ملتان۔ 02 ستمبر (اے پی پی) چیئرمین سینٹ سید یوسف رضا گیلانی آکھیا جو تعلیم اتے تبلیغ اساݙے نبی حضرت محمد ﷺ دی سنت اے، انہاں دی تعلیمات نال ہی پوری کائنات علم و امن دا گہوارہ بݨی، اج وی اساں اگر چاہندوں جو دنیا اچ انقلاب برپا کیتا ون٘ڄے تاں تعلیم دے ودھارے کیتے کم کرݨا ہوسی۔ اے ڳالھیں انہاں ملتان اچ منعقدہ سیرت النبی (ص) کانفرنس دے موقع تے کیتا۔ سجادہ نشیں دربار موسیٰ پاک شہید سید ابوالحسن گیلانی، سینئر سیاستدان مخدوم جاوید ہاشمی، صدر انجمن اسلامیہ سید عمران حسن گیلانی، سید غلام یزدانی گیلانی، عامر حسن گیلانی، احمد مجتبیٰ گیلانی، جاوید اختر انصاری، عبدالوحید ارائیں، عبدالغفار ڈوگر، مظہر جاوید، امجد بخاری، اکمل وینس، سودھے علمائے کرام، شہر دے معززین اتے لوکاں دی وݙی تعداد کانفرنس اچ شرکت کیتی۔ سید یوسف رضا گیلانی آکھیا جو اساݙے خاندان دے بزرگاں ایں علاقے اچ تعلیم کوں کھنڈاوݨ اچ تاریخی کردار ادا کیتا۔ بہوں ساریاں تعلیمی درسگاہاں، جنہاں اچ اسلامیہ ہائی سکولز حرم گیٹ، دولت گیٹ، شوکت کنڈر گارٹن اتے کالجز دی بنیاد اساݙے وݙیریاں رکھی۔ جتھاں اج پڑھائی جاری اے۔ چیئرمین سینٹ آکھیا جو ملتان اچ اسلامیہ ہائی سکولز اتے علمدار حسین ڈگری کالج بہترین درسگاہاں ہن۔ گیلانی لا کالج کوں اے اعزاز حاصل اے جو اتھاں 10 پی ایچ ڈی سکالرز پڑھیندے پئن اتے اتھاں پی ایچ ڈی اتے ایل ایل ایم کرایا ویندا پئے۔ اساݙے خاندان لوکاں اتے دین دی خدمت کیتی۔ سید یوسف رضا گیلانی آکھیا جو “حضور پاک ﷺ دی تعلیمات دی پیروی نال اساں ہر میدان اچ کامیابی حاصل کر سڳدوں۔
