دریائے چناب، راوی اتے ستلج اچ غیرمعمولی چھل دی صورتحال جاری اے، نال لگدے علاقے متاثر تھی سڳدن، این ڈی ایم اے

اسلام آباد۔28اگست (اے پی پی) دریائے چناب، راوی اتے ستلج اچ غیر معمولی چھل صورتحال جاری اے۔ نیشنل ڈیزاسٹر منیجمنٹ (این ڈی ایم اے) دے نیشنل ایمرجنسیز آپریشن سینٹر موجب دریائے چناب اچ قادرآباد اتے خانکی دے علاقیں تے زور دی چھل دی صورتحال اے، خانکی اچ 8 لکھ 59 ہزار کیوسک دا زور دا وہݨ جݙاں جو قادرآباد اچ زور دی چھل دی صورت حال دے نال 9 لکھ 1 ہزار کیوسک پاݨی ریکارڈ کیتا ڳئے، چھل ریلے قادر آباد اتے خانکی دے بعد ہیڈ تریموں توں لنگھسن، دریائے چناب اچ چھل پاروں نال گجرات، حافظ آباد، پنڈی بھٹیاں، سرگودھا، منڈی بہاؤالدین، چنیوٹ اتے جھنگ دے علاقے ممکنہ طور تے متاثر تھی سڳدن، دریائے راوی اچ جسڑ تے 1 لکھ 39 ہزار کیوسک ریلے دے نال زور دی چھل اے، شاہدرہ تے پُڄدیں چھل دا ریلا تقریباً 1 لکھ 64 ہزار 160 کیوسک تھی چُکئے۔ این ڈی ایم اے دے میڈیا ونگ توں جاری کیتے ڳئے بیان موجب اے چھل ریلا شاہدرہ اتے نارووال کوں ممکنہ طور تے متاثر کریسی، شاہدرہ تے لاہور اچ کوٹ منڈو، جیا موسیٰ، عزیز کالونی، قیصر ٹاؤن، فیصل پارک، ڈھیراتے کوٹ بیگم دے علاقے متاثر تھی سڳدن، ضلع شیخوپورہ اچ فیض پور کھوہ، دھمیکی، ݙکا، برج اٹاری، کوٹ عبدالمالک جݙاں جو ضلع ننکانہ صاحب اچ گنیش پور دے علاقے ممکنہ طور تے متاثر تھی سڳدن، ضلع خانیوال اچ غوث پور (میاں چنوں)، امیر گڑھ، کوٹ اسلام اتے عبدالحکیم دے علاقیں کوں وی چھل دے ریلے متاثر کریسن، ستلج اچ گنڈا سنگھ والا تے ایں ویلھے تقریباً 2 لکھ 61 ہزار کیوسک چھل دے ریلے دے نال چھل دی صورتحال موجود اے، چھل ریلے دی وجہ نال گنڈا سنگھ والا دے تلویں علاقیں اچ سلیمانکی اچ تکھا پاݨی وہندا پئے جتھاں ایں ویلھے تقریباً 1 لکھ 9 ہزار کیوسک اے۔ دریائے ستلج اچ چھل دی صورت حال پاروں ضلع قصور اچ پھول نگر، رکھ خانکے، نتھے خلص، لمبے جاگیر، کوٹ سردار، ہنجارے کلہ-بھٹروالکا اتے نوشیرہ گائے دے علاقے ممکنہ طور تے متاثر تھی سڳدن۔ ضلع پاک پتن، وہاڑی، ننکانہ صاحب، اوکاڑہ، بہاولنگر اچ وی چھل دی صورتحال دی توقع اے۔ اے وی آکھیا ڳئے جو وزیراعظم محمد شہباز شریف دی ہدایت تے این ڈی ایم اے سارے ریسکیو و ریلیف سرگرمیاں دی نگرانی کریندا پئے۔ نیشنل ایمرجنسیز آپریشن سینٹر 24 گھنٹے کیتے مکمل فعال اے۔ این ڈی ایم اے سول و عسکری اداریں دے نال رابطے اچ اے۔ این ڈی ایم اے ہدایت کیتی اے جو دریاواں دے کنارے اتے پاݨی دے رستے دے نیڑے رہائش پذیر لوک وقتی تے محفوظ علاقیں اچ منتقل تھی ونڄن۔ مقامی انتظامیہ دی ہدایات تے وختی عمل کرن اتے ہنگامی حالات اچ امدادی ٹیماں نال رابطہ کرن۔ چھل آلے علاقیں اچ غیر ضروری سفر توں مکمل پرہیز کرن۔ ہنگامی کٹ (پاݨی، خوراک، دوائیں) تیار رکھن اتے اہم دستاویزات محفوظ رکھن۔ مزید رہنمائی کیتے این ڈی ایم اے ڈیزاسٹر الرٹ ایپ استعمال کرن۔