوشیاما ملاقات کیتی اتے پورے ملک اچ سکولاں اچ غذائیت، ٻالڑیاں دی ابتدائی ترقی اتے والدین دی تربیت دے حوالے نال تعاون کوں تکڑا بݨاوݨ دے اقدامات تے ڳالھ مہاڑ کیتی ڳئی۔جاری پریس ریلیز موجب وجیہہ قمر ٻالڑیاں دی صحت اتے تعلیمی رسائی کوں بہتر بݨاوݨ اچ ڈبلیو ایف پی دے مسلسل تعاون خاص طور تے غذائی عدم تحفظ دے شکار ضلعیں اچ سکولاں دے کھاݨے دے پروگرام جیھے اقدامات دی تعریف کیتی۔ انہاں ٻالڑیاں دی جامع ترقی تے وزارت دی توجہ کوں اجاگر کیتا جیں اچ والدین کیتے رہنما کتابچے “آغوش” اتے “پرورش” دا اجراء شامل اے، انہاں دا مقصد ݙیکھ بھال کرݨ آلیاں کوں غذائیت، جذباتی نگہداشت اتے سکول کیتے تیاری بارے معلومات ݙیوݨ اے۔ انہاں آکھیا جو اساں سمجھدوں جو بُھکا ٻال سِکھ نئیں سڳدا، اساݙا مقصد ابتدائی سالاں اچ غذائیت اتے والدین دی آگاہی کوں پاکستان دے تعلیمی نظام اچ شامل کرتے سکھݨ کیتے تکڑی بنیاد بݨاوݨ اے۔ایں موقع تے کوکو اوشیاما ٻالڑیاں دی فلاح و بہبود کوں تعلیمی پالیسی دا حصہ بݨاوݨ تے وزارت دی قیادت دی تعریف کیتی۔ انہاں غذائی تحفظ کوں تعلیم، صنفی مساوات اتے کمیونٹی دی مضبوطی نال جوڑݨ آلے سانجھے پروگراماں دے ذریعے پاکستان دیاں قومی ترجیحات دی حمایت اچ ڈبلیو ایف پی دے عزم دی تجدید کیتی۔ فریقین سکولاں دے کھاݨے دے پروگراماں کوں ودھاوݨ، غذائیت دے اقدامات اچ والدین دی آگاہی شامل کرݨ اتے پرے تے پسماندہ کمیونٹیز اچ اہداف تے مبنی اقدامات دے موقعیں بارے ڳالھ مہاڑ کیتی۔ ملاقات اچ پائیدار ترقیاتی اہداف (ایس ڈی جیز) خاص طور تے ایس ڈی جی 2 (صفر بھک) اتے ایس ڈی جی 4 (معیاری تعلیم) کوں حکومتی اتے ڈبلیو ایف پی دے سانجھے تعاون نال اڳوں ودھاوݨ دا عزم ظاہر کیتا ڳئے۔