گلوبل ہیلتھ فورم وچ وزیر صحت مصطفیٰ کمال دا بیماریاں توں بچݨ اتے جدید صحت نظام تے زور

اسلام آباد۔26جولائی (اے پی پی) وفاقی وزیر صحت مصطفیٰ کمال بیجنگ اچ گلوبل ہیلتھ فورم وچ پاکستان دی نمائندگی کریندے صحت عامہ دی بہتری کیتے بھرپور نقطہ نظر پیش کیتا۔ قومی وزارت صحت دی طرفوں جاری اعلامیہ موجب ، وزیر صحت مصطفیٰ کمال اپݨے خطاب اتے بین الاقوامی رہنماواں نال ملاقاتاں دے دوران ایں ڳالھ تے زور ݙتا جو عالمی صحت دی حکمرانی دا محور صرف بیماریاں دے علاج تئیں محدود نہ رہوے بلکہ بیماریاں توں پیشگی بچݨ اتے صحت مند طرزِ زندگی دے ودھارے تے مرکوز ہووݨا چا ہیدے۔انہاں آکھیا جو عالمی وباواں، موسمی بیماریاں اتے صحت دے ابھردے ہوئیں چیلنجز نال نبݨݨ کیتے شفاف پالیسی سازی، سادہ و قابلِ فہم حکمت عملی اتے عوامی اعتماد کوں بنیادی ستون بݨایا ونڄے۔ انہاں خاص طور تے ریگولیٹری اداریاں وچ عوامی مکالمے، کھلے سوال و جواب اتے معلومات تئیں آزادانہ رسائی کوں ودھارا ݙیوݨ دی لوڑھ تے روشنی پاتی تاں جو ہک قابلِ اعتماد، جواب دہ اتے جدید صحت دا نظام تشکیل ݙتا ونڄ سڳے۔ اپݨے بین الاقوامی ہم منصباں نال ملاقاتاں دے دوران انہاں ڈیجیٹل ہیلتھ، ٹیلی میڈیسن اتے مصنوعی ذہانت جیھی جدید ٹیکنالوجی دے مؤثر استعمال تے زور ݙتا تاں جو ݙیہاتی اتے پرے دے علاقیں تئیں معیاری اتے قابلِ رسائی صحت دیاں سہولتاں ݙتیاں ونڄ سڳن۔وزیر صحت مصطفیٰ کمال دنیا دے ملکاں تے زور ݙتا جو اپݨے تجربے اتے ڈیٹا کوں سانجھے اعتماد، شفافیت اتے تکھے شیئر کرن تاں جو کہیں وی وبا یا صحت دے بحران دے خلاف وختی اتے مؤثر ردِعمل ممکن ہووے۔ پاکستان دے واضح موقف، مؤثر شرکت اتے فعال کردار کوں عالمی رہنماواں اتے بین الاقوامی اداریں  تعریف کیتی تے ایں کوں عالمی صحت نظام وچ ہک مثبت پیش رفت قرار ݙتا۔ وفاقی وزیر صحت مصطفیٰ کمال دے کوآرڈینیٹر ڈاکٹر عبید اتے بیجنگ وچ پاکستانی سفارت خانے دے نمائندگان وی فورم اچ شریک ہن۔ وفاقی وزیر سید مصطفیٰ کمال فورم دے مختلف سیشنز وچ شرکت کیتی۔