پاکستان صحت دے شعبے اچ عالمی سانجھے داری کیتے پرعزم اے، وفاقی وزیر صحت سید مصطفیٰ کمال دا بیجنگ اچ “گلوبل ہیلتھ کانفرنس” توں خطاب

اسلام آباد۔25جولائی (اے پی پی) وفاقی وزیر صحت سید مصطفیٰ کمال آکھیا جو پاکستان صحت دے شعبے اچ عالمی سانجھے داری کیتے پرعزم اے۔ صحت دے شعبے کوں درپیش چیلنجز نال نبڑݨ کیتے حکومت موثر اقدامات کریندی پئی اے۔ پرائمری ہیلتھ کیئر سسٹم کوں مضبوط بݨاوݨ کیتے ٹیلی میڈیسن دا نظام متعارف کرایا ویندا پئے۔ اے ڳالھیں انہاں خمیس کوں چین دے دارالحکومت بیجنگ اچ تھیوݨ آلی “گلوبل ہیلتھ کانفرنس” توں خطاب کریندیں ہوئیں کیتی۔وزیر صحت آکھیا جو پاکستان صحت دے شعبے اچ عالمی شراکت داری کیتے پرعزم اے۔ پوری دنیا اچ 25 لکھ نرسز دی ڳھٹکی اے، دنیا بھر اچ نرسز اتے پیرامیڈیکس دی ڳھٹکی کوں پورا کرݨ اچ پاکستان مؤثر کردار ادا کر سڳدے۔ انہاں آکھیا جو وزیراعظم پاکستان 3 ݙینھ پہلے ڈرگ ریگولیٹری اتھارٹی (ڈریپ) دے ڈیجیٹل نظام دا افتتاح کیتے، میڈیکل ڈیوائسز دی رجسٹریشن اتے لائسنسنگ دے عمل کوں ڈیجیٹل کر ݙتے۔ ایں اقدام نال سالاں دا عمل 20 ݙینھ اچ مکمل تھیسی۔ مصطفیٰ کمال آکھیا جو صحت دے شعبے کوں درپیش چیلنجز نال نبڑݨ کیتے حکومت موثر اقدامات کوں یقینی بݨیندی پئی اے۔ وزیراعظم پاکستان آبادی اچ ودھارے تے قابو پاوݨ کیتے اعلیٰ سطح دی کمیٹی ٻݨا ݙتی اے جو آندے پنج سال تئیں کم کریسی تاں جو ایں مسئلے نال نبڑیا ونڄ سڳے۔  دور دراز دے علاقیاں اچ جدید ٹیکنالوجی نال صحت دی سہولتاں دی فراہمی کوں یقینی بݨیسوں۔ چین جیڑھے ملک صحت دے شعبے وچ پاکستان دے اہم شراکت دار بݨ سڳدن۔