بھارت کشمیری شناخت مٹاوݨ وچ ناکام، پاکستان ہر محاذ تے آواز چیسی، اورنگزیب کھچی

اسلام آباد۔3اگست (اے پی پی) وفاقی وزیر قومی ورثہ و ثقافت اورنگزیب خان کھچی غیر قانونی بھارتی مقبوضہ جموں و کشمیر دے عوام کیتے پاکستان دی غیر متزلزل اخلاقی، سفارتی اتے ثقافتی حمایت دا اعادہ کریندے ہوئیں آکھیے جو پوری قوم ہک آواز تھی تے اکھیندی اے جو “کشمیر بݨسی پاکستان”۔5 اگست یوم استحقاق دے سلسلے وچ اے پی پی نال ڳالھ مہاڑ کریندے ہوئیں وفاقی وزیر آکھیا جو کشمیر دے مظلوم عوام کیتے پاکستان دی حمایت قومی عزم اتے تاریخی ذمہ داری نال جڑی اے۔ انہاں آکھیا جو پوری قوم کشمیریاں دے نال کھڑی اے اتے اساں ہر فورم اتے ہر پلیٹ فارم تے انہاں کیتے آواز چیندے رہسوں۔ وفاقی وزیر ایں ڳالھ تے زور ݙتا جو قومی ورثہ اتے ثقافت دی وزارت آپݨے جڑئے اداریں، لوک ورثہ، قومی زبان دے ودھارے دے ادارے، پاکستان نیشنل کونسل آف آرٹس، پاکستان اکیڈمی آف لیٹرز اتے نیشنل لائبریری آف پاکستان دے نال رل تے ایں ݙینھ کوں مناوݨ کیتے ثقافتی اتے ادبی سرگرمیاں دی جامع منصوبہ بندی کیتی اے، جنہاں وچ سیمینار، مباحثے، ریلیاں اتے مقابلے شامل ہن جنہاں دا مقصد کشمیریاں دے نال قومی ہک مت کوں مضبوط کرݨ اے۔وفاقی وزیر مزید آکھیا جو اپݨے ثقافتی پلیٹ فارم دے ذریعے اساں اے واضح پیغام ݙیندے پیوں جو کشمیریاں دی شناخت، تاریخ اتے آواز کوں مٹایا نئیں ونڄ سڳدا۔ انہاں آکھیا جو اساݙے فنکار، لکھاری، شاعر اتے نینگر دل و جان نال کشمیر دے نال ہن۔وفاقی وزیر قومی ورثہ و ثقافت اورنگزیب خان کھچی آکھیا جو انہاں اقدامات دے تحت پاکستان نیشنل کونسل آف دی آرٹس، وزارت امور کشمیر اتے گلگت بلتستان دے تعاون نال 5 اگست کوں یوم استحقاق مناوݨ کیتے ہک خصوصی پروگرام دا انعقاد کیتا ویسی۔ پی این سی اے دی مین لابی وچ تصویری نمائش اتے دستاویزی فلماں ݙکھالیاں ویسن اتے ہک کٹھ پتلی شو وی ہوسی۔ انہاں آکھیا جو انہاں تقریباں دا مقصد 5 اگست 2019 دے غیر قانونی اقدامات اتے بھارتی مقبوضہ کشمیر وچ انسانی حقوق دیاں مسلسل خلاف ورزیاں دے بارے وچ عالمی سطح تے بیداری پیدا کرݨ اے۔