دنیا کوں موسمیاتی تبدیلیاں دا مقابلہ کرݨ کیتے پاکستان دے نال کھڑا تھیوݨا پوسی، قوم ماحولیاتی تباہی دی وݙی قیمت ادا کریندی پئی اے، صدر مملکت آصف علی زرداری

اسلام آباد۔3ستمبر (اے پی پی) صدر مملکت آصف علی زرداری آکھیا جو موسمیاتی تبدیلیاں دی وجہ نال پاکستان کوں نویں چیلنجز دا سامݨا اے، بھریے دریا اتے بے موسم بارشاں خطے اچ غذائی بحران دا ہک وݙا خطرہ بݨ ڳئن، دنیا کوں موسمیاتی تبدیلیاں دا مقابلہ کرݨ کیتے پاکستان دے نال کھڑا تھیوݨا پوسی۔ ایوان صدر دے پریس ونگ توں بدھ کوں جاری بیان موجب اے ڳالھیں صدر مملکت آصف علی زرداری پنجاب دے گورنر سردار سلیم حیدر توں صوبے اچ سیلاب دی صورتحال تے بریفنگ گھندیں ہوئیں کیتی۔ صدر مملکت آکھیا جو پاکستان دا ماحولیاتی تباہی اچ کوئی کردار نئیں پر اساݙی قوم ایں دی وݙی قیمت ادا کریندی پئی اے۔ صدر مملکت آصف علی زرداری آکھیا جو دنیا کوں موسمیاتی تبدیلیاں دا مقابلہ کرݨ کیتے پاکستان دے نال کھڑا تھیوݨا پوسی۔ صدر مملکت آکھیا جو عوام کوں ایں اوکھے ویلھے اچ کلھا نہ چھڑیسوں۔ صدر مملکت آصف علی زرداری دے پنجاب دے گورنر سردار سلیم حیدر نال رابطے اچ گورنر صوبے اچ سیلاب دی صورتحال تے گالھ مہاڑ کیتی اتے بریفنگ ݙتی۔ صدر آصف علی زرداری کوں پنجاب دے گورنر سردار سلیم حیدر صوبے اچ سیلاب دی صورتحال بارے بریفنگ دے دوران ݙسایا جو پرے دے علاقیاں دی عوام تئیں پڄ تے انہاں کوں ݙسیندے پئیوں جو ایں اوکھے ویلھے اچ اساں انہاں دے نال ہیسے۔ گورنر پنجاب بریفنگ دے دوران ݙسایا جو پاکستان ہلال احمر دی خدمات دا دائرہ لاہور، حافظ آباد، قصور، مظفرگڑھ، راجن پور، نارووال اتے منڈی بہاؤالدین سودھے تقریباً صوبے بھر اچ پھیلا ݙتا ڳئے۔ گورنر پنجاب ݙسایا جو پنجاب اچ سیلاب توں متاثرہ علاقیاں اچ ہلال احمر دے امدادی کیمپ لا ݙتے ڳئن۔ گورنر آکھیا جو کرتار پور اچ واٹر ٹریٹمنٹ پلانٹ قائم کیتا ویندا پئے۔