نیشنل انسٹیٹیوٹ آف ٹیکنالوجی اتے ایریزونا سٹیٹ یونیورسٹی وچال اشتراک پاکستان دی اعلیٰ تعلیم اچ ہک سنگ میل ثابت تھیسی، ڈاکٹر خالد مقبول صدیقی

اسلام آباد۔24 جولائی (اے پی پی) وفاقی وزیر تعلیم و پیشہ ورانہ تربیت ڈاکٹر خالد مقبول صدیقی دی صدارت اچ نیشنل انسٹیٹیوٹ آف ٹیکنالوجی (این آئی ٹی) لاہور اتے ایریزونا سٹیٹ یونیورسٹی (اے ایس یو) امریکہ دے نمائندیں دے نال ہک اعلیٰ سطحی اجلاس تھیا۔ اجلاس اچ پاکستان دی طرفوں عالمی تعلیمی معیار کوں اپناوݨ اتے ڈیجیٹل و علم تے مبنی معیشت دے قیام دے عزم کوں اجاگر کیتا ڳئے۔ اجلاس نال خطاب کریندے ڈاکٹر خالد مقبول صدیقی آکھیا جو این آئی ٹی اتے اے ایس یو وچال اشتراک پاکستان دی تعلیمی تبدیلی دے پاسے ہک نمایاں قدم اے جیں دے تحت پاکستانی طلباء کوں عالمی سطح تے تسلیم شدہ اعلیٰ تعلیم، دوہری ڈگریاں، بین الاقوامی نصاب اتے جدید تحقیقاتی موقعیں تئیں رسائی حاصل ہوسی۔ انہاں آکھیا جو پاکستان اچ 15 کروڑ توں ودھ نوجوان موجود ہن، اساں کوں ایں توانائی کوں ہک مؤثر قومی سرمایہ اچ تبدیل کرݨا اے، اے شراکت داری اساݙے نوجواناں کوں مستقبل دیاں مہارتاں نال لیس کرݨ دے عزم دی عکاس اے۔ انہاں اے ایس یو دے نال اشتراک دی تعریف کیتی جیڑھا گزریل ݙاہ سال توں مسلسل امریکہ دی ساریں توں جدید یونیورسٹی قرار ݙتی ویندی پئی اے۔ انہاں آکھیا جو اے اشتراک پاکستان کوں عالمی جدت اتے مقامی اہمیت دے سنگم تے گھن آندے۔انہاں آکھیا جو این آئی ٹی پاکستان اچ آئی ٹی، مصنوعی ذہانت، فن ٹیک اتے ای-کامرس جیھے شعبیں کیتے ہک قومی ٹیلنٹ پائپ لائن دے طور تے کم کریسی جو ڈیجیٹل پاکستان وژن نال ہم آہنگ اے۔ ڈاکٹر خالد مقبول صدیقی حکومت دی طرفوں ایجھے مستقبل بین تعلیمی ماڈلز دی مکمل حمایت دا اعادہ کیتا اتے قومی قیادت اتے بین الاقوامی علمی اداریں وچال ہم آہنگی دی تعریف کیتی۔ انہاں آکھیا جو اے اشتراک اصلاحات تے مبنی وژن دا عملی نمونہ اے جیڑھا ایں ڳالھ کوں ظاہر کریندے جو جݙاں قومی صلاحیت کوں عالمی مہارت دے نال جوڑیا ونڄے تاں وݙیاں تبدیلیاں ممکن ہوندن۔ انہاں آکھیا جو پاکستان اچ تعلیم دا مستقبل ایجھیاں یونیورسٹیاں دے قیام اچ اے جیڑھی عالمی سطح تے مسابقت رکھیندیاں ہوون اتے مقامی ضرورتاں کوں پورا کریندیاں ہوون، اے ایس یو دے نال اشتراک اے ظاہر کریندے جو ہک جدید اتے جامع تعلیمی نظام کیویں قوماں کوں بدل سڳدے۔ انہاں مزید ݙسیا جو ایویں طرز دے اشتراک دے امکانات ورچوئل یونیورسٹی اتے علامہ اقبال اوپن یونیورسٹی دے نال وی زیر غور ہن تاں جو فاصلاتی اتے ڈیجیٹل تعلیم دے میدان اچ اے ایس یو دی علمی برتری کوں مزید وسعت ݙتی ونڄ سڳے۔