آندے 24 گھنٹے اچ ہیڈ تریموں تے 7 لکھ کیوسک دا چھل دا ریلہ پُڄسی، ترجمان پی ڈی ایم اے

لاہور۔31اگست (اے پی پی) پنجاب دے دریاؤاں اچ تغیانی دی صورتحال برقرار، آوݨ آلے 24 گھنٹے اچ ہیڈ تریموں دے علاقے تے 7 لکھ کیوسک تئیں دا چھل دا ریلہ پُڄسی۔ ترجمان پی دی ایم اے موجب دریائے ستلج اچ گنڈا سنگھ والا تے پاݨی دا وہݨ 2 لکھ 53 ہزار کیوسک اے، گزریل ݙینھ گنڈا سنگھ والا اچ پاݨی 3 لکھ 85 ہزار تئیں پڄ ڳیا ہئی جݙاں جو سلیمانکی دے علاقے تے پاݨی دا وہݨ ہک لکھ 54 ہزار کیوسک اے۔ ترجمان موجب دریائے چناب اچ وݙا چھل دا ریلہ جھنگ اتے ہیڈ تریموں توں لنگھدا پئے، دریائے چناب مرالہ تے پاݨی دا وہݨ 99 ہزار کیوسک اے۔ ایویں خانکی ہیڈ ورکس دے علاقے تے پاݨی دا وہݨ ہک لکھ 66 ہزار کیوسک، قادر آباد تے ہک لکھ 85 ہزار کیوسک جݙاں جو ہیڈ تریموں دے علاقے تے پاݨی دا وہݨ3 لکھ 61 ہزار کیوسک اے اتے مسلسل ودھارا تھیندا پئے۔ ترجمان موجب آوݨ آلے 24 گھنٹے اچ ہیڈ تریموں دے علاقے تے 7 لکھ کیوسک تئیں دا  چھل دا ریلہ پُڄسی۔ ایویں ترجمان دریائے راوی اچ جسڑ تے پاݨی دا وہݨ 84 ہزار کیوسک، شاہدرہ تے 76 ہزار کیوسک، بلوکی ہیڈ ورکس تے 2 لکھ 4 ہزار کیوسک اتے دریائے راوی ہیڈ سدھنائی تے پاݨی دا وہݨ 46 ہزار کیوسک اے۔