پاکستان اتے پولینڈ تجارت، توانائی، بنیادی ڈھانچے، دفاع، انسداد دہشت گردی، سائنس و ٹیکنالوجی اتے تعلیم اچ ݙو پاسہ تعاون کوں ودھاوݨ تے اتفاق کر ݙتے، نائب وزیر اعظم سینیٹر اسحاق ڈار دا پولش ہم منصب دے نال پریس کانفرنس توں خطاب

اسلام آباد۔23اکتوبر (اے پی پی) نائب وزیر اعظم اتے وزیر خارجہ سینیٹر محمد اسحاق ڈار پولینڈ دے ہم منصب دے دورہ پاکستان کوں اہم قرار ݙیندیں ہوئیں آکھیا جو ݙوہیں ملکاں وچال وفود دی سطح تے تھیوݨ آلی ڳالھ مہاڑ دے دوران فریقین ݙو پاسہ تعاون کوں ودھاوݨ تے اتفاق کیتے۔ خمیس کوں دفتر خارجہ اچ پولینڈ دے نائب وزیر اعظم اتے وزیر خارجہ رادوسواف سکورسکی دے نال پریس کانفرنس نال خطاب کریندیں ہوئیں انہاں آکھیا جو وفود دی سطح تے ڳالھ مہاڑ اچ پولینڈ دے ہم منصب رادوسواف سکورسکی اتے میں پاکستان اتے پولینڈ دے ݙو پاسہ تعلقات دا جائزہ گھدا جیہڑے بہوں مثبت سمت اچ ودھدے پئن۔ نائب وزیراعظم سینیٹر محمد اسحاق ڈار آکھیا جو اساݙی ݙو پاسہ تجارت دا حجم ہک بلین ڈالر توں ودھ اے اتے ݙوہیں فریقاں ایں ڳالھ تے اتفاق کیتے جو تجارتی اتے اقتصادی تعاون کوں ٻیا ودھاوݨ دی بے پناہ صلاحیت موجود اے۔ انہاں آکھیا جو پاکستان اتے پولینڈ تجارت، توانائی، بنیادی ڈھانچے، دفاع، انسداد دہشت گردی، سائنس و ٹیکنالوجی اتے تعلیم اچ ݙو پاسہ تعاون کوں ودھاوݨ تے اتفاق کیتے۔ نائب وزیراعظم محمد اسحاق ڈار دیرینہ حل طلب تنازعہ جموں تے کشمیر اتے مسئلہ فلسطین کوں اقوام متحدہ دی قرارداداں دے مطابق حل کرݨ دی لوڑھ تے زور ݙتا۔ انہاں آکھیا جو ݙوہیں ملکاں دی وزارت خارجہ مفاہمت دی یادداشت (ایم او یو) تے دستخط کیتے جئیں دا مقصد فریقاں وچال تعاون کوں ٻئے فروغ ݙیوݨ اے۔ انہاں آکھیا جو اسلام آباد اچ انسٹی ٹیوٹ آف سٹریٹجک سٹڈیز اتے پولینڈ دے انسٹی ٹیوٹ آف انٹرنیشنل افیئرز وچال تعاون کیتے ایم او یو تے دستخط کیتے ڳئن۔ نائب وزیراعظم محمد اسحاق ڈار پولینڈ دے ہم منصب دا خیرمقدم کریندیں ہوئیں آکھیا جو اے انہاں دا پاکستان دا ݙوجھا دورہ اے، ایں توں پہلے انہاں 2011 اچ پاکستان دا دورہ کیتا ہا۔ انہاں آکھیا جو پولینڈ دے نائب وزیر اعظم دنیا دے ایں حصے اچ کوئی اجنبی نئی ، انہاں نے 1980 دی دہائیاں اچ خطے اچ جنگی نمائندے دے طور تے خدمات انجام ݙتیاں ہن۔ سینیٹر محمد اسحاق ڈار آکھیا جو پاکستان پولینڈ دے نال آپݨے تعلقات کوں بہوں اہمیت ݙیندے۔ انہاں پولینڈ دی جدوجہد آزادی کوں مثالی قرار ݙیندے ہوئیں آکھیا جو پاکستان اتے پولینڈ دا منفرد تاریخی تعلق اے، ݙوجھی جنگ عظیم دے دوران پولینڈ دے ہزاراں مہاجرین موجودہ پاکستان یعنی کراچی اتے کوئٹہ اچ پناہ گھن ڳھدی ہائی۔ انہاں پاک فضائیہ دی بنیاد رکھݨ اچ پولینڈ دے پائلٹس اتے انجینئرز دے کردار کوں یاد کریندیں ہوئیں انہاں دی تعریف کیتی۔ انہاں آکھیا جو ایں سانجھے تاریخی تناظر دے نال پاکستان پولینڈ کوں ݙو پاسہ اتے یورپی یونین اچ ہک اہم شراکت دار دے طور تے ݙیکھدا پئے۔ نائب وزیراعظم آکھیا جو اساکوں خوشی اے جو پولینڈ ہݨ ہک ٹریلین ڈالر دی معیشت بݨاوݨ کیتے اقتصادی پیش رفت کیتی اے۔ انہاں توقع ظاہر کیتی جو ݙوہیں ملکاں ݙو پاسہ تعلقات کوں ٻئیا مضبوط بݨیسن اتے کثیر الجہتی فورمز تے تعاون جاری رکھیسن۔