حکومتی کوششاں نال قومی معیشت اچ بہتری آئی اے، ٻاہرلے ملک رہݨ آضے پاکستانی ملک دا قیمتی سرمایہ ہن ، نائب وزیراعظم محمد اسحاق ڈار دا نیویارک اچ پاکستانی کمیونٹی توں خطاب

نیویارک ۔27جولائی (اے پی پی) نائب وزیراعظم / وزیر خارجہ سینیٹر محمد اسحاق ڈار آکھیے جو حکومتی کوششاں دے نتیجے اچ قومی معیشت اچ بہتری آئی اے، ٻاہرلے ملک رہݨ آلے پاکستانی ملک دا سرمایہ ہن، اساں افغانستان دے خیر خواہ ہیسے انہاں دی ترقی اتے خوشحالی چاہندوں، افغانستان توں آکھیے جو اپݨی سرزمین پاکستان دے خلاف استعمال نہ تھیوݨ ݙیوے، ملک توں دہشت گردی دے ناسور دے مکمل خاتمے کیتے پرعزم ہیسے، علاقائی رابطے کوں ودھارا ݙتا ویندا پئے ، سفارتی سطح تے ایں ویلھے پاکستان ٻہوں متحرک اے، اساݙا ہدف ملک دی جی 20 اچ شمولیت اے، ملک اچ معاشی استحکام آ چکئے، زر مبادلہ دے ذخیرے مسلسل ودھدے پئن، مہانگ دی شرح اچ نمایاں کمی تھئی اے، ڈیفالٹ دے خطرے کوں ہمیشہ کیتے دفن کر ݙتا ڳئے۔ اے ڳالھ نائب وزیراعظم / وزیر خارجہ محمد اسحاق ڈار نیویارک اچ پاکستانی کمیونٹی توں خطاب اچ آکھی۔انہاں امریکا وچ پاکستان دے سفیر رضوان شیخ اتے اقوام متحدہ وچ مستقل مندوب عاصم افتخار، قونصل جنرل سودھے پاکستانی برادری دا خیر مقدم کریندے آکھیا جو چند مہینے دے وقفے دے بعد پاکستانی برادری نال ول ملاقات باعث افتخار اے۔ انہاں آکھیے جو اساݙی گزریل ملاقات فروری وچ تھئی ہئی، اوں ویلھے میں پاکستان مسلم لیگ (ن) دی حکومت دی مستقبل دی حکمت عملی دا خاکہ پیش کیتا ہئی اتے شاید اوں ویلھے تساں زیادہ پر اعتماد نہ ہوو لیکن جے تساں اوں ویلھے دے حالات اتے اڄ دے حالات دا موازنہ کرو تاں تساں کتھائیں زیادہ اعتماد محسوس کریسو۔ سینیٹر محمد اسحاق ڈار آکھیے جو وزیراعظم محمد شہباز شریف دی قیادت وچ اساݙی حکومت کوں ایں ویلھے معاشی اتے سیاسی چیلنجز دا سامݨا ہئی، پاک بھارت جھیڑا بعد وچ سامݨے آئے۔ انہاں آکھیا جو پاکستان اچ معیشت دے حوالے نال ٻہوں بہتری آئی اے لیکن ہک ڳالھ یاد رکھݨی چا ہیدی اے جو 2017 وچ سابق وزیراعظم محمد نواز شریف دی قیادت وچ پاکستان معاشی طور تے کتھائیں بہتر پوزیشن وچ ہئی، انہاں 2013 وچ جݙاں حکومت سنبھالی تاں میکرو اکنامک اوکھ دے علاوہ کجھ ہفتے دے زرمبادلہ دے ذخیرے اتے شرح نمو دی کمی، ݙوڑے ہندسے دا افراط زر اتے ملک دے ڈیفالٹ دا خطرہ ہئی لیکن مسلم لیگ (ن) دی حکومت 4 سال دے عرصے وچ نمایاں معاشی اتے اقتصادی کامیابیاں ڳھدیاں۔نائب وزیراعظم /وزیر خارجہ آکھیے جو ایں ویلھے عالمی اقتصادی ماہرین دا تجزیہ ہئی جو پاکستان کوں ایں اوکھی صورتحال توں نکلݨ وچ 12 توں 15 سال درکار ہوسن لیکن اساں ایں توں گھٹ عرصے وچ اوکھ تے قابو پاتے۔ انہاں آکھیے جو پاکستان وچ ٻہوں زیادہ لچک اے اتے پاکستان 2017 تئیں ملک دی 70 سالہ تاریخ وچ پہلی واری آئی ایم ایف اصلاحات دا پروگرام مکمل کیتا۔ انہاں آکھیا جو افراط زر دی شرح ݙوڑے ہندسے توں 3.59 فیصد دی شرح تئیں گھٹ تھئی، زرمبادلہ دے ذخیرے تاریخ دی بلند ترین سطح تئیں ودھ ڳئن اتے جی ڈی پی دی شرح نمو 6.3 فیصد تئیں پُڄ چکی ہئی اتے اساں 7 توں 8 فیصد تئیں دا تخمینہ لا چُکیوں ۔ انہاں آکھیا جو ہݨ اساں وزیراعظم محمد شہباز شریف دی قیادت وچ کئی معاشی ریکارڈ بھنیسوں جیں کیتے ݙینھ رات محنت کیتی ویندی پئی اے۔ محمد اسحاق ڈار آکھیے جو پاکستان 12 توں 15 سال دے عرصے دیاں پیشگوئیاں دے مقابلے وچ 3 سال دے گھٹ عرصے وچ نمایاں معاشی کامیابیاں حاصل کیتیاں۔ انہاں آکھیا جو پاکستان 2017 وچ دنیا دی 24 ویں وݙی معیشت بݨ چکیا ہئی اتے کئی عالمی ادارے آکھیندے پئے ہن جو پاکستان 2030 توں پہلے جی 20 وچ شامل تھیوݨ دی استعداد رکھیندے۔ انہاں آکھیا جو 2017 توں 2022 دے عرصے دے دوران پاکستان دی معیشت کوں ریورس گیئر لڳ ڳیا، سیاسی تبدیلیاں دے خوفناک نتیجے سامݨے آئے اتے دنیا دی 24 ویں وݙی معیشت 47 ویں درجے تئیں تنزلی کر ڳئی۔وزیر خارجہ آکھیا جو پاکستان مسلم لیگ (ن) کیتے اے ہک اوکھا فیصلہ ہئی جو اساں اوں ویلھے دی حکومت دے خلاف عدم اعتماد کروں یا نہ کروں کیونجو ملک دی معیشت ٻہوں اوکھے حالات توں گزردی پئی ہئی۔ انہاں آکھیا جو ملک دی سیاسی قیادت سمجھدی ہئی جو جے صورتحال برقرار رہی تاں خدانخواستہ پاکستان وی سری لنکا وانڳوں ڈیفالٹ کر سڳدے جݙاں جو کجھ عالمی طاقتاں وی چاہندیاں ہن جو پاکستان ڈیفالٹ کرے لیکن الحمدللہ اساں ڈیفالٹ دے خطرے توں ٻاہر آڳیوں۔ سینیٹر محمد اسحاق ڈار آکھیے جو سابق وزیراعظم محمد نواز شریف اوں ویلھے ہک اوکھا فیصلہ کیتا اتے بطور پارٹی سربراہ عدم اعتماد دا فیصلہ کیتا اتے پاکستان کوں ڈیفالٹ دے خطرے توں کݙھیا۔ انہاں آکھیا جو عدم اعتماد دی کامیابی دے بعد محمد شہباز شریف کوں وزیراعظم نامزد کیتا ڳیا اتے 16 مہینے دی حکومت وچ اساں کوں ہر ݙینھ عالمی طاقتاں اتے معاشی اداریں دی طرفوں کوئی نویں تاریخ ݙے ݙتی ویندی ہئی جو فلاں تاریخ کوں پاکستان ڈیفالٹ کرویسی، جیں دے بعد چھیکڑی ہک سال کیتے اوکھے حالات وچ میکوں وزیر خزانہ تعینات کیتا ڳیا اتے اللہ دا شکر اے جو اساں ݙینھ رات محنت کر تے ملک کوں اوکھی صورتحال توں کڈھیا۔ سینیٹر محمد اسحاق ڈار مزید آکھیا جو ایں دے بعد انتخابات تھئے اتے وزیراعظم محمد شہباز شریف اپݨے اتحادیاں دے نال رل تے ول حکومت بݨائی تاں پاکستان تے منڈلاوݨ آلے ڈیفالٹ دا ݙر مک ڳئے۔قومی معیشت دی موجودہ صورتحال تے ڳالھ کریندے انہاں آکھیا جو افراط زر دی شرح جو 30 فیصد تئیں ودھ چکی ہئی ہݨ ٻہوں نچلے درجے تئیں گھٹ تھی چکی اے، زرمبادلہ دے ذخیرے وچ مسلسل  ودھارا تھیندا پئے اساں چاہندوں جو اساں اپݨاں ہی ریکارڈ بھن تے زرمبادلہ دے ذخیرے کوں اتلی سطح تے پڄاؤں ، افراط زر دی 3.59 فیصد دی شرح اتے زرمبادلہ دے ذخیرےدے ریکارڈ انشا اللہ ترٹسن۔ سینیٹر محمد اسحاق ڈار آکھیا جو قومی معیشت مستحکم تھی چکی اے، میکرو اکنامک اشاریے بہتر تھی چُکن، پاکستان دنیا دی 47 ویں معیشت دی بجائے 40 ویں معیشت بݨ چکئے لیکن اساں چاہندں جو اپݨی حکومت دے اختتام تئیں پاکستان کوں جی 20 وچ شامل کر ݙیوں یا ایں وچ شمولیت دے نیڑے پڄ ونڄوں۔ وزیراعظم محمد شہباز شریف اتے انہاں دی حکومت بے پناہ محنت کیتی اے اتے مسلم لیگ (ن) دے قائد محمد نواز شریف مسلسل رہنمائی کریندے پئن تاں جو معاشی اہداف حاصل تھی سڳن، اساں چاہندوں جو عالمی برادری وچ ہک خوشحال اتے مستحکم پاکستان ہووے تاں جو اساݙیاں آوݨ آلی نسلاں ایں توں فیدہ چا سڳننائب وزیراعظم / وزیر خارجہ آکھیا جو پاکستان دے سفارتی کلھیپے دیاں ڳالھیں کیتیاں ویندیاں ہن لیکن ہݨ صورتحال یکسر تبدیل تھی چکی اے، پاکستان کوں عالمی برادری وچ اہم سفارتی حیثیت حاصل تھئی اے۔ انہاں آکھیا جو گزریل 2 سال دے دوران اساں افغانستان دے حوالے نال ٻہوں محنت کیتی اے اتے اساں چاہندوں جو پاکستان اتے ازبکستان دے افغانستان دے ذریعے ریل رابطے قائم تھیون جیں دے بعد پاکستان پوری دنیا دے ریلوے نیٹ ورک نال جُڑ ویسی۔ انہاں آکھیا جو پاکستان دہشت گردی مکاوݨ اتے علاقائی استحکام کوں یقینی بݨاوݨ کیتے باری سرمایہ کاری کیتی اتے ایں دے مثبت نتیجے نکلئےتاں جو 2017 دے بعد دی حکومت دہشت گرداں کوں ملک وچ داخل تھیوݨ دی کھلی اجازت ݙتی اتے ایں دے نتیجے تہاݙے سامݨے ہن۔ انہاں آکھیا جو کورونا بحران دے نال نال دہشت گردی دے بحران قومی معیشت کوں 47 ویں درجے تئیں پُڄائے۔ سینیٹر محمد اسحاق ڈار آکھیے جو افغانستان اساݙا بھرا اسلامی ملک اے اتے اساں چاہندوں جو انہاں دے نال معیشت، سیاست سودھے مہاجرین دے مسئلیں کوں ختم کیتا ونڄے۔ انہاں آکھیا جو اساں چاہندوں جو افغانستان دی سرزمین پاکستان دے خلاف دہشت گردی دیاں کارروائیاں کیتے استعمال نہ تھی سڳے۔نائب وزیراعظم / وزیر خارجہ امریکا دے اڄوکے دورے دے حوالے نال ڳالھ مہاڑ کریندے آکھیا جو پاکستان 2012 وچ سلامتی کونسل دا غیر مستقل رکن منتخب تھیا ہئی اتے اوں ویلھے اساں ہک ووٹ دی برتری نال جتیے ہاسے لیکن ہݨ پاکستان نمایاں سفارتی کامیابیاں حاصل کر چکئے اتے اساں ایں سال کیتے جݙاں انتخابات وچ حصہ ڳھدا تاں اساں 5 دے مقابلے وچ 182 ووٹ نال فتح یاب تھئے۔ انہاں آکھیا جو ایں مہینے پاکستان اقوام متحدہ دی سلامتی کونسل دی صدارت دا منصب سنبھالئے اتے میں یو این ایس سی دے اجلاس دی صدارت کیتے خصوصی طور تے اتھاں پُڄاں۔ انہاں مزید آکھیا جو اساں چاہندوں دنیا اچ جھیڑیں دا پرامن حل ممکن ہووے تے اساں ایں حوالے نال سلامتی کونسل وچ وی ڳالھ کیتی اے۔ نائب وزیراعظم / وزیر خارجہ ایں موقع تے اڄوکی پاک بھارت کشیدگی اتے ایران اسرائیل جھیڑے تے وی ڳالھ کیتی ۔تقریب وچ امریکا اچ رہݨ آلے پاکستانی برادری دے نمایاں لوکاں بھرپور شرکت کیتی۔