افواجِ پاکستان معرکۂ حق وچ نویں تاریخ رقم کیتی، قوم انہاں دیاں قربانیاں دی شکر گزار اے، وفاقی وزیر دفاع خواجہ محمد آصف دا یومِ دفاع دی تقریب توں خطاب

سیالکوٹ-6 ستمبر (اے پی پی) وفاقی وزیر دفاع خواجہ محمد آصف آکھیے جو 6 ستمبر دا ݙینھ پاکستان دی تاریخ وچ ہک انوکھا مقام رکھیندے کیوں جو ایں ݙینھ افواجِ پاکستان اپݨی بہادری اتے صلاحیتاں دا لوہا منوایا۔ انہاں اے ڳالھ یومِ دفاع دے موقع تے سیالکوٹ قلعہ تے ہلال استقلال دی تبدیلی دی تقریب توں خطاب کریندے آکھی ۔ انہاں آکھیا جو 6 ستمبر 2025 ہک انوکھا یومِ دفاع اے کیوں جو 1965 دی جنگ دے بعد پاکستان کوں اللہ تعالیٰ ہک وݙی فتح نال نوازیا اتے افواجِ پاکستان ہک واری ول دنیا وچ اپݨیاں صلاحیتاں کوں منوایا۔ انہاں دا آکھݨ ہئی جو ایں معرکۂ حق دے بعد ترائے مہینے دے دوران پاکستان دی عزت و توقیر وچ نمایاں ودھارا تھئے، جیں توں اڄ دا ݙینھ قومی جذبے کوں ݙوگنا کرݨ آلا ݙینھ ثابت تھئے۔ وفاقی وزیر دفاع آکھیا جو پوری قوم افواجِ پاکستان دیاں قربانیاں تے ماݨ کریندی اے اتے انہاں دی شکر گزار اے جو انہاں دفاعِ وطن کیتے نویں تاریخ رقم کیتی اے۔ انہاں آکھیا جو بہادری اتے وطن نال محبت دے جذبے نال بھرپور تھی تے افواجِ پاکستان فضاواں، زمین اتے پاݨی دا دفاع کیتا اتے پوری دنیا انہاں دی شجاعت تے حیران رہ ڳئی۔ خواجہ محمد آصف آکھیا جو موجودہ قیادت ہر محاذ تے بھانویں او سفارتکاری، ترقی، تعمیرِ نو یا اتحاد ہووے آپݨا مؤثر کردار ادا کریندی پئی اے۔ انہاں آکھیا جو دفاعِ پاکستان صرف سرحداں تئیں محدود نئیں بلکہ معیشت اتے ہر شعبے وچ ضروری اے، اتے ایں ویلھے افواجِ پاکستان ہک چݨی ڳئی حکومت دے نال قدم نال قدم ملا تے ملک دی قیادت کریندی پئی اے۔ انہاں آکھیا جو شنگھائی تعاون تنظیم دی کانفرنس وچ جیویں وزیراعظم پاکستان محمد شہباز شریف اتے فیلڈ مارشل سید عاصم منیر دی پزیرائی تھئی اے شاید ہی اڄ توں پہلے پاکستان دی تھئی ہوسی۔ انہاں آکھیا جو فیلڈ مارشل سید عاصم منیر دے اڄوکے دورہ امریکہ وی پاکستان دی عزت و وقار کوں عالمی سطح تے بلند کیتا، جتھاں افواجِ پاکستان دی مہارت اتے بہادری کوں تسلیم کیتا ڳیا۔ انہاں دا آکھݨ ہئی جو اے دورہ پاکستان دی تاریخ دا ہک انوکھا باب اے۔ انہاں یاد ݙیوایا جو جیویں 1965 دی جنگ کوں پراݨیاں نسلاں یاد کریندن، ایویں او خود وی ایں ویلھے 16 سال دے ہن اتے ایں جنگ دے گواہ ہن۔ انہاں دا آکھݨ ہئی جو میکوں فخر اے جو میں اپݨی زندگی وچ ݙو 6 ستمبر ݙٹھے ہن، ہک 60 سال پہلے دی فتح دے بعد اتے ہک اڄوکی وݙی کامیابی دے بعد ہݨ ݙٹھے جیں دا میں آپ گواہ ہاں۔ وفاقی وزیر دفاع مزید آکھیا جو اساکوں اپݨے شہیداں، انہاں دے گھر آلے، ماءُ پیو، بیوا اتے نیانڑیں دے وݙے احسان کوں کݙاہیں نئیں بھلݨا چاہیدا، کیوں جو انہاں دیاں قربانیاں دی بدولت اڄ اساں آزادی دی فضا وچ ساہ گھندے پیوں ۔ انہاں آکھیا جو اڄ دے ݙینھ دا پیغام اے اے جو اساکوں وطن نال محبت کرݨی چاہیدی اے، اوں دی حفاظت کرݨی چاہیدی اے اتے ذاتی مفادات توں اُتے تھی تے وطنِ عزیز نال غیر مشروط محبت کرݨی چاہیدی اے۔ ایں توں پہلے وزیر دفاع خواجہ محمد آصف جناح ہال قلعہ تے ہلال استقلال دی تبدیلی دی رسم انجام ݙتی۔ ایں موقع تے اسٹیشن کمانڈر بریگیڈیئر اویس توقیر، ارکان صوبائی اسمبلی محمد منشاء اللہ بٹ، چوہدری فیصل اکرام، چوہدری طارق سبحانی، ڈپٹی کمشنر صبا اصغر علی اتے ڈی پی او فیصل شہزاد وی موجود ہن۔ کوآرڈینیٹر وزیراعظم شاہد ندیم کہگ، ایڈمنسٹریٹر میونسپل کارپوریشن عباس ذوالقرنین، ایڈیشنل ڈپٹی کمشنر جنرل ایوب بخاری اتے اسسٹنٹ کمشنر خواجہ عمیر سمیت ٻئے افسراں وی تقریب وچ شرکت کیتی۔ پولیس، ریسکیو 1122 اتے شہری دفاع دے رضاکاراں قومی جھنڈے کوں سلامی ݙتی۔