ڈیجیٹل سرمایہ کاری سستی، وختی اتے زیادہ شفافیت دی حامل اے، ملک دے 10 توں 15 فیصد لوک ڈیجیٹل کاروبار نال جُڑئے پئن ، وفاقی وزیر خزانہ سینیٹر محمد اورنگزیب

اسلام آباد۔23اگست (اے پی پی) وفاقی وزیر خزانہ سینیٹر محمد اورنگزیب آکھیے جو ڈیجیٹل سرمایہ کاری سستی، وختی اتے زیادہ شفافیت دی حامل اے، ملک دے 10 توں 15 فیصد لوک ڈیجیٹل کاروبار نال جُڑے ہوئن، مستقبل اچ ڈیجیٹل اثاثیں دا رجحان مزید ودھسی، ڈیجیٹل سرمایہ کاری دے قوانین کوں وی بہتر بݨاوݨا ہوسی تاں جو سرمایہ کاری اچ شفافیت یقینی بݨائی ونج سڳے، ویلھے دے تقاضیں موجب معاشی ترجیحات بݨاوݨیاں ہوسن، حکومت سرمایہ کاراں کوں سہولتاں ݙیوݨ کیتے کوششاں کریندی پئی اے، کرپٹو مائیننگ زیر غور اے ایں حوالے نال کرپٹو کونسل تشکیل ݙتی ڳئی اے، ڈیجیٹل اثاثیں اتے کاروبار دے قوانین تے کم جاری اے، وپاری اتے سرمایہ کار طبقے کوں سہولتاں ݙیوݨ پہلی ترجیح اے۔ اے ڳالھ وفاقی وزیر خزانہ و محصولات سینیٹر محمد اورنگزیب اتھاں “بلاک چین اینڈ ڈیجیٹل ایسٹس: ٹیکنالوجی اینڈ انوویشن” دے حوالے نال منعقدہ کانفرنس توں خطاب اچ آکھی ۔ انہاں کانفرنس دے منتظمین اتے لمز توں اظہار تشکر کریندیں آکھیے جو تساں قومی معیشت دی ترقی اتے نویں معاشی سمتاں متعارف کراوݨ اچ ساݙی مدد کریندے پیو انہاں آکھیے جو اے ہک حقیقت اے جو دنیا مسلسل اڳوں ودھدی پئی اے اتے چنڳاں اے یا بُرا ایں اچ پئے بغیر اساں کوں وی اڳوں ودھݨا ہوسی۔ وزیر خزانہ آکھیے جو میں گزریے سال ایں کوں فالو کرݨ شروع کیتا، پاکستان دے 20 توں 25 ملین لوک کہیں نہ کہیں طرح بلاک چین اتے ڈیجیٹل اثاثہ جات وغیرہ نال جُڑے ہوئن جنہاں اچ سرمایہ کار، منافع کماوݨ آلیں سودھے کئی واری ضیان برداشت کرݨ آلے وی شامل ہن۔ انہاں آکھیے جو اے ہک حقیقت اے جو ساݙی 10 توں 15 فیصد آبادی ایں سرگرمی نال جُڑی ہوئی اے جنہاں اچ زیادہ تر نوجوان شامل ہن۔ انہاں آکھیا پاکستان جیں پوزیشن تے وی اے بھانویں ایں کوں نظر انداز نئیں کیتا ونج سڳدا، ایہا وجہ اے جو لاہور یونیورسٹی آف مینجمنٹ (لمز) قیادت سنبھالی اتے ݙوجھے سانجھے داراں دے تعاون نال لمز اچ سینٹر آف ایکسیلنس قائم کیتا جیں تے سانجھے داراں دیاں کوششاں قابل تعریف ہن۔ سینیٹر محمد اورنگزیب آکھیے بطور وزیر خزانہ میݙا نکتہ نظر مختلف اے اتے میں ایں کوں ریگولیٹری نکتہ نظر نال ݙیکھدں۔ انہاں آکھیا جو ایویں ٻہوں ساریاں سرگرمیاں اتنے وݙے پیمانے تے تھیندیاں پئن تاں قواعد و ضوابط وی ضروری ہن۔ انہاں آکھیا جو اساں پنج، چھی سال دی جدوجہد دے بعد ٻہوں اوکھیں گرے لسٹ توں ٻاہر نِکلیوں اتے اساں ول ایں صورتحال اچ نئیں ونڄݨ چاہندے۔ انہاں آکھیے جو اساں کوں ریگولیٹری تناظر اچ انہاں سرگرمیاں کوں مختلف نظر نال ݙیکھݨا چاہیدے۔ وزیر خزانہ آکھیا جو اے پاکستان کیتے ہک اہم موقع تھی سڳدے اتے ایں کوں اڳوں گھن تے ٹرݨا چاہیدے اتے مالیاتی شراکت، شفافیت اتے ٹیکنالوجی توں فیدہ گھنݨ کوں پیش نظر رکھݨا ہوسی۔ انہاں آکھیا جو موجودہ دور اچ ٹیکنالوجی توں فیدہ گھنݨ دے ذریعے خدمتاں یوݨ وختی، سستی اتے پہلے توں بہتر تھئی اے اتے ہر شخص ایہو چاہندے۔ انہاں آکھیا جو “بلاک چین، اے آئی اتے کرپٹو وغیرہ وی ٹیکنالوجی دی بنیاد تے ہی کم کریندے پئن۔ انہاں آکھیا جو “ترسیلات زر پاکستان کیتے لائف لائن دی حیثیت رکھیندی اے اتے ایں حوالے نال ٻہوں سارے اداریں نال رل تے اقدامات کیتے ویندے پئن۔” انہاں آکھیا جو اساں کنے اضافی توانائی موجود اے اتے اساں ایں کوں ویلیو چین دے ذریعے کرپٹو مائننگ، اے آئی ڈیٹا سینٹر وغیرہ اچ استعمال کرݨ دے خواہش مند ہیسے۔ وزیر خزانہ آکھیا جو حکومت کرپٹو کونسل دے قیام نال ایں حوالے نال اہم قدم چاتے جیں دے بعد پاکستان ورچوئل ایسٹس ریگولیٹری اتھارٹی (پی وی اے آر اے) دے آرڈیننس تے کم کیتا ویندا پئے اتے ایں حوالے نال پہلا اجلاس آندے سنوار کوں تھیسی جیں اچ پالیسی اموار دے ایجنڈا آئٹمز دا جائزہ ڳھدا ویسی۔” انہاں آکھیا جو ایں حوالے نال اساں خوش قسمت ہیسے جو اساں کوں بین الاقوامی معاونت وی حاصل اے۔ انہاں آکھیا جو جے ݙوجھے ملک ایں تے ونڄ چُکن یا ویندے پئن تاں اساں کوں اے یقینی بݨاوݨا ہوسی جو پاکستان انہاں ملکاں اچ اہم پوزیشن تے ہووے، اساں کوں یقینی بݨاوݨا چاہیدے جو اساݙے مفادات تے کوئی سمجھوتہ نہ تھیوے، اساں کوں ݙوجھے ملکاں دے تجربیں کوں گھن تے اڳوں ودھݨا چاہیدے۔ انہاں آکھیا جو بلاک چین دے حوالے نال قوانین وختی ہی قومی اسمبلی اتے سینیٹ توں منظور تھی ویسن، جنہاں کیتے اساں مختلف ملکاں دے قوانین توں فیدہ وی ڳھدے۔ وزیر خزانہ سینیٹر محمد اورنگزیب آکھیا جو حکومت قومی معیشت دی ترقی اچ نجی شعبے دے کردار دی تعریف کریندی اے اتے وزیراعظم دے وژن موجب نجی شعبے کوں بہترین ماحول ݙیوݨ تے خصوصی توجہ ݙیندیں ریگولیٹری قوانین اچ سہولتاں ݙیوݨ یقینی بݨایا ویندا پئے۔ انہاں آکھیا جو کرپٹو کرنسی دے حوالے نال اساں کوں شروعات اچ تجرباتی بنیاداں تے کم کرݨ دی لوڑھ اے، ایں حوالے نال نجی شعبے، اکیڈیمیا، حکومت کوں رل تے کم کرݨا چاہیدے۔ انہاں آکھیا جو اساں کوں قومی معیشت کوں جدید معیشت اچ بدلݨا ہوسی، ایں حوالے نال جامع حکمت عملی دے تحت خاص طور تے نینگراں دی شمولیت کوں یقینی بݨیندیں اقدامات کیتے ویندے پئن۔ آپݨے خطاب دے چھیکڑ اچ انہاں سیمینار دے انعقاد تے لمز دی انتظامیہ اتے ݙوجھے سانجھے داراں کوں خراج تحسین وی پیش کیتا۔