پاک فوج خیبرپختونخوا، گلگت بلتستان اتے پنجاب اچ امدادی سرگرمیاں اچ بھرپور حصہ گھندی پئی اے، ڈی جی آئی ایس پی آر احمد شریف چوہدری دی وفاقی وزیر اطلاعات اتے چیئرمین این ڈی ایم اے دے نال پریس بریفنگ

اسلام آباد۔27اگست (اے پی پی) پاک فوج دے شعبہ تعلقات عامہ (آئی ایس پی آر) دے ڈائریکٹر جنرل احمد شریف چوہدری آکھیے جو وزیراعظم شہباز شریف اتے آرمی چیف فیلڈ مارشل سید عاصم منیر دیاں خصوصی ہدایات تے پاک فوج خیبرپختونخوا، گلگت بلتستان اتے پنجاب اچ امدادی سرگرمیاں اچ بھرپور حصہ گھندی پئی اے، امدادی کاروائیاں دے دوران پاک فوج دے ݙو جوان شہید اتے ݙو زخمی تھئن، صوبہ خیبرپختونخوا اچ امدادی سرگرمیاں دے نال نال فتنہ الخوارج اتے دہشت گرداں دے خلاف بھرپور کاروائیاں جاری ہن۔ اے ڳالھ انہاں وفاقی وزیر اطلاعات و نشریات عطاء اللہ تارڑ اتے چیئرمین این ڈی ایم اے لیفٹیننٹ جنرل انعام حیدر ملک دے نال پریس کانفرنس توں خطاب کریندیں آکھی۔ ڈی جی آئی ایس پی آر لیفٹیننٹ جنرل احمد شریف چوہدری آکھیا جو وزیراعظم شہباز شریف اتے آرمی چیف فیلڈ مارشل سید عاصم منیر دیاں خصوصی ہدایات تے پاک فوج خیبرپختونخوا، گلگت بلتستان اتے پنجاب اچ امدادی سرگرمیاں اچ بھرپور حصہ گھندی پئی اے، پاک فوج دے جواناں دے علاوہ ہک انجینئر بریگیڈ اتے 30 یونٹس فلڈ ریلیف کیتے خدمتاں سرانجام ݙیندے پئن، انہاں اچ ہک انجینئر بریگیڈ، 19 انفنٹری، 7 انجینئرز اتے 4 میڈیکل یونٹس شامل ہن، چھل آلے علاقیں اچ آرمی دے 29 میڈیکل کیمپ قائم کیتے ڳئن، 20788 مریضاں دا ہݨ تئیں علاج کیتا ڳئے، 28 ہزار لوکاں کوں ریسکیو کیتا ڳئے، چھل متاثرہ علاقیں اچ 225 ٹن راشن ونݙیا ڳئے۔ انہاں آکھیا جوخراب موسم دے باوجود آرمی ایوی ایشن 26 پروازاں کیتیاں ، ترائے وݙے پلاں کوں مرمت کر تے بحال کیتا ڳئے، آرمی انجینئرز سول انتظامیہ دے نال مل تے 104 سڑکاں کوں بحال کیتے، خیبرپختونخوا اچ 100 اتے گلگت بلتستان اچ چار سڑکاں دی بحالی کیتی ڳئی اے۔ انہاں آکھیا جو گوجرانوالہ ڈویژن اچ انفنٹری دیاں 6 یونٹس، ݙو انجینئرز یونٹ کشتیاں اتے ݙوجھے سامان دے نال موجود ہن، ݙو میڈیکل کیمپ قائم کیتے ڳئن، سول انتظامیہ دے نال رل تے 6 ہزار لوکاں کوں محفوظ جاہ تے منتقل کیتا ڳئے۔ انہاں آکھیا جو ورکنگ باؤنڈری اتے سرحد تے پاک فوج چوکس اے، پاک وطن دے دفاع کیتے کہیں سرحدی چوکی کوں خالی نئیں کیتا ڳیا، فرض دی ادائیگی دے دوران ݙو جوان شہید اتے ݙو زخمی تھئن، کرتارپور صاحب اچ انخلا دا وݙا آپریشن کیتا ڳئے، پاک فوج دے انجینئرز دیاں پنج کشتیاں امدادی کارروائی اچ حصہ ڳھدا، قصور اتے چونیاں اچ چار انفنٹری اتے ہک انجینئر یونٹ تعینات اے، 9 ہزار توں ودھ لوکاں اتے مال ڈھور کوں محفوظ جاہ تے منتقل کیتا ڳئے، ریلیف سنٹرز اتے کیمپ وی قائم کیتے ڳئن، بہاولپور اتے بہاولنگر اچ وی کہیں ہنگامی صورتحال نال نبڑݨ کیتے چار انفنٹری اتے ہک انجینئرنگ یونٹ کوں تعینات کیتا ڳئے، ریلیف کیمپ وی قائم کیتا ڳئے، انہاں علاقیں توں جتھاں چھل دا خطرہ اے ݙو ہزار لوکاں دا انخلا کیتا ڳئے۔ انہاں آکھیا جو خیبرپختونخوا اچ پاک فوج، ایف سی اتے قانون نافذ کرݨ آلے ادارے امدادی سرگرمیاں دے نال نال خوارج اتے دہشت گرداں دے خلاف آپریشن جاری رکھیا ہویا اے ، دہشت گرد موجودہ صورتحال توں کوئی فیدہ نئیں چا سڳدے۔ انہاں آکھیا جو قراقرم ہائی وے، جگلوٹ۔سکردو روڈ کھول ݙتی ڳئی اے، پاک فوج دے افسران اتے جوان بھاویں امن ہووے یا جنگ اوکھ دی ہر گھڑی اچ پاکستانی عوام دے نال کھڑن، پاک فوج اتے عوام کٹھے ہن، کٹھے ہن اتے کٹھے رہسن اتے کوئی باطل قوت ایں اچ دراڑ نئیں پا سڳدی۔ انہاں آکھیا جو پاک فوج وزیراعظم محمد شہباز شریف دی ہدایات تے وفاقی حکومت صوبائی حکومتاں اتے سول اداریں دے نال رل تے اوکھے ویلھے بھرپور امدادی سرگرمیاں جاری رکھی ہوئی اے۔ چیئرمین این ڈی ایم اے لیفٹیننٹ جنرل انعام حیدر ملک آکھیا جو ساوݨ مینھ دا اٹھواں سپیل جاری اے، ایں دے بعد چھیکڑی سپیل ہوسی، بھارت دے غیر قانونی مقبوضہ جموں و کشمیر اچ زور دا مینھ پئے، گزریل رات جموں دے پاسے اچ 300 ملی میٹر توں زیادہ مینھ پیا، اتھاں مینھ اتے کلاؤڈ برسٹ توں شدید نقصان تھئے، سیالکوٹ دے شمالی اتے مشرقی علاقیں اچ 600 ملی میٹر توں زیادہ مینھ وسیے ۔ انہاں آکھیا جو دریائے سندھ اچ کالا باغ، چشمہ اتے تونسہ تئیں وہݨ معمول موجب اے ، دریائے جہلم تے منگلا تئیں وہݨ معمول موجب اے، دریائے چناب اچ مرالہ تے گزریل رات پاݨی دا وہݨ ست لکھ کیوسک تئیں ریکارڈ کیتا ڳیا، ہݨ ایں دی شدت ساڈھے 5 لکھ کیوسک اے، شمال مشرقی علاقیں اچ مینھ دی شدت گھٹ تھیوݨ پاروں اتھاں وہݨ اچ مزید گھٹکی آویسی، بھارت توں دریا ستلج، چناب اتے راوی اچ داخل تھی چُکئے، خانکی دے مقام تے 10 لکھ کیوسک دا ریلا اے، آوݨ آلے ݙینھ اچ قادر آباد دے اُتے دٻاؤ ودھسی، قادر آباد اچ آرمی انجینئرز اتے پی ڈی ایم اے پنجاب دی حدود توں دٻاؤ گھٹ کرݨ کیتے شگاف پاوݨ دی منصوبہ بندی کریندے پیوں ، خانکی اتے قادرآباد دے وچال آوݨ آلے 12 توں 14 گھنٹے اچ وہݨ دی شدت برقرار رہݨ دا امکان اے، ہیڈ تریموں تے تلویں درجے دی چھل اے ، دریائے راوی تے جسڑ تے 2 لکھ 30 ہزار کیوسک دا وہݨ اے جیں نال شاہدرہ اچ 78 ہزار کیوسک اے، ایں دی بھرپور مانیٹرنگ کریندے پیوں ، شاہدرہ اتے بلوکی اچ دباؤ ودھدا پئے، ہݨ اتھاں وچلے درجے دی چھل اے ۔ انہاں آکھیا جو آوݨ آلے ݙینھ اچ سیالکوٹ، نارووال، گوجرانوالہ اتے نال لڳدے علاقیں اچ مزید مینھ دی توقع اے جیں دی وجہ نال انہاں دریاواں خاص طور تے شاہدرہ بلوکی تے دٻاؤ ودھسی، دریائے ستلج تے گنڈا سنگھ والا تے ڈھائی لکھ کیوسک دا وݙا ریلا لنگھدا پئے، 2023 اچ وی اتھاں توں اتنی ہی شدت دا ریلا لنگھیا ہئی جیں دی وجہ نال وݙی تعداد اچ لوکاں دا مربوط طریقے نال انخلا کیتا ڳیا ہئی، ایں ویلھے گنڈا سنگھ والا تے اُچے درجے دی چھل اے  سیلمانکی تے ہک لکھ، ہیڈ اسلام تے 50 ہزار توں ودھ کیوسک اے۔ انہاں آکھیا جو آوݨ آلے ݙینھ اچ دریائے ستلج دے نیڑے رہݨ آلیاں کوں محفوظ علاقیں تے منتقل کرݨ دی لوڑھ اے، پاک فوج، رینجرز، ریسکیو 1122، پی ڈی ایم اے پنجاب ݙوجھے اداریں نال ڑل تے ہݨ تئیں 2 لکھ 10 ہزار لوکاں کوں محفوظ علاقیں تے منتقل کیتے، لوکاں دی محفوظ علاقیں تئیں منتقلی، علاج اتے بحالی پہلی ترجیح اے، آرمی چیف فیلڈ مارشل سید عاصم منیر ولوں ملٹری فارمیشنز کوں ہدایات ݙتیاں ڳئن ، انہاں دیاں ہدایات تے سارے متعلقہ فارمیشنز پی ڈی ایم اے پنجاب سودھے ݙوجھے اداریں دے نال رل تے امدادی سرگرمیاں اچ ودھ چڑھ تے حصہ گھندے پئن، ہݨ تئیں کہیں فرد دے شہید تھیوݨ دی کوئی اطلاع کائنی انہاں آکھیا جو ہیڈ پنجند تے 58 ہزار کیوسک اے، جݙاں انہاں دریاواں دا وہݨ ہیڈ پنجند تے ملسی تاں اے وہݨ 6 لکھ تئیں پُج سڳدے۔ انہاں آکھیا جو آوݨ آلے ݙینھ اچ سندھ حکومت نال رل تے عوام کوں ارلی وارننگ نظام دے تحت کوٹری اتے گڈو تے سارے اعداد و شمار توں پی ڈی ایم اے سندھ کوں آگاہ کریسن تاں جو شہریاں دا وختی انخلا یقینی بݨایا ونڄ سڳے۔انہاں آکھیا جو وزیراعظم شہباز شریف دی ہدایت تے این ڈی ایم اے پنج ہزار خیمے پی ڈی ایم اے پنجاب کوں پُڄا ݙتن، وزیراعظم شہباز شریف جلدی آفتآلے علاقیں دا دورہ وی کریسن انہاں آکھیا جو مینھ دا نواں سپیل 29 اگست توں 9 ستمبر تئیں جاری رہسی، انہاں علاقیں اچ مزید مینھ دا امکان اے، متعلقہ علاقیں دے پی ڈی ایم ایز کوں ݙسایا ڳئے ، آزاد جموں و کشمیر اتے خیبرپختونخوا دے کجھ علاقیں اچ مینھ دا امکان اے، این ڈی ایم اے دی ڈیزاسٹر مینجمنٹ الرٹ ایپ تے ساریاں معلومات دستیاب ہن۔