پاکستان عالمی عدالت انصاف دی طرفوں اسرائیل دیاں ذمہ واریاں تے جاری کردہ مشاورتی رائے دا خیرمقدم

اسلام آباد۔23اکتوبر(اے پی پی)پاکستان عالمی عدالت انصاف (آئی سی جے) دی طرفوں قابض فلسطینی علاقے اچ اقوام متحدہ اتے ٻئیاں بین الاقوامی تنظیماں دے حوالے نال اسرائیل دیاں ذمہ واریاں تے جاری کردہ مشاورتی رائے دا خیرمقدم کیتے۔ عالمی عدالت انصاف 22 اکتوبر 2025 ءکوں آپݨی مشاورتی رائے اچ واضح کیتا جو اسرائیل بطور قابض طاقت ایں ڳالھ دا پابند اے جو او اقوام متحدہ اتے اُندے ذیلی اداریں خصوصاً اقوام متحدہ دا ریلیف و تعمیر نو دا ادارہ فلسطینی مہاجرین (یو این آر ڈبلیو اے )دی انسانی امدادی سرگرمیاں اچ سہولت ݙیوے اتے انہاں اچ کہیں قسم دی رکاوٹ پیدا نہ کرے۔ دفتر خارجہ توں جاری بیان موجب عالمی عدالت انصاف اے آکھیے جو اسرائیل تے ایں قانونی ذمہ داری لڳدی اے جو او فلسطینی عوام کوں خوراک، پاݨی، رہائش، ایندھن اتے طبی امداد جیھی بنیادی ضرورتاں ݙیوݨ یقینی بناوے۔ اسرائیل کوں آپݨے ملکی قوانین کوں قابض علاقے تے یکطرفہ طور تے ایں انداز اچ نافذ کرݨ دا کوئی حق حاصل نی جیڑھا فلسطینی عوام دے ناقابل تنسیخ حق خود ارادیت کوں متاثر کرے۔ پاکستان ایں مقدمے دی تحریری اتے زبانی کارروائی اچ فعال طور تے حصہ ݙتا اتے یو این آر ڈبلیو اے دے مینڈیٹ دے نال آپݨی غیر متزلزل حمایت دا اعادہ کیتا اتے فلسطینی عوام کوں زندگی بچاوݨ آلی امداد ݙیوݨ اچ یو این ار ڈبلیو اے دے ناقابل متبادل کردار دی تعریف کیتی ۔ پاکستان عالمی عدالت انصاف دی مشاورتی رائے تے پورا عملدرآمد اتے قابض فلسطینی علاقے اچ یو این آر ڈبلیو اے دی بلا تعطل سرگرمیاں دے ٻئے آغاز دا مطالبہ کیتے۔ پاکستان آپݨے پراݨے موقف دا وی اعادہ کیتا جو او فلسطینی عوام دے حق خود ارادیت اتے 1967 توں پہلے دیاں حداں تے مبنی ہک آزاد، خودمختار ریاست فلسطین دے قیام دی حمایت کریندے جیں دا دارلحکومت القدس الشریف ہووے۔