وفاقی وزیر تعلیم ڈاکٹر خالد مقبول صدیقی نال اقوام متحدہ دے خصوصی ایلچی برائے روڈ سیفٹی دی ملاقات

اسلام آباد۔23اکتوبر(اے پی پی)وفاقی وزیر تعلیم و پیشہ وارانہ تربیت ڈاکٹر خالد مقبول صدیقی نال اقوام متحدہ دے سیکرٹری جنرل دے خصوصی ایلچی برائے روڈ سیفٹی ژاں ٹوڈ ملاقات کیتی۔ تھیوݨ آلی ملاقات اچ طلبہ وچ روڈ سیفٹی متعلق آگاہی پیدا کرݨ دے جاری اتے آوݨ آلے اقدامات، تعلیمی اداریں اچ روڈ سیفٹی دی تعلیم دے ودھارے اتے اقوام متحدہ دے نال تعاون دے ٻئے موقع تے ڳالھ مہاڑ کیتی ڳئی۔ ڈاکٹر خالد مقبول صدیقی ایں موقع تے آکھیا جو طلبہ دی فلاح و بہبود اتے محفوظ مستقبل کیتے روڈ سیفٹی بنیادی حیثیت رکھیندی اے۔ انہاں ایں عزم دا اعادہ کیتا جو حکومت تعلیم دے ذریعے ذمہ وار اتے محتاط شہری تیار کرݨ کیتے پرعزم اے۔ وفاقی وزیر ݙسایا جو روڈ سیفٹی دی تعلیم کوں قومی نصاب اچ شامل کر ݙتا ڳئے، ابتدائی جماعتاں اچ طلبہ کوں ٹریفک سگنل اتے سڑک پار کرݨ دے محفوظ طریقے سکھائے ویندے پئن ۔ انہاں مزید آکھیا جو وفاقی نظامت تعلیم (ایف ڈی ای) موٹروے پولیس دی سانجھ نال طلبہ وچ روڈ سیفٹی متعلق آگاہی مہمات جاری رکھی ہوئی اے ، اساتذہ دی تربیت اتے طلبہ وچال مقابلے وی سڑکاں تے محتاط رویے دے ودھارے اچ مددگار ثابت تھیندے پئن۔ ڈاکٹر خالد مقبول صدیقی ایں ڳالھ تے زور ݙتا جو خصوصی ٻالاں دے ادارے وی روڈ سیفٹی سرگرمیاں اچ بھرپور حصہ گھندے پئن جِتھوں آگاہی دے عمل اچ شمولیت اتے جامعیت کوں ودھارا ملدا پئے۔ انہاں آکھیا جو وزارت وفاقی تعلیم و پیشہ وارانہ تربیت پاکستان اچ روڈ سیفٹی دے ودھارے کیتے اقوام متحدہ دے نال نیڑے تعاون چاہندے، قومی نصاب کونسل (این سی سی) ساریاں جماعتاں دے نصاب اچ روڈ سیفٹی متعلق مضامین شامل کر ݙتن۔ انہاں آکھیا جو اساݙا سانجھا مقصد تعلیم دے ذریعے ٹریفک حادثے اتے اموات اچ کمی گھن آوݨ اے۔ انہاں آکھیا جو پاکستان تعلیم دے ذریعے محفوظ مستقبل دی بنیاد رکھیندا پئے۔