چیئرمین جوائنٹ چیفس آف سٹاف کمیٹی جنرل ساحر شمشاد مرزا دی ترکیہ اچ انٹرنیشنل ڈیفنس انڈسٹری فیئر اچ شرکت

راولپنڈی۔23 جولائی(اے پی پی)چیئرمین جوائنٹ چیفس آف سٹاف کمیٹی جنرل ساحر شمشاد مرزا استنبول، ترکیہ اچ تھیوݨ آلے 17ویں انٹرنیشنل ڈیفنس انڈسٹری فیئر (IDEF-2025) اچ شرکت کیتی۔ اے عالمی شہرت یافتہ نمائش دفاعی شعبے اچ جدید ترین ٹیکنالوجی اتے پیشرفت کوں اجاگر کرݨ کیتے جاݨی ویندی اے۔ آئی ایس پی آر توں جاری بیان موجب نمائش دے موقع تے جنرل ساحر شمشاد مرزا ترکیہ دے وزیرِ دفاع جنرل (ر) یشار گولر، آذربائیجان دے وزیرِ دفاع کرنل جنرل حسنوف زاکر اسگر اوغلو، آذربائیجان دے نائب وزیرِ دفاع قربانوف آگل سلیم اوغلو اتے ترک چیف آف جنرل سٹاف جنرل متین گوراک نال انڄھ انڄھ ملین۔ انہاں ملاقاتاں اچ ݙو طرفہ عسکری تعاون دے مختلف امور تے گالھ مہاڑ کیتی ڳئی جیںدے اچ دفاع اتے سکیورٹی دے شعبیاں اچ تعاون ودھاوݨ تے زور ݙتا ڳیا۔ انہاں مستقبل دے جغرافیائی و تزویراتی ماحول اتے ٹیکنالوجیکل ترقیات سانڳے باہمی تعاون ٻیا تکڑا کرݨ دا عزم دوہرائے۔ ترکیہ اتے آذربائیجان دی قیادت دہشت گردی دے خلاف جنگ اچ پاک افواج دی پیشہ وارانہ مہارت، عملی کامیابیاں اتے قربانیاں کوں سراہا اتے علاقائی و عالمی امن و استحکام کیتے پاکستان دے کردار دی تعریف کیتی۔