ملتان۔4ستمبر (اے پی پی) چیئرمین سینیٹ سید یوسف رضا گیلانی سیلاب متاثرین دی فوری امداد دی ہدایت کریندیں ہوئیں آکھیا جو اوکھے ویلھے اچ ساریاں کوں سیاست توں ہٹ تے متاثرہ عوام دی خدمت کرݨی پوسی۔ سینیٹ سیکرٹریٹ دے مطابق چیئرمین سینیٹ یوسف رضا گیلانی آپݨے حلقے دے مخیر حضرات توں اپیل کیتی جو او فلاحی اداریاں دے نال رَل تے کھاوݨ پیوݨ دی شئیں اتے جانوراں دے چارے دی فراہمی اچ مدد کرن۔ انہاں دا آکھݨ ہئی جو اساں سارے سیاسی جماعتاں دے نال رَل تے سیلاب متاثرین کیتے کم کریندے پئیوں اتے اے جدوجہد خالصتاً عوامی خدمت دے جذبے نال کیتی ویندی پئی اے۔ چیئرمین سینیٹ آکھیا جو سیلاب دے شروع توں ای او خود عوام دی خدمت کیتے میدان اچ ہن اتے متاثرین کوں ریلیف پڄاوݨ دے عمل دی براہِ راست نگرانی کریندے پئن۔ انہاں آکھیا جو میڈیا سودھے او سارے ادارے قابل تحسین ہن جو بروقت نشاندہی دے ذریعے انسانی جاناں اتے مال مویشیاں کوں محفوظ جہیں تے منتقل کرݨ اچ اہم کردار ادا کریندے پئن۔ یوسف رضا گیلانی آکھیا جو پاکستان اتے خاص طور تے ملتان اوکھے ویلھے توں لنگھدا پئے، پاݨی دے بہاؤ اچ مسلسل ودھدا پئے اتے زمینی کٹاؤ دا سلسلہ وی جاری اے۔ انہاں متاثرین توں اپیل کیتی جو او آپݨی جاناں کوں بچاوݨ کیتے گھراں کوں خالی کرن اتے محفوظ ڄہیں دا رُخ کرن تاں جو کہیں وݙے نقصان توں بچا ون٘ڄ سڳے۔ چیئرمین سینیٹ انتظامیہ، کمشنر، ڈپٹی کمشنر، سول ڈیفنس، ریسکیو 1122، میڈیا اتے فلاحی تنظیماں کوں خراجِ تحسین پیش کیتا جو رات ݙینھ عوام دی جان و مال دے تحفظ کیتے سرگرم ہن۔
