بیجنگ۔4ستمبر (اے پی پی) وزیراعظم محمد شہباز شریف اتے عوامی جمہوریہ چین دے وزیراعظم لی چیانگ پاکستان اتے چین دے درمیان مضبوط اتے ہمہ جہت تزویراتی تعاون تے مبنی شراکت داری کوں ٻیا مضبوط بݨاوݨ دے عزم دا اعادہ کریندیں ہوئیں سی پیک دے اگلے مرحلے اچ 5 نویں کوریڈورز تے رَل مِل تے کم جاری رکھݨ تے اتفاق کیتے جݙاں جو ݙوہاں ملکاں وچال سی پیک دے ݙوجھے مرحلے، سائنس و ٹیکنالوجی، انفارمیشن ٹیکنالوجی، میڈیا اتے زراعت سودھے مختلف شعبیاں اچ تعاون دے ودھارے کیتے مفاہمت دی یادداشتاں اتے معاہدیاں تے دستخط کر ݙتے ڳئے ۔ وزیراعظم آفس دے میڈیا ونگ توں جاری بیان دے مطابق وزیراعظم محمد شہباز شریف عوامی جمہوریہ چین دے وزیراعظم لی چیانگ نال ملاقات کیتی۔ ملاقات اچ ݙوہاں رہنماواں پاک چین تعلقات اچ مثبت پیشرفت تے اطمینان دا اظہار کیتا۔ وزیراعظم شہباز شریف پاکستان دی علاقائی سالمیت، خودمختاری اتے سماجی تے اقتصادی ترقی کیتے غیر متزلزل حمایت تے چینی قیادت اتے قوم دا دلوں شکریہ ادا کیتا۔ صدر شی جن پنگ اتے وزیراعظم محمد شہباز شریف وچال 2 ستمبر کوں تھیوݨ آلی ملاقات اچ طے تھیوݨ آلے اہم اتفاق رائے دی بنیاد تے چینی وزیراعظم لی چیانگ اتے وزیراعظم شہباز شریف پاکستان اتے چین دے درمیان مضبوط اتے ہمہ جہت تزویراتی تعاون تے مبنی سانجھے داری کوں ٻیا مضبوط بݨاوݨ کیتے آپݨے سانجھے عزم دا اعادہ کیتا اتے سانجھے ایکشن پلان (2024-2029) تے دستخط کوں ایں بارے ہک اہم قدم قرار ݙتا۔ وزیراعظم محمد شہباز شریف آکھیا جو پاکستان دی حکومت دی اصلاحات دی انتھک کوششاں دے امید افزا نتائج صرف چین دی بھرپور حمایت نال ممکن تھئے ۔ انہاں جلدی چینی کیپٹل مارکیٹ اچ پانڈا بانڈز دی فراہمی دے پاکستان دے ارادے دا وی اظہار کیتا۔ اقتصادی شعبے دے حوالے نال وزیراعظم گزریے ݙاہ سال اچ پاکستان دی سماجی تے اقتصادی ترقی اچ صدر شی جن پنگ دے بیلٹ اینڈ روڈ انیشی ایٹو (بی آر آئی) دا ہک اہم منصوبے، چین-پاکستان اقتصادی راہداری دی اہم شراکت کوں اجاگر کیتا اتے قراقرم ہائی وے اتے ریلوے اچ لائن-1 کوں ولا ترتیب ݙیوݨ اتے گوادر پورٹ دے تیکھے فعال تھیوݨ دی ضرورت تے زور ݙتا۔ ݙوہیں فریقین چین-پاکستان اقتصادی راہداری دے اپ گریڈڈ / فیز 2، بشمول 5 نویں کوریڈورز کیتے رَل مِل تے کم کرݨ تے اتفاق کیتا۔ وزیراعظم محمد شہباز شریف بزنس ٹو بزنس تعاون اتے سرمایہ کاری دے وسیع امکانات تے زور ݙیندیں ہوئیں چینی وزیراعظم کوں بیجنگ اچ تھیوݨ آلی سرمایہ کاری کانفرنس بارے ݙسایا جئیں اچ 300 توں ودھ پاکستانی اتے 500 چینی کمپنیاں شریک تھیندی پئن۔ انہاں زراعت، کان کنی تے معدنیات، ٹیکسٹائل، صنعتی شعبے اتے آئی ٹی کوں آپسی طور تے فائدہ مند اقتصادی تعاون کیتے ترجیحی شعبے قرار ݙتا۔ وزیراعظم شہباز شریف چینی صدر شی جن پنگ دے عالمی گورننس انیشی ایٹو، گلوبل ڈویلپمنٹ انیشی ایٹو، گلوبل سکیورٹی انیشی ایٹو اتے گلوبل سولائزیشن انیشی ایٹو سودھے کثیرالجہتی نظام کوں مضبوط بݨاوݨ کیتے انہاں دے تاریخی اقدامات کیتے پاکستان دی حمایت دا اعادہ کیتا۔ وفداں دی سطح تے گالھ مہاڑ دے بعد چینی وزیراعظم ولوں وزیراعظم دے اعزاز اچ ہک باوقار ظہرانہ ݙتا ڳیا۔ واضح رہے جو ݙوہاں ملک آوݨ آلے سال پاک چین سفارتی تعلقات دے قیام دی 75ویں سالگنڈھ منیسن۔ ݙوہاں ملکاں وچال چین-پاکستان اقتصادی راہداری (سی پیک) دے فیز 2 دی ترقی، سائنس و ٹیکنالوجی، انفارمیشن ٹیکنالوجی، میڈیا اتے زراعت سودھے مختلف شعبیاں اچ تعاون ودھاوݨ دے حوالے نال مفاہمتی یادداشتاں اتے معاہدیاں تے دستخط دی تقریب وی تھئی جئیں اچ ݙوہاں وزراءاعظم شرکت کیتی۔
