وزیراعظم محمد شہباز شریف اتے روس دے صدر ولادی میر پیوٹن دا تجارت دے ودھارے سودھا مختلف شعبیاں اچ تعلقات تکڑا کرݨ دا عزم

بیجنگ۔2ستمبر (اے پی پی)وزیراعظم محمد شہباز شریف اتے روس دے صدر ولادی میر پیوٹن تجارت دے ودھارے سودھا مختلف شعبیاں اچ ݙو پاسہ تعلقات کوں تکڑا بݨاوݨ دا عزم دآعراےط۔ وزیراعظم محمد شہباز شریف اتے روس دے صدر ولادی میر پیوٹن بیجنگ اچ ملین۔ ملاقات اچ نائب وزیراعظم و وزیر خارجہ اسحاق ڈار، آرمی چیف فیلڈ مارشل سید عاصم منیر، وفاقی وزیر منصوبہ بندی و ترقی احسن اقبال، وزیر داخلہ محسن نقوی، وفاقی وزیر اطلاعات و نشریات عطا اللہ تارڑ، وفاقی وزیر خزانہ محمد اورنگزیب اتے وزیراعظم دے معاون خصوصی طارق فاطمی وی موجود ہن۔ وزیراعظم محمد شہباز شریف آکھیا جو “گزریے سال جولائی اچ آستانہ دے بعد اے ساݙی ٻئی ملاقات اے، ݙوہاں ملکاں وچال تجارت اتے معیشت دے شعبیاں اچ تعاون دے ودھارے کیتے سنجیدہ اتے سچّیاں کوششاں جاری ہن، گزریے سال ݙوہاں ملکاں وچال ݙو پاسہ تجارت ودھی اے، اساں روس توں تیل درآمد کیتے جیںدے نال ݙو پاسہ تجارت ودھی اے، پچھلے کئی سالاں توں ݙوہاں ملکاں دے تعلقات مضبوط تھئن، صدر پیوٹن دی دلچسپی اتے عزم پاروں اے تعلقات صحیح سمت ویندے پین۔ وزیراعظم آکھیا جو “آستانہ اچ ملاقات دے بعد ݙوہاں ملکاں دے وفداں ہک ݙوجھے دے ملکاں دا دورہ کیتے، اساں روس نال تجارت سودھا مختلف شعبیاں اچ تعاون چاہندے ہیں جیندے کیتے زراعت، آئرن، سٹیل، توانائی، ٹرانسپورٹ دے شعبیاں اچ تعاون دے ودھارے کیتے مختلف پروٹوکولز تے دستخط وی کیتے ڳئن۔ ایں دے علاوہ بیلاروس، روس، قازقستان، ازبکستان، افغانستان اتے پاکستان وچال کوریڈور کیتے وی پیشرفت تھئی اے، اے ہک ٻہوں اہم کوریڈور ہوسی جیندے نال باہمی تعلقات، تجارت و سرمایہ کاری ودھسی۔ وزیراعظم آکھیا جو پاکستان دی حمایت اتے خطے اچ توازن پیدا کرݨ کیتے تہاݙے اقدامات قابل تعریف ہین، بھارت نال روس دے تعلقات دا احترام کریندے ہیں ٻھل پاکستان وی روس نال مضبوط تعلقات ودھاوݨ چاہندے، اے تعلقات خطے دی ترقی اتے خوشحالی کیتے فائدے مند ثابت تھیسن۔ روس دے صدر ولادی میر پیوٹن آکھیا جو وزیراعظم شہباز شریف نال ملاقات تے خوشی اے، ساݙی گزری ملاقات ہک سال پہلے ایس سی او سربراہ کانفرنس تے آستانہ اچ تھئی ہئی، پاکستان ہمیشہ توں ایشیا اچ اساݙا روایتی شراکت دار اے اتے ݙوہاں ملکاں دے تعلقات مضبوط تھئن، اساں پہلے وی ݙو پاسہ تعلقات تکڑے کرݨ تے اتفاق کیتا ہا، ساکوں تجارت ودھاوݨ کیتے کم کرݨا ہوسی اتے ایں سانڳے ساریاں رکاوٹاں دور کرݨیان ہوسن۔ انہاں آکھیا جو پاکستان نال ݙو پاسہ تعلقات دا ودھارا چاہندے ہیں، پاکستان نال روس دے بہترین تعلقات ہن۔ روس دے صدر آکھیا جو پاکستان کوں قدرتی آفت دا سامݨا اے، امید اے جو پاکستان سارے اوکھ تے تیکھے قابو پا ڳھنسی، اساں سیلاب دے نقصاناں تے پاکستان دے عوام نال ہمدردی کریندے ہیں۔ انہاں آکھیا جو ݙوہاں ملکاں وچال پارلیمانی سطح تے وی ہک ݙوجھے دے نال رابطے ہن، بین الاقوامی فورم تے وی پاکستان اتے روس ہک ݙوجھے دے نال تعاون کریندے پئن، پاکستان ایں ویلھے اقوام متحدہ دی سلامتی کونسل دا غیر مستقل رکن اے، اقوام متحدہ ہک اہم پلیٹ فارم اے اتے ایںدے فریم ورک دے تحت اساݙے رابطے برقرار ہن۔ انہاں آکھیا جو نومبر اچ روس اچ ایس سی او دے فریم ورک دے تحت سربراہان حکومت دا اجلاس تھیندا پئے، اساں ایںدے اچ تہاکوں آوݨ دی دعوت ݙیندے ہیں۔