وزیراعظم دا میڈیکل کالجز اتے انجینئرنگ یونیورسٹیاں اچ خیبرپختونخوا دے ضم شدہ ضلعیاں دا کوٹہ بحال کرݨ دا اعلان

اسلام آباد۔24جولائی (اے پی پی)وزیراعظم محمد شہباز شریف میڈیکل کالجز اتے انجینئرنگ یونیورسٹیاں اچ خیبرپختونخوا دے ضم شدہ ضلعیاں دا کوٹہ بحال کرݨ دا اعلان کریندے آکھیے جو قبائل ہمیشہ پاکستان دی سلامتی اتے امن کیتے وݙیاں قربانیاں ݙتین، ضم شدہ ضلعیاں اچ امن و امان حکومت ترجیح اے۔ وزیراعظم محمد شہباز شریف نال قبائلی عمائدین دے جرگے ملاقات کیتی۔ وزیر اعظم جمعیت علمائے اسلام (ف) دے صدر مولانا فضل الرحمان دی سربراہی اچ وزیراعظم ہاؤس آوݨ آلے خیبرپختونخوا دے ضم شدہ ضلعیاں دے قبائلی عمائدین دے وفد کوں خوش آمدید آکھیا۔ جرگے اچ خیبرپختونخوا دے ضم شدہ ضلعیاں اچ امن عامہ دی صورتحال بہتر بݨاوݨ اتے انہاں علاقیاں دی تعمیر و ترقی دے حوالے نال تفصیلی گالھ مہاڑ کیتی ڳئی۔ وزیراعظم میڈیکل کالجز اتے انجینئرنگ یونیورسٹیاں اچ خیبرپختونخوا دے ضم شدہ ضلعیاں دا کوٹہ بحال کرݨ دا اعلان کیتا۔ قبائلی عمائدین کوٹہ بحال کرݨ دے فیصلے دا خیر مقدم کیتا۔ وزیراعظم آکھیا جو میکوں ٻہوں خوشی اے جو قبائلی عمائدین دا تعلق پاکستان دے انہاں علاقیاں نال اے جیہرے ہک شاندار تاریخ اتے روایتاں دے امین ہین، قبائل ہمیشہ پاکستان دی سلامتی اتے امن کیتے ودھ قربانیاں ݙتین، پاکستان دیاں سکیورٹی فورسز، پولیس اتے قانون نافذ کرݨ آلے ݙوجھے اداریاں دے جوان دہشت گرداں دے خلاف بہادری نال لڑدے ہوئیں شہید تھیندے پئن، پاکستان کوں امن دا گہوارہ بݨاوݨ کیتے سارے مکاتب فکر دے اکابرین کوں رل تے اپݨاں کردار ادا کرݨا ہوسی۔ وزیراعظم آکھیا جو ضم شدہ ضلعیاں دی معاشی ترقی اتے اتھاں دے عوام دی فلاح و بہبود کیتے وفاقی حکومت ہر ممکن اقدامات کریندی پئی اے، ضم شدہ قبائلی ضلعیاں دے عوام خاص کر نینگراں کوں ودھ سوکھ ڈتا ویسی۔