اسلام آباد۔30اگست (اے پی پی) وفاقی وزیرِ تجارت جام کمال خان آکھیے جو برآمد کنندگان کیتے چنڳاں ماحول ݙیوݨ، غیرضروری رکاوٹاں مکاوݨ ، صنعتاں دے خرچے گھٹ کرݨ اتے بین الاقوامی منڈیاں تئیں سوکھی رسائی ویلھے دی اہم لوڑھ اے۔ وزارت تجارت موجب اے ڳالھ انہاں راولپنڈی چیمبر آف کامرس اینڈ انڈسٹریز (آر سی سی آئی) دے صدر عثمان شوکت دی اڳواݨی اچ مِلݨ آلے ہک وفد کوں ملاقات اچ آکھی ۔ ملاقات اچ قومی برآمدات اچ ودھارے اتے عالمی تجارت اچ صنعت دے کردار کوں تکڑا بݨاوݨ دے حوالے نال ڳالھ مہاڑ کیتی ڳئی۔ جام کمال خان حکومت دی طرفوں بزنس کمیونٹی کوں ہر ممکن سہولت ݙیوݨ دے عزم کوں ول دوہریندے آکھیا جو برآمد کنندگان کیتے چنڳاں ماحول پیدا کرݨ ویلھے دی لوڑھ اے۔ انہاں آکھیا جو پاکستان دی معاشی ترقی ایں ڳالھ نال مشروط اے جو غیر ضروری رکاوٹاں ختم کیتیاں ونڄن، صنعتاں دے خرچے گھٹ کیتے ونڄن اتے بین الاقوامی منڈیاں تئیں سوکھی رسائی ݙتی ونڄے۔ جام کمال خان آکھیا جو عالمی تجارتی رجحانات تِکھے بدلدے پئن اتے بزنس کمیونٹی کوں نویں موقعیں دی نشاندہی کیتے فعال کردار ادا کرݨا ہوسی۔ انہاں دا آکھݨ ہئی جو پاکستان دی صنعتی و تجارتی صلاحیت ایں ویلھے ہی اجاگر تھیسی جݙاں اساݙیاں صنعتاں عالمی سطح تے مقابلہ کرݨ دے قابل ہوسن۔ انہاں واضح کیتا جو اساں کوں رکاوٹاں کھڑیاں کرݨ دی بجائے آپݨیاں صنعتاں کوں سہولت ݙیوݨی چاہیدی اے، اے ہی او رستہ اے جیں نال پاکستان نویں منڈیاں تئیں رسائی گھن تے قومی آمدݨ اچ ودھارا کر سڳدے۔ آر سی سی آئی دے وفد حکومت دیاں تجارتی و صنعتی پالیسیاں اچ مکمل تعاون دا یقین ݙیوائے اتے عالمی منڈیاں اچ پاکستان دے کردار کوں مزید موثر بݨاوݨ کیتے تجویزاں پیش کیتیاں۔
