وزیراعظم دی سربراہی اچ اڄوکیاں بارشاں اتے و سیلاب دے نقصانات اتے امدادی اقدامات بارے جائزہ اجلاس

اسلام آباد۔22اگست(اے پی پی)وزیرِ اعظم محمد شہباز شریف وزارت آبی وسائل کوں متاثرہ علاقیاں اچ واٹر سپلائی دا نظام بحال کرݨ اچ خیبرپختونخوا دی صوبائی حکومت دا پورا ہتھ ونݙاوݨ دی ہدایت کیتی اے۔ او اسلام اباد اچ اڄوکیاں بارشاں اتے سیلاب دے نقصانات اتے جاری امدادی اقدامات بارے جائزہ اجلاس دی اڳواݨی کریندے پئے ہن۔ وزیراعظم وزارت آبی وسائل کوں ہدایت کیتی جو متاثرہ علاقیاں اچ واٹر سپلائی دا نظام بحال کرݨ اچ خیبرپختونخوا دی صوبائی حکومت دی مکمل معاونت کیتی ونڄے، مینھ اتے سیلاب نال متاثرہ لوکاں دی مدد ساݙا قومی فرض اے، متاثرین دے ریسکیو و امداد دے بعد انہاں دی بحالی دا کم شروع کیتا ویسی، دریاواں، ندی نالیاں اتے پاݨی دیاں قدرتی گزرگاہواں دے نیڑے عمارتاں روکھݨ کیتے قومی سطح تے مہم چلاوݨی چاہیدی اے۔ وزیرِ اعظم متاثرہ علاقیاں اچ جتھاں جتھاں امدادی کاروائیاں جاری ہن اتھاں متعلقہ وفاقی وزراء اتے سیکرٹریز کوں بھیجݨ دی ہدایت کیتی۔ انہاں متوقع ݙو سپیلز دے حوالے نال خطرے وات آبادیاں کوں پیشگی آگاہی ݙیوݨ دی وی ہدایت کیتی۔ وزیرِ اعظم حکم ݙتا جو “گلگت بلتستان اچ گزریل رات گلیشئیر پھٹݨ دے ملبے نال بݨی ہوئی جھیل دی سخت نگرانی کیتی ونڄے اتے ممکنہ طور تے متاثر تھیوݨ آلے علاقیاں اچ لوکاں دا انخلا یقینی بݨایا ونڄے۔ وزیراعظم چیئرمین این ڈی ایم اے کوں ایں جھیل دی نگرانی اتے بغیر کہیں نقصان دے پاݨی دے اخراج کیتے پاک فوج اتے ایف سی این اے دے انجینئرز دی خدمتاں گھنݨ دی وی ہدایت کیتی۔ اجلاس کوں ملک دے اُتلے و جنوبی حصیاں اچ متوقع مینھاں، دریاواں دی صورتحال اتے گلیشئیرز دے حوالے نال وی آگاہی ݙتی ڳئی۔ اجلاس کوں وزیرِ اطلاعات و نشریات ریسکیو و امدادی سرگرمیاں دی کوآرڈینیشن کیتے ٻݨائے ڳئے سنٹرل کوآرڈینیشن کمیٹی دا وی ݙسایا ڳیا۔ اجلاس اچ وفاقی وزراء احسن اقبال، ڈاکٹر مصدق ملک، انجینئر امیر مقام، عبدالعلیم خان، سردار اویس خان لغاری، عطاء اللہ تارڑ، میاں محمد معین وٹو، مشیر وزیرِ اعظم رانا ثناء اللہ، معاون خصوصی مبارک زیب، چیئرمین این ڈی ایم اے لیفٹیننٹ جنرل انعام حیدر ملک اتے متعلقہ اُچے حکام شرکت کیتی۔