محسن نقوی دا بنگلہ دیش اچ اڄوکے فضائی حادثے اچ 31 قیمتی انسانی جاناں دے ضیان تے ݙکھ تے افسوس

ڈھاکہ۔24 جولائی (اے پی پی) ایشین کرکٹ کونسل (اے سی سی) دے صدر محسن نقوی آکھیے جو او بنگلہ دیش اچ اڄوکے فضائی حادثے اچ 31  قیمتی انسانی جاناں دے ضیان تے ڳہرے ݙکھ اتے افسوس کریندن۔ اے ڳالھ انہاں ڈھاکہ اچ اے سی سی ممبران دے اعزاز اچ منعقدہ ہک خاص تقریب نال خطاب کریندے آکھی۔ انہاں آکھیا جو او المناک فضائی حادثے اچ جاں بحق لوکاں دے لواحقین، بنگلہ دیش دی حکومت اتے عوام نال دلی ہمدردی اتے تعزیت کریندن ۔ اساݙیاں دعاواں اتے ہمدردیاں متاثرہ خانداناں دے نال ہن۔محسن نقوی بنگلہ دیش کرکٹ بورڈ کوں اڄوکی سیریز اچ کامیابی تے مبارخ وی ݙتی ۔ انہاں ایں ڳالھ تے خوشی دا اظہار کیتا جو ایشین کرکٹ کونسل دا سالانہ جنرل اجلاس پہلی واری بنگلہ دیش اچ منعقد تھیندا پئے اتے ٻہوں سارے ممبران ایں ویلھے ڈھاکہ اچ موجود ہن۔ محسن نقوی بنگلہ دیش کرکٹ بورڈ دے چیئرمین امین السلام دا بہترین انتظامات اتے مہمان نوازی تے شکریہ ادا کیتا اتے سالانہ اجلاس اچ شرکت کرݨ آلے سارے ممبرز دا وی دلوں شکریہ ادا کیتا۔انہاں آکھیا جو اساں کوں ہک ٹیم وانڳوں کم کرݨا اے۔ سارے سیاسی اختلافات کوں ہک پاسے رکھ تے صرف اتے صرف کرکٹ دے ودھارے کیتے ہکو جیہا تھیوݨا اے۔ انہاں دا آکھݨ ہئی جو اساں کوں ہک ݙوجھے کوں تکڑا بݨاوݨا اے اتے پوری امید اے جو اساں سارے رل تے اے ہدف حاصل کرسڳدوں۔ اساݙی خواہش اے جو سارے ایسوسی ایٹ ممبران دیاں ٹیماں تکڑیاں ہوون۔ انہاں یقین ݙیوائے جو بطور صدر ایشین کرکٹ کونسل او ہر ممکن اقدام کریسن تاں جو اے ادارہ ایشیا اچ کرکٹ دا ساریں توں طاقتور ادارہ بݨ سڳے ۔ محسن نقوی ایں عزم دا اعادہ کیتا جو کرکٹ کوں انہاں ایشیائی ملکاں تئیں کھنڈاوݨی اے جتھاں اے کھیڈ ہݨے ودھ نی سڳیا اتے اے کم اساں کوں بطور ہک ٹیم، رل تے کرݨا ہوسی۔