اسلام آباد۔24 جولائی (اے پی پی) وزیر اعظم محمد شہباز شریف عالمی بینک ولوں سندھ طاس معاہدے تے بھارت دے ہک پاسہ اتے غیر قانونی اقدامات دے خلاف پاکستان دے جائز موقف دی اصولی حمایت کوں سراہندے ہوئیں بین الاقوامی قانون دی پاسداری اتے علاقائی امن کوں برقرار رکھݨ کیتے پاکستان دے عزم دا اظہار کیتا اتے سارے مسئلیاں کوں گالھ مہاڑ نال حل کرݨ دی لوڑھ تے زور ݙتا۔ …
وزیر اعظم شہباز شریف نال عالمی بینک دے ریجنل نائب صدر عثمان ڈیون دی ملاقات، بینک ولوں سندھ طاس معاہدے تے پاکستان دے موقف دی اصولی حمایت کوں سراہا
مزید خبراں
اسلام آباد۔24 جولائی (اے پی پی) وزیر اعظم محمد شہباز شریف عالمی بینک ولوں سندھ طاس معاہدے تے بھارت دے ہک پاسہ اتے غیر قانونی اقدامات دے خلاف پاکستان دے جائز موقف دی اصولی حمایت کوں سراہندے ہوئیں بین الاقوامی قانون دی پاسداری اتے علاقائی امن کوں برقرار رکھݨ کیتے پاکستان دے عزم دا اظہار کیتا اتے سارے مسئلیاں کوں گالھ مہاڑ نال حل کرݨ دی لوڑھ تے زور ݙتا۔ خمیس کوں وزیر اعظم آفس دے میڈیا ونگ توں جاری بیان موجب وزیر اعظم محمد شہباز شریف نال عالمی بینک دے مشرق وسطیٰ، شمالی افریقہ، افغانستان اتے پاکستان (میناپ) دے ریجنل نائب صدر عثمان ڈیون ملاقات کیتی۔ وزیر اعظم پاکستان دے نال لمبے ویلھے دی شراکت داری تے عالمی بینک خاص طور تے عالمی بینک دے صدر اجے بنگا اتے پاکستان کیتے عالمی بینک دے سابق کنٹری ڈائریکٹر ناجی بن حسائن دا پاکستان کیتے نویں کنٹری پارٹنرشپ فریم ورک (سی پی ایف) کوں اڳوں ودھاوݨ اچ اہم کردار ادا کرݨ تے دلوں شکریہ ادا کیتا۔ وزیر اعظم پاکستان دی ترقی دی ترجیحات خاص طور تے توانائی، انسانی وسائل، ماحولیاتی تبدیلی اتے گورننس دے شعبیاں اچ اصلاحات کیتے سی پی ایف دے سٹریٹجک کردار دی تعریف کیتی۔ وزیر اعظم سندھ طاس معاہدے جہے اہم بین الاقوامی معاہدے کوں نقصان پڄاوݨ دے بھارت دے ہک پاسہ اتے غیر قانونی اقدامات دی روشنی اچ پاکستان دے جائز موقف کیتے عالمی بینک دی اصولی حمایت کوں سراہا۔ انہاں بین الاقوامی قانون دی پاسداری، خوشحالی دے حصول اتے علاقائی امن کوں برقرار رکھݨ کیتے پاکستان دے عزم دا اعادہ کیتا ۔ انہاں سارے مسئلیاں کوں گالھ مہاڑ نال حل کرݨ کیتے پاکستان دے عزم دا وی اظہار کیتا۔ وزیر اعظم 2022 دے تباہ کن سیلاب اچ عالمی بینک دی ویلھے تے اتے فراخدلانہ مدد تے شکریہ ادا کیتا جئیں پاکستان کوں فوری امدادی سرگرمیاں اتے تعمیر نو اتے بحالی دے اقدامات شروع کرݨ اچ مدد کیتی۔ عثمان ڈیون پاکستان دے دورے اچ پرتپاک مہمان نوازی تے وزیر اعظم شہباز شریف دا شکریہ ادا کیتا۔ انہاں پاکستان دی پراݨی شراکت داری اتے معیشت دے اہم شعبیاں اچ تعاون کوں ٻیا ودھاوݨ کیتے عالمی بینک دے عزم دا اعادہ کیتا۔ ڈیون پاکستان دی جاری میکرو اکنامک بحالی کوں سراہندے ہوئیں ملک کوں مالیاتی استحکام اتے پائیدار ترقی آلے پاسے گھن ونجݨ تے وزیر اعظم شہباز شریف دی حکومت دی تعریف کیتی۔ انہاں اڄوکی انتظامیہ دے اصلاحاتی ایجنڈے کوں وی خاص طور تے سراہا ۔ انہاں وزیر اعظم شہباز شریف دی مضبوط قیادت کوں ادارہ جاتی اصلاحات اڳوں ودھاوݨ، سرمایہ کاراں دا اعتماد بحال کرݨ اتے جامع اقتصادی ترقی کوں ودھاوݨ کیتے اہم قرار ݙتا۔ ملاقات اچ حکومت پاکستان اتے عالمی بینک ولوں لمبے ویلھے دے ترقیاتی اہداف دے حصول اتے پاکستان دے عوام دے خوشحال مستقبل دی تعمیر کیتے آندے سالاں اچ تعاون کوں ٻیا مضبوط بݨاوݨ کیتے سانجھے عزم دا اظہار کیتا ڳیا۔
