ادارہ جاتی اصلاحات حکومت دی پہلی ترجیحات اچ شامل ہن، وزیراعظم شہباز شریف

اسلام آباد۔25جولائی (اے پی پی) وزیراعظم محمد شہباز شریف آکھیا جو ادارہ جاتی اصلاحات اساݙی حکومت دیں پہلی ترجیحات اچ شامل ہن۔ اساں معیشت دی ڈیجیٹائزیشن، سرکاری اداریاں دی رائیٹ سائزنگ اتے حکومتی اداریاں اچ میرٹ تے ماہرین دی تعیناتی دے ایجنڈے تے عمل کریندے پئیوں۔ اے ڳالھیں انہاں خمیس کوں آپݨی صدارت وفاقی وزارتاں اتے محکماں اچ تکنیکی ماہرین دی تعیناتی اتے بیرونی سرمایہ کاری تے حکمت عملی ٻݨاوݨ اتے پبلک پرائیویٹ پارٹنرشپ اتھارٹی تے پیش رفت بارے جائزہ اجلاس توں خطاب کریندیں ہوئیں کیتی۔ اجلاس اچ وفاقی وزیر منصوبہ بندی احسن اقبال، وفاقی وزیر اقتصادی امور احد خان چیمہ، وفاقی وزیر قانون تے انصاف اعظم نذیر تارڑ، وزیراعظم دے مشیر برائے صنعت تے پیداوار ہارون اختر اتے متعلقہ اعلیٰ سرکاری افسراں شرکت کیتی۔وزیراعظم آفس دے میڈیا ونگ توں جاری بیان موجب وزیراعظم محمد شہباز شریف اجلاس اچ ڳالھ مہاڑ کریندیں ہوئیں آکھیا جو وفاقی حکومت دی ادارہ جاتی اصلاحات اساݙی پہلی ترجیحات اچ شامل ہن۔ اساں معیشت دی ڈیجیٹلائزیشن، سرکاری اداریاں دی رائیٹ سائزنگ اتے حکومتی اداریاں اچ میرٹ تے ماہرین دی تعیناتی دے ایجنڈے تے عمل کریندے پئیوں۔ ماہرین دی تعیناتی بارے میرٹ اتے شفافیت تے کوئی سمجھوتہ قابل قبول نہ ہوسی۔ اجلاس اچ وزیراعظم کوں تکنیکی ماہرین دی تعیناتی بارے پبلک پرائیویٹ پارٹنرشپ اتھارٹی تے بریفنگ ݙتی ڳئی جئیں اچ ݙسیا ڳیا جو ہݨ تئیں تکنیکی ماہرین دی 15 آسامیاں تے تعیناتیاں تھی ڳئن، ٻئی 47 تکنیکی آسامیاں تے ماہرین دی تعیناتی کیتی ویندی پئی اے۔ 7 اہم وزارتاں اتے محکماں اچ چیف ایگزیکٹو افسران، چیف فنانس افسران اتے مینجنگ ڈائریکٹرز دی تعیناتی کیتے 30 امیدواراں کوں شارٹ لسٹ کیتا ڳئے۔ پٹرولیم ڈویژن اتے نیشنل ووکیشنل اینڈ ٹیکنیکل ٹریننگ کمیشن اچ تعیناتیاں بارے امیدواراں دے انٹرویوز دے ابتدائی دور مکمل تھی ڳئن۔ وزیراعظم کوں ݙسیا ڳیا جو وفاقی وزارتاں سرمایہ کاری دے حوالے نال حکمت عملی ٻݨاوݨ بارے فوکل ٹیماں نامزد کر ݙیتی ڳئن۔ سرمایہ کاری دے حوالے نال انفارمیشن ٹیکنالوجی تے ٹیلی کام، ریلوے اتے سیاحت دے شعبہ جاتی لائحہ عمل تیار کر گھدے ڳئن۔ سرمایہ کاری دے حوالے نال غذائی تحفظ، بحری امور، معدنیات، سیاحت، صنعت، ہاؤسنگ اتے توانائی دے شعبہ جاتی فریم ورک تے کم چھیکڑی مراحل اچ اے۔ سعودی عرب، متحدہ عرب امارات، آذربائیجان، قطر اتے کویت دے نال سرمایہ کاری دے حوالے نال منصوبے مخصوص کرݨ بارے 18 معاشی سیکٹرز دی پچ بکس تیار کر ڳھدیاں ڳئن۔