اسلام آباد-29 اگست(اے پی پی)کابینہ کمیٹی برائے بین الحکومتی کمرشل ٹرانزیکشنز دے اجلاس کراچی پورٹ توں پپری سٹیشن ریل راہداری معاہدے دی منظوری ݙے ݙتی۔ نائب وزیراعظم اتے وزیر خارجہ سینٹر محمد اسحاق ݙار کابینہ کمیٹی برائے بین الحکومتی کمرشل ٹرانزیکشنز دے اجلاس دی اڳواݨی کیتی جیںدے اچ کراچی پورٹ کوں پپری سٹیشن نال ملاوݨ آلے ریل راہداری دے پہلے مرحلے دے تجارتی معاہدے تے ولا غور کریندے ایندی منظوری ݙتی ڳئی۔ اجلاس اچ وزیر مملکت برائے ریلوے بلال اظہر کیانی، وزیراعظم دے معاون خصوصی برائے مالیات طارق باجوہ، سیکرٹری کابینہ، سیکرٹری ریلوے اتے سیکرٹری نجکاری شرکت کیتی۔ کمیٹی ایں معاہدے دی منظوری ݙتی کیوں جو ایں کوریڈور دے ٻݨݨ نال کراچی بندرگاہ تے تھیوݨ آلے رش اچ کمی آسے۔ نائب وزیراعظم زور ݙتا جو پاکستان اپݨے علاقائی شراکت داراں جیڑھے پاکستان نال تجارتی اتے اقتصادی تعلقات کوں مضبوط کرݨ چاہندن، انہاں نال تعلقات اتے مصروفیات دا ولا جائزہ گھدا ونڄے۔
