وزیراعلیٰ پنجاب دی صدارت اچ اجلاس،جی سی، یو ای ٹی اتے گورنمنٹ کالج یونیورسٹی برائے خواتین کوں ماڈل تعلیمی ادارے بݨاوݨ دا فیصلہ

لاہور۔24 جولائی (اے پی پی) وزیراعلیٰ پنجاب مریم نواز شریف دی صدارت اچ خاص اجلاس تھیا جیں اچ ہائر ایجوکیشن ڈیپارٹمنٹ متعلق تفصیلی بریفنگ ݙتی ڳئی۔ ایں موقع تے جی سی یونیورسٹی، گورنمنٹ کالج برائے خواتین یونیورسٹی اتے یونیورسٹی آف انجینئرنگ اینڈ ٹیکنالوجی کوں ماڈل تعلیمی ادارے بݨاوݨ دا فیصلہ کیتا ڳیا۔ اجلاس اچ ݙسیا ڳیا جو برطانیہ، کوریا اتے قازقستان سودھے کئی غیر ملکی یونیورسٹیاں پنجاب اچ کیمپس بݨاوݨ اچ دلچسپی دا اظہار کیتے۔ یونیورسٹی آف لندن، یونیورسٹی آف BRUNEL، یونیورسٹی آف GLOUCESTERSHIRE، یونیورسٹی آف LEICESTER اتے بئیاں یونیورسٹیاں پنجاب اچ برانچ کیمپس کھولݨ دی پیش کش کیتی اے۔اجلاس اچ پنجاب دے سرکاری کالجز اچ وی کالج مینجمنٹ کونسل قائم کرݨ تے اتفاق کیتا ڳیا۔ پنجاب دیاں یونیورسٹیاں اچ معیار تعلیم اُچی کرݨ کیتے کے پی آئی سسٹم نافذ کرݨ دا فیصلہ کیتا ڳیا۔ وائس چانسلر دی کارکردگی کوں کے پی آئی دے معیار تے پرکھیا ویسی۔ وزیراعلیٰ مریم نواز شریف انڈر پرفارمنگ کالجز متعلق رپورٹ وی منڳ ڳھدی اے ۔ وزیراعلیٰ مریم نواز شریف ایجوکیشن ویجیلینس سکواڈ قائم کرݨ دی وی منظوری ݙے ݙتی۔ ایجوکیشن ویجیلینس سکواڈ تعلیمی اداریں اچ اچاچیت ونڄ تے حاضری، صفائی، معیار تعلیم اتے ٻئے امور چیک کریسی۔ منسٹر ایجوکیشن دی زیر نگرانی ایجوکیشن ویجیلینس سکواڈ دی رپورٹ تے فوری کارروائی عمل اچ گھن آئی ویسی۔ایں موقع تے معیار تعلیم دے لحاظ نال پنجاب دیاں یونیورسٹیاں دی گرین، بلیو، ییلو اتے گرے رینکنگ مقرر کرݨ دی تجویز دا جائزہ ڳھدا ڳیا۔ اجلاس اچ سی ایم پنجاب ہونہار سکالر شپ اتے لیپ ٹاپ سکیم بارے تفصیلی بریفنگ ݙتی ڳئی۔ بریفنگ اچ ݙسیا ڳیا جو پنجاب دے علاوہ ݙوجھے صوبیں دے 19 ہزار توں ودھ طلباء وزیراعلیٰ پنجاب سکیم اچ اپلائی کرچکن۔ اجلاس اچ ہائر ایجوکیشن دا سٹریٹجک پلان / روڈ میپ 2025-29 دا وی جائزہ ڳھدا ڳیا۔ پنجاب دیاں یونیورسٹیاں اچ معیار تعلیم اتے ادارہ جاتی بہتری ترجیح قرار ݙتی ڳئی۔ پبلک سیکٹر یونیورسٹیاں اچ گورننس ریفارمز اتے ادارہ جاتی خودمختاری گھن آوݨ دی تجویز دا وی جائزہ گھدا ڳیا۔ پنجاب دیاں یونیورسٹیاں اچ تدریسی معیار، اختراعی تحقیق اتے تخلیقی علم تے زور ݙتا ویسی۔ پنجاب دیاں یونیورسٹیاں اچ انسانی وسائل دی ترقی تے توجہ ݙیوݨ ترجیحات اچ شامل کرݨ تے اتفاق کیتا ڳیا۔ یونیورسٹیاں اچ ڈیجیٹل ٹرانسفارمیشن اتے گلوبل رابطے وی ترجیحات اچ شامل کرݨ تے غور کیتا ڳیا۔ اجلاس اچ پنجاب اچ پہلی واری ہائر ایجوکیشن کانفرنس دے انعقاد دی اصولی منظوری ݙتی ڳئی۔ وزیر اعلیٰ مریم نواز شریف پنجاب اچ غیر فعال کامرس کالجز متعلق وی تفصیلی رپورٹ منگ ڳھدی اے۔