وفاقی وزیر پروفیسر احسن اقبال دی چین دے ڈویلپمنٹ ریسرچ سنٹر (ڈی آر سی) اتے سینٹر فار انٹرنیشنل نالج آن ڈویلپمنٹ (سی آئی کے ڈی) دے صدر لو ہاؤ نال ملاقات

بیجنگ۔3اگست (اے پی پی) وفاقی وزیر منصوبہ بندی، ترقی اتے خصوصی اقدامات پروفیسر احسن اقبال آکھیے جو پاکستان اتے چین دا مضبوط اقتصادی تعاون قومی ترقی دی کنجی اے، دیرتئیں اتے پائیدار اقتصادی ترقی کیتے چین دی سائنٹفک پلاننگ مشعل راہ اے، پاکستان چین دیاں اقتصادی اتے اصلاحاتی کامیابیاں توں سکھݨ چاہندے ۔ وزارت منصوبہ بندی موجب اے ڳالھ انہاں چین دے ڈویلپمنٹ ریسرچ سنٹر (ڈی آر سی) اتے سینٹر فار انٹرنیشنل نالج آن ڈویلپمنٹ (سی آئی کے ڈی) دے صدر لو ہاؤ نال ملاقات اچ آکھی۔وفاقی وزیر آکھیا جو پاکستان اتے چین دا مضبوط اقتصادی تعاون قومی ترقی دی کنجی اے، سی پیک لازوال دوستی کوں سیاسی تعاون توں ودھا تے معاشی و سماجی شراکت داری وچ بدل ݙتے۔ احسن اقبال آکھیا جو پاکستان چین دیاں اقتصادی اتے اصلاحاتی کامیابیاں توں سکھݨ چاہندے، دیرتئیں اتے پائیدار اقتصادی ترقی کیتے چین دی سائنٹفک پلاننگ مشعل راہ اے۔ انہاں آکھیا جو “اُڑان پاکستان” پروگرام نال ملکی معیشت استحکام دے رستے تے ٹردی پئی اے ، “اُڑان پاکستان” دا ہدف پاکستان کوں 2035 تئیں ہک ٹریلین ڈالر دی معیشت بݨاوݨ دا اے۔احسن اقبال مزید آکھیا جو پاکستانی معیشت دے سارے اشاریں دے مثبت ہووݨ دی عالمی ادارے تصدیق کریندے پئن، پالیسی ریٹ 23 فیصد توں گھٹ تھی تے 11 فیصد تے آ چُکئے اتے پاکستان اسٹاک ایکسچینج ہک لکھ 40 ہزار پوائنٹس توں ودھ چکی اے۔ انہاں آکھیا جو چین سالانہ تقریباً 2 ٹریلین ڈالر دیاں درآمدات کریندے جݙاں جو پاکستان دا ایں وچ ٻہوں گھٹ حصہ اے۔ احسن اقبال آکھیا جو پاکستان چین دے نال تجارت اتے برآمدات کوں ودھاوݨ چاہندے، چینی منڈیاں تئیں رسائی حاصل کرݨ ہک اہم معاشی ہدف اے۔ انہاں آکھیا جو ماضی وچ سیاسی عدم استحکام اتے پالیسیاں دے تسلسل وچ رکاوٹ ترقیاتی عمل کوں متاثر کیتا۔ایں موقع تے ڳالھ مہاڑ کریندے لو ہاؤ پاکستان دی برآمدات تے مبنی معیشت بݨݨ دی حکمت عملی تے اعتماد دا اظہار کیتا۔ انہاں وزارت منصوبہ بندی پاکستان اتے چین دے ڈویلپمنٹ ریسرچ سنٹر وچال سانجھے داری اتے تعاون دے معاہدے تے اتفاق کریندے آکھیا جو مشترکہ تحقیق، تربیتی پروگرامز اتے ماہرین دے تبادلیں دے ذریعے چین پاکستان دی معاشی میدان وچ مدد کریسی۔