اضافی 7000 میگاواٹ بجلی صنعت اتے زراعت کوں سستے نرخاں تے ݙیوݨ دا فیصلہ کیتے، وفاقی وزیر سردار اویس احمد خان لغاری

اسلام آباد۔23اکتوبر(اے پی پی)وفاقی وزیر توانائی سردار اویس احمد خان لغاری آکھیے جو حکومت اضافی 7000 میگاواٹ بجلی صنعت اتے زراعت کوں سستے نرخاں تے ݙیوݨ دا فیصلہ کیتے، ایں اقدام نال نہ صرف پیداواری لاگت اچ کمی آسی بلکہ معیشت کوں وی تقویت مِلسی۔ ویڈیو پیغام اچ وفاقی وزیر ݙسایا جو ملک اچ ست ہزار میگاواٹ اضافی بجلی موجود اے، حکومت فیصلہ کیتے جو اے بجلی صنعتی و زرعی شعبیں کوں ݙتی ویسی کیوں جو اے ݙوہیں شعبے ملکی معیشت دی ریڑھ دی ہݙی دی حیثیت رکھیندن۔ وفاقی وزیر ݙسایا جو صنعتی شعبے کیتے اضافی بجلی دے یونٹ دی قیمت 34 روپے توں گھٹ کرتے 22 روپے 98 پیسے جݙاں جو زرعی شعبے کیتے اضافی یونٹ دی قیمت 38 روپے توں گھٹ کر تے 22 روپے 98 پیسے کر ݙتی گئی اے۔ اُنھاں دا آکھݨ ہئی جو ایں فیصلے نال صارفین کیتے بجلی دی اوسط قیمت خرید اچ کمی آسی اتے صنعت اتے زراعت دے شعبیں کوں اضافی بجلی دے استعمال تے گھٹ نرخاں تے بجلی ݙتی ویسی جِتھوں پیداوار اچ ودھارا ممکن تھیسی ۔ اویس لغاری آکھیا جے زرعی صارف پہلے 100 یونٹ استعمال کریندا پیا ہئی، تاں اضافی 100 یونٹ دے استعمال تے اُندی اوسط بجلی قیمت اچ 7 روپے فی یونٹ کمی آسی جݙاں جو صنعتی شعبے اچ جے تساں 1000 یونٹ استعمال کریندے تاں ہݨ اضافی 1000 یونٹ دے استعمال تے اوسط بجلی دی قیمت اچ تقریباً 5 روپے فی یونٹ کمی تھیسی۔ انہاں آکھیا جو صنعت کیتے پہلے ھی قیمتاں گھٹ کر ݙتن اتے ہݨ مزید کمی نال صنعتی سرگرمیاں کوں ودھارا مِلسی۔ وزیر توانائی آکھیا جو حکومت عوام نال کیتے ڳئے وعدے پورے کریندی پئی اے اتے امید اے جو ایں اقدام نال معیشت اچ بہتری آسی۔