اسلام آباد۔30اگست (اے پی پی) صدر مملکت آصف علی زرداری پاکستان لینڈ پورٹ اتھارٹی ٻل 2025 دی منظوری ݙے ݙتی، صدارتی منظوری دے بعد اے ٻل ہݨ ہک ایکٹ بݨ ڳئے۔ اے قانون پاکستان لینڈ پورٹ اتھارٹی دے قیام دا رستہ ہموار کریندے، اے ہک قانونی ادارہ اے جیڑھا سرحدی کراسنگ پوائنٹس دے پاسے ساماݨ اتے لوکاں دی نقل و حرکت اچ سہولت ݙیندے۔ ایوان صدر دے میڈیا ونگ توں جاری بیان موجب اتھارٹی انٹر ایجنسی کوآرڈینیشن کیتے ہک مرکزی پلیٹ فارم دے طور تے کم کریسی جیڑھی زمینی بندرگاہواں تے موثر تجارت اتے مسافراں دی نقل و حرکت کوں یقینی بݨیسی۔ پاکستان بنگلہ دیش اتے بھارت دے بعد جنوبی ایشیا دا تریجھا ملک بݨ ڳئے جیں لینڈ پورٹ اتھارٹی قائم کیتی اے۔ اتھارٹی بارڈر مینجمنٹ ایجنسیاں دے نال مؤثر طریقے نال ہم آہنگی پیدا کرݨ، تجارتی سہولت کاری کوں ہموار کرݨ اتے سرحد پار رابطیں کوں ودھاوݨ کیتے ہک مضبوط طریقہ کار متعارف کریسی، اے بین الاقوامی معاہدیں اتے کنونشناں دے تحت پاکستان دیاں ذمے واریاں کوں پورا کرݨ اچ وی اہم کردار ادا کریسی۔ پاکستان لینڈ پورٹ اتھارٹی دا قیام پاکستان دے علاقائی تجارتی انضمام کوں مضبوط، بارڈر مینجمنٹ کوں بہتر اتے پڑوسی ملکاں دے نال اقتصادی رابطے ودھاوݨ دے پاسے اہم قدم اے
