وفاقی وزیر رانا تنویر حسین نال اقوام متحدہ دے ادارہ خوراک و زراعت دے وفد دی ملاقات

اسلام آباد۔25جولائی (اے پی پی) وفاقی وزیر قومی غذائی تحفظ و تحقیق رانا تنویر حسین اقوام متحدہ دے ادارہ خوراک و زراعت (ایف اے او) دے اعلیٰ سطحی وفد دے نال ملاقات اچ پاکستان دے زرعی و لائیو سٹاک شعبے وچ جاری اشتراک عمل دا جائزہ ڳھدا اتے مستقبل وچ تعاون دے مزید موقع ڳولݨ تے ڳالھ مہاڑ کیتی ۔ ایف اے او دے وفد دی قیادت اسسٹنٹ ڈائریکٹر جنرل اتے ڈائریکٹر اینیمل پروڈکشن اینڈ ہیلتھ ڈویژن تھاناوت تیئنسن (Thanawat Tiensin) کیتی۔ ایں موقع تے پاکستان اچ ایف اے او دی نمائندہ فلورنس رول وی موجود ہن جیڑھی پاکستان اچ اپݨی چار سالہ تعیناتی مکمل کریندیاں پئن۔ملاقات اچ پاکستان اتے ایف اے او دے پراݨے تعلقات تے ڳالھ مہاڑ تھئی جنہاں دا آغاز 1947ء اچ تھیا ہئی اتے اڄ اے شراکت داری ملک دے 94 ضلعیں اچ جاری مختلف منصوبیں تے محیط اے۔ وفاقی وزیر ایف اے او دیاں خدمتاں، خاص طور تے زرعی شعبے کوں عالمی بہترین طریقیں، تکنیکی معاونت اتے پالیسی سازی اچ تعاون ݙیوݨ تے تعریف کیتی ۔ انہاں ایف اے او دے نویں عالمی ورک پلان دا خیرمقدم کیتا جیڑھے 194 رکن ملکاں دی مشاورت نال تیار کیتا ڳئے اتے ایں تے عملدرآمد اچ پاکستان دی بھرپور شمولیت دی خواہش دا اظہار کیتا۔ وفاقی وزیر زرعی و لائیو سٹاک شعبے دی بحالی، فوڈ سکیورٹی دے تحفظ اتے ویلیو ایڈڈ برآمدات کوں ودھارا ݙیوݨ کیتے حکومت دے عزم دا اظہار کیتا۔ انہاں غیر ملکی سرمایہ کاری کوں متحرک کرݨ اچ ایف اے او دے تعاون دی تعریف کیتی۔ تھاناوت تیئنسن پاکستان دے لائیو سٹاک سیکٹر دی بے پناہ صلاحیت کوں اجاگر کیتا اتے بیماریاں تے قابو، فوڈ سیفٹی اتے برآمدی معیار وچ بہتری کیتے حکومتی اقدامات دی تعریف کیتی ۔ وفاقی وزیر وفد کوں ݙسیا جو ہݨے ہی پاکستان نیشنل ایگری ٹریڈ اینڈ فوڈ سیفٹی اتھارٹی (این اے ایف ایس اے) قائم کیتی اے۔ انہاں آکھیا جو پاکستان ایں اتھارٹی کوں مصر دے کامیاب ادارہ جاتی ماڈل دی طرز تے استوار کرݨ چاہندے۔ مصر دی این اے ایف ایس اے کوں خوراک دے تحفظ کیتے ہک مؤثر ماڈل تسلیم کیتا ڳئے جیں توں پاکستان سکھݨ دا خواہشمند اے۔ ایں سلسلے اچ پاکستان دا ہک تکنیکی وفد مصر دا دورہ کریسی تاں جو اتھاں اپنائی ڳئی بہترین پالیسیاں اتے ادارہ جاتی ڈھانچیں دا مطالعہ کیتا ونڄ سڳے۔ وفاقی وزیر ایں ڳالھ تے زور ݙتا جو پاکستان وچ گزریل کئی سالاں توں ایف اے او وچ وزیر زراعت دی نمائندگی موجود کائنی ، جیں کوں وختی بحال کیتا ونڄݨا چا ہیدے۔تھاناوت تیئنسن پاکستان کیتے برازیل دے زرعی ترقیاتی ماڈل کوں قابل مطالعہ قرار ݙتا جیں تحقیق اتے جدت دے ذریعے خوراک دی قلت توں نکل تے دنیا دا وݙا خوراک برآمد کرݨ آلا ملک بݨݨ تئیں دا سفر طے کیتا۔ وفاقی وزیر پاکستان ایگریکلچرل ریسرچ کونسل (پی اے آر سی) دی بحالی دے عزم دا اعادہ کیتا اتے ایں کوں وزیراعظم دے وژن موجب سائنس تے مبنی زرعی ترقی نال ہم آہنگ کرݨ دی ڳالھ کیتی۔ انہاں چین اتے یورپ دے ممتاز تحقیقاتی اداریں توں اشتراک ودھاوݨ اچ دلچسپی دا اظہار وی کیتا۔ وفاقی وزیر ایف اے او وچ پاکستان دے مستقل مندوب محبوب دے کردار دی تعریف کیتی جنہاں ݙو طرفہ سفارتی رابطیں دے ودھارے اچ نمایاں کردار ادا کیتا۔ ایں موقع تے اے وی ݙسایا ڳیا جو کورونا وباء دے دوران ایف اے او پاکستان دی مدد کیتے ویہہ ملین امریکی ڈالر ݙتے جنہاں نال جانوراں دی صحت دے نظام اتے بیماریاں توں نبݨݨ دی صلاحیت کوں بہتر بݨایا ڳیا۔ ملاقات دے اختتام تے وفاقی وزیر رانا تنویر حسین ایف اے او دے نال پاکستان دی شراکت داری کوں مزید مستحکم بݨاوݨ دے عزم دا اعادہ کیتا۔ انہاں آکھیا جو پائیدار زراعت، لائیو سٹاک دی ترقی، اتے خوراک دا تحفظ حکومت پاکستان دیاں اولین ترجیحات وچ شامل ہن اتے ایں سلسلے وچ سانجھے تعاون کوں مزید ودھارا ݙتا ویسی۔