نائب وزیراعظم اسحاق ڈار دی امریکی ہم منصب نال ملاقات، ݙو طرفہ تعلقات، مختلف شعبیاں اچ تعاون ٻیا تکرا کرݨ دا عزم

واشنگٹن ۔25جولائی(اے پی پی)پاکستان دے نائب وزیراعظم و وزیر خارجہ سینیٹر محمد اسحاق ڈار امریکی ہم منصب مارکو روبیو نال واشنگٹن ڈی سی اچ ملین۔  انہاں ݙو طرفہ تعلقات دے ودھارے اتے مختلف شعبیاں اچ تعاون ودھاوݨ سانڳے رل تے کم کرݨ دا عزم دوہرائے۔ ترجمان دفتر خارجہ موجب امریکی محکمہ خارجہ (سٹیٹ ڈیپارٹمنٹ) پُڄݨ تے امریکی حکام نائب وزیراعظم و وزیر خارجہ سینیٹر محمد اسحاق ڈار دا استقبال کیتا۔ امریکا اچ پاکستان دے سفیر رضوان سعید شیخ وی نائب وزیراعظم دے نال ہن۔ وفود دی سطح تے تھیوݨ آلی ملاقات اچ فریقین ولوں سینئر حکام شریک تھئے۔ پاکستان اتے امریکا دے وزراء خارجہ وچال اے پہلی بالمشافہ ملاقات اے، ایں توں پہلے ݙوہائیں رہنماواں ہک ٻئے نال فون تے رابطے کیتے ہن۔ ملاقات اچ پاک-امریکا تعلقات اتے مختلف شعبیاں اچ ممکنہ تعاون تے تفصیلی ڳالھ تھئی۔ ݙوہائیں رہنماواں ݙو طرفہ تجارتی و اقتصادی روابط دے فروغ، سرمایہ کاری، زراعت، ٹیکنالوجی، معدنیات سودھا اہم شعبہ جات اچ تعاون تے الایا۔ ملاقات اچ انسداد دہشت گردی اتے علاقائی امن دے حوالے نال وی ڳالھ مہاڑ تھئی۔ نائب وزیراعظم و وزیر خارجہ محمد اسحاق ڈار عالمی امن دے ودھارے سانڳے امریکی صدر ڈونلڈ ٹرمپ اتے امریکی قیادت دیاں کوششاں کوں خراج تحسین پیش کیتا۔ نائب وزیراعظم و وزیر خارجہ محمد اسحاق ڈار آکھیا جو حالیہ پاک-بھارت کشیدگی دے حوالے نال صدر ٹرمپ دا کردار اتے کوششاں قابل تحسین ہن۔ امریکی وزیر خارجہ مارکو روبیو دہشت گردی دے خلاف جنگ اچ پاکستان دیاں لازوال قربانیاں دا اعتراف کیتا۔ امریکی وزیر خارجہ آکھیا جو عالمی و علاقائی امن دے حوالے نال پاکستان ہمیشہ مثبت کردار ادا کیتے۔ نائب وزیراعظم و وزیر خارجہ محمد اسحاق ڈار آکھیا جو پاک-امریکا ݙو طرفہ تعلقات کوں ٻیا ودھاوݨ اتے استحکام ݙیوݨ چاہندے ہیں، ݙوہائیں ملکاں وچال جاری ٹریڈ ڈائیلاگ اچ مثبت پیش رفت کیتے پر امید ہیں۔ نائب وزیراعظم و وزیر خارجہ محمد اسحاق ڈار آکھیا جو پاکستان امریکی کاروباری برادری اتے سرمایہ کاراں کیتے پرکشش منزل ہے، علاقائی امن دے حوالے نال ݙوہائیں ملکاں دے نقطہ نظر اتے مفادات اچ ہم آہنگی اے۔ ݙوہائیں رہنماواں ݙو طرفہ تعلقات دے فروغ اتے مختلف شعبہ جات اچ مضبوط اتے منظم روابط ودھاوݨ سانڳے رل تے کم کرݨ دے عزم دا اعادہ کیتا۔