ݙومہینے اچ ملک دی پہلی مسابقتی انرجی مارکیٹ پالیسی نافذ العمل تھی ویسی، وفاقی وزیر توانائی سردار اویس احمد خان لغاری

اسلام آباد۔24 جولائی(اے پی پی) وفاقی وزیر توانائی سردار اویس احمد خان لغاری آکھیے جو ملک دی تاریخ اچ پہلی واری “مسابقتی انرجی مارکیٹ پالیسی” آندے ݙو مہینے اچ اپݨے حتمی نفاذ دے مرحلے اچ داخل تھی ویسی جیں دے بعد حکومت دی طرفوں بجلی دی خریداری دا سلسلہ ختم تھی ویسی۔ اے ڳالھ وزیر توانائی عالمی بینک دے ہک اعلیٰ سطحی وفد نال ملاقات اچ آکھی جیں دی قیادت عالمی بینک دے ریجنل نائب صدر مشرق وسطیٰ، شمالی افریقہ، افغانستان اتے پاکستان، عثمان ڈیون کریندے پئے ہن۔وفاقی وزیر توانائی ݙسیا جو “سی ٹی بی سی ایم” دے تحت مارکیٹ اچ بجلی دی آزادانہ تجارت ممکن تھی سڳسی، ایں ماڈل دے تحت “ویلنگ چارجز” اتے ٻئے میکانزم متعارف کروائے ویندے پئن اتے حکومت دا کردار صرف ریگولیٹری فریم ورک تئیں محدود کر ݙتا ویسی۔ انہاں واضح کیتا جو اے منتقلی بتدریج اتے ہک جامع حکمت عملی دے تحت کیتی ویسی تاں جو نظام اچ استحکام قائم رہوے۔ملاقات دے دوران سردار اویس لغاری عالمی بینک دے وفد کوں حکومت دی توانائی اصلاحات، نیٹ میٹرنگ پالیسی، نجکاری، ریگولیٹری بہتری اتے سرمایہ کاری دے موقعیں متعلق تفصیلی ݙسیا۔ انہاں آکھیا جو پاکستان دی پالیسی دا جھکاؤ واضح طور تے نجی شعبے دے ودھارے اتے شفافیت دے پاسے ہے اتے اساں چاہندوں جو بین الاقوامی سرمایہ کار ایں اچ شراکت دار بݨن۔عثمان ڈیون پاکستان اچ توانائی دے شعبے اچ تھیوݨ آلی اصلاحات دی تعریف کریندے ایں امر تے زور ݙتا جو توانائی ترقی دی بنیاد اے اتے کہیں وی ملک دی ترقی کیتے توانائی دا شعبہ ٻہوں اہمیت رکھیندے ایں پاروں عالمی بینک ایں شعبے اچ پاکستان دی حمایت جاری رکھیسی۔ انہاں آکھیا جو عالمی بینک حکومت پاکستان دے رلے کھڑی اے تاں جو پائیدار، قابل اعتماد اتے سرمایہ کاری کیتے موزوں توانائی نظام کوں ودھارا ݙتا ونڄ سڳے ۔وفاقی وزیر عالمی بینک دے وفد کوں شعبے اچ جاری ریفارمز تے مبنی ہک جامع کتابچہ وی پیش کیتا اتے ایں امید دا اظہار کیتا جو موجودہ شراکت داری مستقبل اچ مزید تکڑی تھیسی۔