اسلام آباد۔29اگست (اے پی پی) وفاقی وزیر داخلہ محسن نقوی نال امریکہ دی قائم مقام سفیر نیٹلی بیکر ملاقات کیتی جیں اچ پاکستان امریکہ ݙو طرفہ تعلقات، پاکستان کوں امریکہ اچ مطلوب پاکستانیاں سودھے آپت دے دلچسپی دے معاملیں تے ڳالھ مہاڑ کیتی ڳئی۔ ملاقات اچ بارڈر سیکورٹی، منشیات دے خلاف اقدامات، کوسٹ گارڈز اتے فرانزک دے شعبیں اچ تعاون ودھاوݨ تے اتفاق تھیا۔ ترجمان وزارت داخلہ موجب ملاقات دے دوران قائم مقام سفیر نیٹلی بیکر خیبر پختونخوا اتے پنجاب اچ چھل پاروں جانی و مالی ضیان تے افسوس کیتا۔ وزیر داخلہ محسن نقوی صدر ٹرمپ دی طرفوں پاکستان اچ تیل دے ذخیرے ودھاوݨ کیتے رَل تے کم کرݨ دا بیان خوش آئند قرار ݙتا۔ انہاں آکھیا جو امریکی سرمایہ کار پاکستان اچ تیل سودھے مختلف شعبیں اچ سرمایہ کاری توں فیدہ چا سڳدن۔ انہاں آکھیا جو امریکی سرمایہ کاراں کوں ہر ممکن سہولتاں ݙتیاں ویسن۔ امریکی قائم مقام سفیر آکھیا جو پاکستان نال تعلقات کوں خصوصی اہمیت ݙیندوں ۔ وفاقی سیکرٹری داخلہ محمد خرم آغا اتے ایڈیشنل سیکرٹری داخلہ میجر جنرل نور ولی خان وی ایں موقع تے موجود ہن۔
