پاکستان صہیونی ظلم و جبر دا شکار نہتے فلسطینی بھیݨ بھراویں دی سفارتی اتے اخلاقی مدد جاری رکھیسی، وزیراعظم محمد شہباز شریف

اسلام آباد۔26جولائی (اے پی پی) وزیراعظم محمد شہباز شریف آکھیے جو پاکستان صہیونی ظلم و جبر دا شکار نہتے فلسطینی بھیݨ بھراواں دی سفارتی اتے اخلاقی مدد جاری رکھیسی۔ پاکستان اقوامِ عالم اتے دنیا دے ہر فورم تے اپݨے فلسطینی بھیݨ بھراواں دی آواز بݨ تے انہاں تے تھیوݨ آلے انسانیت سوز مظالماں دے خلاف آواز چیندا رہسی۔ وزیراعظم دفتر دے میڈیا ونگ توں جاری بیان دے موجب ، وزیرِ اعظم محمد شہباز شریف اتے امیر جماعت اسلامی حافظ نعیم الرحمن دے درمیان ٹیلی فونک رابطہ تھئے۔ ݙوہائیں رہنماواں غزہ وچ نہتے فلسطینیاں تے جاری اسرائیلی بربریت تے تشویش دا اظہار کیتا۔ وزیرِ اعظم اسرائیل دی طرفوں غزہ وچ فلسطینیاں دی امداد دی ترسیل دی بندش اتے ایندے نتیجے وچ پیدا تھیوݨ آلی غذائی قلت اتے غزہ وچ ݙینھ بہ ݙینھ ودھدے انسانیت سوز صہیونی ظلم دی بھرپور مذمت کریندے ہوئیں آکھیا جو پاکستان غزہ وچ اسرائیل دی طرفوں امداد دی بندش کوں ختم کرݨ اتے بھک توں سسکدے ٻالاں اتے تریمتاں سودھے فلسطینی بھیݨ بھراواں تئیں کھاوݨ پیوݨ دیاں چیزاں دی ترسیل بحال کرݨ دے حوالے نال ہر سطح تے سفارتی کوششاں جاری رکھیسی۔وزیرِ اعظم آکھیا جو پاکستان صہیونی ظلم و جبر دا شکار نہتے فلسطینی بھیݨ بھراواں دی سفارتی اتے اخلاقی مدد جاری رکھیسی، پاکستان اقوامِ عالم اتے دنیا دے ہر فورم تے اپݨے فلسطینی بھیݨ بھراواں دی آواز بݨ تے انہاں تے تھیوݨ آلے انسانیت سوز ظلم دے خلاف آواز چیندا رہسی۔ وزیرِ اعظم آکھیا جو جِتھاں حکومت پاکستان غزہ وچ ظلم دا شکار فلسطینی بھیݨ بھراواں کوں سفارتی ذریعے توں امدادی سامان پُڄیندی رہسی ، اوتھاں الخدمت فاؤنڈیشن ملک گیر مہم چلا تے غزہ وچ امدادی سامان دی ترسیل یقینی بݨائی۔ وزیرِ اعظم امیر جماعت اسلامی اتے الخدمت فاؤنڈیشن دی طرفوں غزہ متاثرین کیتے امدادی سامان بھیجݨ دے ایں احسن اقدام اتے کوششاں دی تعریف کیتی ۔ امیر جماعت اسلامی آکھیا جو فلسطینی رہنماواں میکوں رابطہ کیتا اتے اپیل کیتی اے جو وزیراعظم پاکستان غزہ وچ جنگ بندی اتے غذائی امداد دی فراہمی کیتے قائدانہ کردار ادا کرن۔ فلسطینی عوام اتے پورا عالم اسلام پاکستان اتے ایندی قیادت توں وݙیاں امیداں رکھیندن۔ وزیر اعظم اسلامی ملکاں سودھے بین الاقوامی برادری نال خصوصی رابطہ کرن اتے لیڈنگ رول ادا کرن