پی ڈی ایم اے پنجاب دی ساوݨ چھل دی صورتحال بارے فیکٹ شیٹ جاری

لاہور۔2اگست (اے پی پی) وزیراعلیٰ پنجاب دیاں ہدایت دے پیشِ نظر پی ڈی ایم اے پنجاب دی ساوݨ دی چھل دی صورتحال بارے فیکٹ شیٹ جاری کرݙتی ڳئی اے۔ اڄوکے سال ساوݨ مینھ پاروں مختلف حادثیں وچ 162 شہری جاں بحق، 571 زخمی، 214 گھر متاثر اتے 121 مال مویشی ہلاک تھئن۔ترجمان پی ڈی ایم اے موجب گزریل 24 گھنٹے وچ صوبائی دارالحکومت لاہور، راولپنڈی، بہاولنگر، مری، چکوال، ساہیوال، نارووال، اوکاڑہ اتے اٹک وچ مینھ ریکارڈ کیتا ڳئے ۔ اڳوں 24 گھنٹے وچ پنجاب دے ودھ سارے ضلعیں وچ مینھ وسݨ دی امید اے۔ ساوݨ دے مینھ دا چھیواں اسپیل 5 اگست توں شروع تھیوݨ دی پیش گوئی کیتی ڳئی اے۔ڈی جی پی ڈی ایم اے عرفان علی کاٹھیا آکھیے جو وزیراعلیٰ پنجاب دیاں ہدایت دے پیشِ نظر متاثرہ فیملیز کوں مالی معاونت ݙتی ویندی پئی اے۔ ڈی جی پی ڈی ایم اے انتظامیہ کوں الرٹ رہݨ دی ہدایت کریندے آکھیے جیڑھاجو دریائے چناب وچ خانکی اتے دریائے سندھ وچ کالا باغ چشمہ تونسہ دی جاہ تے گھٹ درجے دا چھل اے جݙاں جو تربیلا دی جاہ تے پاݨی دا وہݨ نارمل سطح تے اے۔ دریائے جہلم راوی اتے ستلج وچ پاݨی دا وہݨ نارمل سطح تے اے۔ رودکوہیاں اتے وݙے دریاواں نال لڳدے ندی نالیاں وچ وی پاݨی دا وہݨ نارمل سطح تے ہے۔ ڈی جی عرفان علی کاٹھیا آکھیا جو تربیلا ڈیم وچ پاݨی دی سطح 89 فیصد جݙاں جو منگلا ڈیم 61 فیصد تئیں بھر چُکئے۔ بھارتی ڈیماں وچ پاݨی دی سطح 43 فیصد تئیں اے۔ ڈی جی پی ڈی ایم اے آکھیا جو شہریاں توں اپیل اے جو موسم برسات وچ احتیاطی تدبیراں اختیار کرن۔ ٻالاں دا خیال رکھو، انہاں کوں برساتی نالیں، گھٹ علاقیاں، دریاواں اتے نہراں وچ ہرگز نہ دھاوݨ ݙیو۔