صدر آصف علی زرداری نال ایران دے صدر ڈاکٹر مسعود پزشکیان دی ملاقات

اسلام آباد۔3اگست (اے پی پی) صدر آصف علی زرداری نال ایران دے صدر ڈاکٹر مسعود پزشکیان ایوانِ صدر وچ ملاقات کیتی۔ ایوان صدر پُڄݨ تے صدر مملکت ایرانی صدر دا دلوں خیرمقدم کیتا۔ملاقات وچ پاکستان اتے ایران وچال ݙو طرفہ تعاون کوں مزید وسعت ݙیوݨ دے عزم دا اعادہ کیتا ڳئے۔ ݙوہائیں رہنماواں وچال خطے وچ پائیدار امن، استحکام اتے ترقی کیتے رل تے سفارتی کوششاں دی لوڑھ تے زور ݙتا ڳیا۔ ایں موقع تے سانجھھی دلچسپی دے علاقائی و عالمی امور تے وی تفصیلی ڳالھ مہاڑ تھئی۔صدر آصف علی زرداری ایران دے اصولی موقف اتے فلسطین و کشمیر دے مظلوم عوام دی حمایت تے ایرانی قیادت دا شکریہ ادا کیتا۔ انہاں اسرائیل دی اڄوکی جارحیت دی سخت مذمت کریندے ہوئیں 12 ݙینھ دی جنگ دے دوران ایرانی عوام دی ہمت اتے یکجہتی کوں خطے وچ مزاحمت دی علامت قرار ݙتا۔ صدرمملکت اے وی آکھیا جو پاکستان ایران دے نال رل تے خطے دے پرامن اتے خوشحال مستقبل کیتے کم جاری رکھیسی۔صدر آصف علی زرداری ایران دے سپریم لیڈر آیت اللہ سید علی خامنہ ای دی طرفوں جموں و کشمیر تے بھارتی غیر قانونی قبضے دے خلاف مسلسل عوامی حمایت تے وی شکریہ ادا کیتا۔ انہاں ایران دی طرفوں اوکھے ویلھے وچ پاکستان نال یکجہتی تے وی اظہارِ تشکر کیتا۔ایرانی صدر ڈاکٹر مسعود پزشکیان ایں موقع تے 12 ݙینھ دی جنگ دے دوران پاکستان دی قیادت اتے عوام دی حمایت تے شکریہ ادا کیتا۔ انہاں آکھیا جو پاکستان کشیدگی وچ کمی اتے جھیڑیں دے پرامن حل کیتے تعمیری کردار ادا کیتے۔ ایرانی صدر ایں ڳالھ تے زور ݙتا جو ݙوہائیں ملک تجارتی، ثقافتی اتے عوامی سطح تے رابطیں کوں مزید ودھارا ݙیسن اتے انہاں دا موجودہ دورہ ݙوہائیں بھرا ملکاں وچال تعلقات کوں مزید تکڑا کریسی۔