بلوچستان دے علاقے دالبندین اچ فتنہ الہندوستان دے خلاف سکیورٹی فورسز دی کامیاب کارروائی، 6 دہشت گرد جہنم واصل

راولپنڈی۔22اکتوبر(اے پی پی) سکیورٹی فورسز بلوچستان دے علاقے دالبندین اچ کامیاب کارروائی دے دوران فتنہ الہندوستان دی تشکیل اچ شامل سارے 6 دہشت گرد جہنم واصل کرݙتے۔ سکیورٹی ذرائع موجب بلوچستان اچ دہشت گردی مُکاوݨ اتے امن و امان دے قیام کیتے سکیورٹی فورسز دیاں مؤثر کارروائیاں جاری ہن، دالبندین، بلوچستان اچ سکیورٹی فورسز ہک کامیاب کارروائی اچ فتنہ الہندوستان دی تشکیل کوں ختم کر ݙتا، سکیورٹی فورسز دی وقتی اتے مؤثر کارروائی دے نتیجے اچ سارے 6 دہشت گرد جہنم واصل کر ݙتے ڳئے۔ سکیورٹی ذرائع موجب دہشت گرد پہاڑی غاراچ پناہ گھدی پئے ہن جِتھاں فضائی نگرانی دے ذریعے مسلسل نظررکھی ڳئی۔ سکیورٹی فورسز ولوں موزوں ویلھے ٹھکاݨے کوں مؤثر طریقے نال نشانہ بݨایا ڳیا، اے اہم کامیابی سکیورٹی فورسز اتے خفیہ اداریں دی بہترین ہم آہنگی اتے مؤثر رابطے دا نتیجہ اے۔ بلوچستان اچ دہشت گردی مُکاوݨ تئیں فورسز دی طرفوں سکیورٹی اقدامات جاری رہسن۔