اساݙی بہادر مسلح افواج ملک دی خودمختاری اتے سالمیت دے تحفظ کوں یقینی بݨاوݨ دی پوری صلاحیت رکھیندن، وزیراعظم شہباز شریف دا 6 ستمبر یوم دفاع تے شہداء دے موقع تے سنیھا

اسلام آباد۔6ستمبر (اے پی پی) وزیراعظم محمد شہباز شریف 6 ستمبر کوں قومی تاریخ اچ بہادری، اتحاد اتے عزم دی علامت قرار ݙیندیں ہوئیں آکھیا جو 60 سال ٻئے اساݙیاں بہادر مسلح افواج دُشمن دے جارحانہ عزائم کوں ناکام بݨا تے ثابت کیتا جو او ملک دی خودمختاری اتے سالمیت دے تحفظ کوں یقینی بݨاوݨ دی پوری صلاحیت رکھیندن، معرکہ حق اچ ہک وار ٻئے اساݙی مسلح افواج اتے عوام جارحیت دے خلاف آہنی دیوار بݨ تے دُشمن دے تکبر کوں کُچل تے نویں تاریخ رقم کیتی۔ وزیراعظم آفس دے میڈیا ونگ ولوں جاری بیان موجب اج 6 ستمبر کوں یوم دفاع تے شہداء دے موقع تے آپݨے سنیھے اچ وزیراعظم محمد شہباز شریف آکھیا جو 6 ستمبر اساݙی قومی تاریخ اچ بہادری، اتحاد اتے عزم دے ݙین٘ہ دے طور تے نقش اے۔ ساٹھ سال ٻئے اساݙیاں بہادر مسلح افواج نے عوام دے بھرپور تعاون نال ݙُشمن دی جارحیت کوں ناکام بݨا تے ثابت کیتا جو پاکستان ہک بہادر قوم اے جو آپݨی خودمختاری اتے سالمیت دے تحفظ دی مکمل صلاحیت رکھیندی اے۔ انہاں آکھیا جو 1965 دا او ناقابل تسخیر جذبہ اج وی اے، اڄوکے معرکہ حق اچ ہک وار ولا اساݙی مسلح افواج اتے عوام بیرونی جارحیت دے خلاف آہنی دیوار وانگوں ہتھ تے ہتھ ݙے کھڑے رہیے۔ وزیراعظم آکھیا جو بحریہ اتے فضائیہ سودھے اساݙی مسلح افواج بے مثال پیشہ ورانہ مہارت، جدید جنگی مہارت اتے چیف آف آرمی سٹاف فیلڈ مارشل سید عاصم منیر دے تزویراتی وژن دے ذریعے دُشمن دے تکبر کوں آپݨی پرعزم قوت نال کُچل تے نویں تاریخ رقم کیتی، اج دے ݙین٘ہ اساں آپݨے بہادر شہداء کوں خراج عقیدت پیش کریندوں جنہاں آپݨے وطن دی حفاظت کیتے آپݨی جاناں دا نذرانہ ݙتّا۔ انہاں آپݨے غازیاں کوں وی خراج تحسین پیش کیتا جنہاں دی جرات آئندہ نسلاں کیتے ہک مثال اے۔ وزیراعظم آکھیا جو پاکستان دنیا دے نال پرامن بقائے آپسی اتے تعمیری تعلقات دی پالیسی تے گامزن اے لیکن اساں مسلسل بھارتی اشتعال انگیزیاں اتے بدل ݙیوݨ آلے علاقائی تناظر دی حقیقت توں غافل نئیں تھی سڳدے، اساݙی بہادر مسلح افواج اتے قانون نافذ کرݨ آلے اداریاں آپݨی استقامت اتے قربانیاں نال فتنہ الخوارج اتے فتنہ الہندوستان دے عفریت کوں ختم کرݨ اچ بہوں پیش رفت کیتی اے، ایں مشن دی تکمیل تئیں قوم انہاں دے نال مضبوطی نال کھڑی اے۔ اج دے ݙین٘ہ اساں ہندوستان دے غیر قانونی زیر تسلط جموں تے کشمیر دے مظلوم عوام دے نال آپݨی یکجہتی دا اعادہ کریندوں۔ انہاں آکھیا جو اساں کوں یوم دفاع تے شہداء تے قائداعظم دے ایمان، اتحاد اتے نظم و ضبط دے لازوال اصولاں کیتے آپݨے عزم دا اعادہ کریندیں ہوئیں ہک محفوظ، متحد اتے خوشحال پاکستان دی تعمیر کیتے رل تے محنت کرݨ دے جذبے دی تجدید کرݨی پوسی۔