مون سون بارشاں دے 10 ویں اسپیل بارے نال الرٹ جاری، پنجاب دے بہوں سارے ضلعیاں اچ شدید طوفانی بارشاں دی پیشنگوئی

لاہور۔5ستمبر (اے پی پی) پی ڈی ایم اے مون سون بارشاں دے 10 ویں اسپیل دے حوالے نال صوبہ بھر اچ الرٹ جاری کر ݙتے۔ ترجمان پی ڈی ایم اے موجب 6 توں 9 ستمبر تئیں پنجاب دے بہوں سارے ضلعیاں اچ شدید طوفانی بارشاں دی پیشنگوئی کیتی ڳئی اے۔ بارشاں دا امکان راولپنڈی، مری، گلیات، اٹک، چکوال، جہلم، گوجرانوالہ، لاہور، گجرات اتے سیالکوٹ سودھے نارووال، حافظ آباد، منڈی بہاؤالدین، اوکاڑہ، ساہیوال، قصور، جھنگ، سرگودھا اتے میانوالی اچ ظاہر کیتا ڳئے، جݙاں جو ڈیرہ غازی خان، ملتان اتے راجن پور اچ وی بارشاں دی پیشنگوئی کیتی ڳئی اے۔ پی ڈی ایم اے خبردار کیتا اے جو 7 توں 9 ستمبر دے دوران ڈیرہ غازی خان دے رودکوہیاں اچ فلیش فلڈنگ دا خدشہ اے۔ دریائے چناب، راوی اتے ستلج اچ پہلے ای سیلابی صورتحال اے، جݙاں جو وݙے شہراں اچ ندی نالیاں دے بھرݨ دا امکان موجود اے۔ ڈی جی پی ڈی ایم اے عرفان علی کاٹھیا آکھیا جو صوبے دے سارے کمشنرز، ڈپٹی کمشنرز اتے متعلقہ محکمے بشمول محکمہ صحت، آبپاشی، تعمیر تے مواصلات، لوکل گورنمنٹ اتے لائیو اسٹاک کوں ہائی الرٹ کر ݙتا ڳئے۔ انہاں شہریاں توں اپیل کیتی جو خراب موسم اچ احتیاطی تدابیر اختیار کرن، دریاواں دے کنڈھیاں تے جمع تھیوݨ یا سیر و تفریح توں پرہیز کرن، جݙاں جو ترُکھی اتے طوفان دی صورت اچ محفوظ جہیں تے رہن اتے غیر ضروری سفر نہ کرن، ایمرجنسی دی صورتحال اچ شہری پی ڈی ایم اے ہیلپ لائن 1129 تے رابطہ کر سڳدن۔