نو مئی فیصلہ حوصلہ افزا، اڄ ملک اچ قانون و انصاف دے نظام دی جیت تھئی اے، ولا کوئی اینڄھی سازش نا کر سڳسی، عطاءاللہ تارڑ

اسلام آباد۔31جولائی (اے پی پی)وفاقی وزیر اطلاعات و نشریات عطاءاللہ تارڑ 9 مئی دے مقدمیاں دے فیصلے دا خیرمقدم کریندے آکھیے جو نو مئی فیصلہ حوصلہ افزا اے، اڄ ملک اچ قانون و انصاف دے نظام دی جیت تھئی اے، ولا کوئی اینڄھی سازش نا کر سڳسی۔ انسداد دہشت گردی عدالت دے فیصلے تے الیندے وفاقی وزیر اطلاعات آکھیا جو اڄ ملک اچ قانون دی حکمرانی اتے قانونی دفعات تے عمل درآمد دی جیت دا ݙینہہ اے، 9 مئی دے حملیاں دے ناقابل تردید شواہد موجود ہن ڄݙاں حملہ آوراں اتے بلوائیاں دفاعی تنصیبات، شہیداں دیاں یادگاراں کوں ڈھوایا اتے سرکاری املاک کوں نقصان پُڄایا، قانون نافذ کرݨ آلے افسراں کوں زخمی کیتا، توڑ پھوڑ کیتی اتے املاک ساڑیاں ڳن اتے قومی یکجہتی دیاں علامتاں کوں نقصان پُڄایا۔ انہاں آکھیا جو 9 مئی دے واقعات اچ ملوث ملزماں دا لمبے عرصے تئیں ٹرائل تھیا، عدالت دے سامݨے ناقابل تردید شواہد پیش کیتے ڳئے، فیئر ٹرائل دے بعد سارے قانونی تقاضے پورے کیتے ڳئن۔ انہاں آکھیا جو 9 مئی پاکستان دی تاریخ دا ہک وفا سیاہ ݙینہہ ہا ڄݙاں مسلح جتھیاں دفاعی تنصیبات، شہیداں دیاں یادگاراں اتے ریڈیو پاکستان، کور کمانڈر ہاؤس سودھا سرکاری املاک کوں نشانہ بݨایا۔ خیبر پختونخوا اچ مختلف عمارتاں ساڑین، ڄیڑھے لوک اپݨے آپ کوں قانون توں بالاتر سمڄھدے ہن اڄ عدالت انہاں دا احتساب کر ݙتے، انہاں سزائیں دے بعد اڳو تے کوئی وی جرأت نا کریسی جو او دشمن دے ہتھ مضبوط کرے، ڄئیں دفاعی تنصیبات کوں نشانہ بݨایا، لُٹ مار کیتی ایندے شواہد کیمرے دی اکھ محفوظ کر ڳھدن، سی سی ٹی وی فوٹیج موجود اے اتے ساریاں کوں سنڄاتا ونڄ سڳدے جو کیہڑے لوک ہن ڄئیں اے گھناؤنا جرم کیتے۔ انہاں آکھیا جو اے بالکل واضح اے جو انہاں واقعات دا ماسٹر مائنڈ ایں جماعت دا بانی اے ڄیڑھا ایں ویلھے جیل اچ اے ڄئیں زوم میٹنگز نال اے حملے منظم کروائے، بلوائیاں اتے حملہ آوراں دفاعی تنصیبات کوں نقصان پُڄایا، شہیداں دی وی عزت نہ کیتی اتے ملک اچ باقاعدہ طور تے نظام کوں نقصان پُڄاوݨ دی کوشش کیتی۔ انہاں اجتماعی کوششاں نال مختلف شہراں اچ اے گھناؤنی سازش کیتی ہئی، لاہور دے جناح ہاؤس اچ پروفیشنل ڈاکوواں وانگوں باقاعدہ منصوبہ بندی دے تحت لُٹ مار کیتی ڳئی، ایہہ او کم ہن جو دشمن وی نئیں کر سڳیا ٻھل انہاں عناصر اپݨے ہی ملک اچ دشمن دا ایجنڈا اڳوں ودھایا۔ انہاں آکھیا جو دشمن جݙاں وی حملہ آور تھیوݨ دا خواب ݙٹھے، اساں ہمیشہ ایکوں تکڑا ولدا ݙتے۔ وفاقی وزیر آکھیا جو انہاں شرپسند عناصر کوں قانون و آئین دے تحت سزائیں ݙتیاں ڳئن ڄیندا خیرمقدم کریندے ہیں۔ اڄ ہک واضح پیغام ڳئے جو کوئی وی حساس تنصیبات یا ریاستی املاک تے حملہ کرݨ دا سوچ وی نئیں سڳدا۔ انہاں آکھیا جو اڄ دا ݙینہہ پاکستان کیتے ہک چنڳی مثال اے ڄیڑھا ثابت کریندے جو قانون دی بالادستی قائم اے اتے اڳو تے کوئی وی ملک دشمن سازش دا حصہ بݨݨ دی جرأت نا کریسی۔ انہاں آکھیا ڄیویں پاکستان سفارتی اتے بیانیے دے محاذ تے دشمن کوں شکست ݙتی، ایویں اندرونی محاذ تے وی قانون و انصاف دی فتح تھئی اے۔