وزیر خزانہ محمد اورنگزیب نال برطانوی ہائی کمشنر دی ملاقات

اسلام آباد۔23اکتوبر(اے پی پی)وفاقی وزیر خزانہ و محصولات سینیٹر محمد اورنگزیب آکھیے جو حکومت صنعتی مسابقت اچ ودھارے  اتے برآمدات تے مبنی نمو کیتے پرعزم اے، آئی ایم ایف دے نال معاہدہ اتے کریڈٹ ریٹنگ ایجنسیاں ولوں پاکستان دی ریٹنگ اچ بہتری توں ملکی معیشت تے ٻاہرلے اعتماد دی عکاسی تھی پئی اے ، ٹیکس چوری روکݨ اتے تکمیلی عمل اچ بہتری کیتے مصنوعی ذہانت تے مبنی مانیٹرنگ سسٹم متعارف کروائے ڳئن ۔ اے ڳالھ انہاں پاکستان اچ برطانیہ دی ہائی کمشنر جین میریٹ کوں ملاقات اچ آکھی ۔ وزیر خزانہ ہائی کمشنر کوں خوش آمدید آکھیا اتے برطانیہ دے نال پاکستان دے طویل مدتی ترقیاتی تعلقات تے تشکر دا اظہار کیتا۔ انہاں برطانوی حکومت دی مسلسل حمایت خصوصاً ڈیجیٹلائزیشن، پبلک فنانشل مینجمنٹ، ماحولیاتی و موسمیاتی موزونیت و استحکام اتے تکنیکی معاونت دے شعبیں اچ تعاون تے وی شکریہ ادا کیتا۔ وزیر خزانہ واشنگٹن ڈی سی اچ برطانوی وزیر برائے بین الاقوامی ترقی و افریقہ جینی چیپ مین نال آپݨی اڄوکی ملاقات دا حوالہ ݙیندے برطانیہ دے قیمتی تعاون جِتھاں ڈیجیٹل ڈیش بورڈ اتے ماحولیاتی پروگراماں کیتے تعاون شامل اے، دی تعریف کیتی ۔ وزیر خزانہ نے ہائی کمشنر کوں پاکستان اچ کُل معیشت دے پائیدار استحکام ونمو کیتے جاری معیاری اقتصادی اصلاحات دے بارے ݙسایا۔ انہاں ݙسایا جو پاکستان ہݨ معاشی استحکام کوں پائیدار ترقی ونمو دے پاسےگامزن کرݨ دی راہ تے اے، کریڈٹ ریٹنگ دیاں ترائی عالمی ایجنسیاں ترائی سالاں دے وقفے دے بعد پاکستان دے اقتصادی پیش منظر کوں بہتر قرار ݙتے جیڑھا ملک دی معیشت تے ودھدے ہوئے اعتماد دا مظہر اے۔ وزیر خزانہ آکھیا جو اڄوکے آئی ایم ایف دے نال سٹاف سطح دے معاہدے اتے بین الاقوامی مالیاتی اداریں، سرمایہ کاراں اتے ݙو طرفہ شراکت داراں توں وسیع تر رابطیں نال پاکستان دے اصلاحاتی ایجنڈے تے ودھدے ہوئے ٻاہرلے اعتماد دی عکاسی تھیندی پئی اے ۔ وزیر خزانہ نے ایں عزم دا اعادہ کیتا جو حکومت کُل معیشت دے استحکام کوں برقرار رکھݨ کیتے پرعزم اے جݙاں جو نال ھی درمیانی مدت اچ سرمایہ کاری اتے برآمدات تے مبنی ترقی دی حکمت عملی اپݨاوݨ تے کَم جاری اے تاں جو ماضی دے عروج و زوال دے معاشی چکراں توں نجات حاصل کیتی ونڄ سڳے۔ انہاں ݙسایا جو حکومت آوݨ آلے چار توں پنج سالاں اچ اضافی کسٹم ڈیوٹیاں اچ تدریجی کمی دے ذریعے تجارتی نظام اچ نرمی گھن آوݨ کیتے پرعزم اے تاں جو صنعتی مسابقت اچ ودھارا تھیوے تے برآمدی ترقی کوں فروغ مِل سڳے ۔ سرمایہ کاری دے ماحول اتے براہ راست غیر ملکی سرمایہ کاری دا ذکر کریندے وزیر خزانہ ݙسایا جو حکومت اِیجھے قابل سرمایہ منصوبیں دی تیاری تے کَم کریندی پئی اے جِتھاں نجی شعبے دی قیادت اچ سرمایہ کاری کوں ودھارا ݙتا ونڄ سڳے۔ انہاں ݙسایا جو مقامی کاروباری گروپس ولوں نجکاری دے عمل اچ ودھدی ہوئی دلچسپی خوش آئند اے اتے بزنس ٹو بزنس رابطے سرمایہ کاری دے موقع ودھاوݨ اچ اہم کردار ادا کریندے پئن۔ وزیر خزانہ ہائی کمشنر کوں جاری ٹیکس اصلاحات دے بارے ݙسایا جیڑھے دستاویزی معیشت، ڈیجیٹلائزیشن، ٹیکس نیٹ دی وسعت اتے لیکجز اچ کمی تے مرکوز ہن۔ انہاں ݙسایا جو مصنوعی ذہانت تے مبنی مانیٹرنگ سسٹم متعارف کروائے ڳئن تاں جو ٹیکس چوری روکݨ اتے تکمیلی عمل اچ بہتری گھن آئی ونڄ سڳے ۔ انہاں مزید ݙسایا جو حکومت ایمانداری تے مبنی جائزہ نظام متعارف کراوݨ اتے سروس ڈیلیوری اچ بہتری دے ذریعے عوام دا ٹیکس نظام تے اعتماد بحال کرݨ دی کوشش کریندی پئی اے ۔ وزیر خزانہ آکھیا کیوں جو ٹیکس پالیسی دا اختیار ہݨ ایف بی آر توں وکھرا تھی ڳئے، ایں کیتے وزارت خزانہ شعبہ وار مشاورتی نظام تشکیل ݙیندی پئی اے تاں جو صنعتاں نال مسلسل مشاورت دا عمل جاری رہے۔ وزیر خزانہ مزید آکھیا جو کُجھ کلیدی شعبیں اچ مربوط پالیسی مداخلت دی لوڑھ اے جِتھاں ماہر افرادی قوت کوں ملک اچ برقرار رکھݨ کیتے مراعات، آئی ٹی شعبے اچ ٹیکس متعلق مخصوص چیلنجز اتے کاروبار اچ سوکھ کوں ٻیا بہتر بݨاوݨ شامل ہن تاں جو غیر ملکی ماہرین اتے سرمایہ کاراں کیتے ماحول ٻیا سازگار بݨایا ونڄ سڳے۔ برطانوی ہائی کمشنر وزیر خزانہ اتے انہاں دی ٹیم کوں اوکھی معاشی اصلاحات تے کامیابی نال عملدرآمد، 14 سال بعد پرائمری سرپلس دی واپسی اتے مالی نظم و ضبط اچ بہتری تے مبارخ ݙتی۔ انہاں حکومت دے اصلاحاتی تسلسل دے عزم دی تعریف کیتی طویل مدت دے اقتصادی ترقی کیتے واضح سمت اختیار کرݨ تے اطمینان دا اظہار کیتا۔ ہائی کمشنر کراچی سَودھے کاروباری برادری ولوں مِلݨ آلے مثبت تاثرات شیئر کیتے اتے آکھیا جو سرمایہ کاراں دا حکومت دی اقتصادی سمت تے اعتماد ودھدا پئے ۔ انہاں زور ݙتا جو اصلاحات دا تسلسل برقرار رکھݨ ضروری اے تاں جو سرمایہ کاراں دا اعتماد ٻیا تکڑا تھیوے، خصوصاً ٹیکس دہندگان دے نال سماجی معاہدے کوں مستحکم کرݨ، ماہر افرادی قوت دی دستیابی اچ بہتری اتے پاکستان اچ غیر ملکی ایگزیکٹوز کیتے سَوکھا کاروباری ماحول ݙیوݨ ناگزیر اے۔ ہائی کمشنر حکومت دی ٹیکس انتظامیہ اتے ڈیجیٹلائزیشن متعلق اصلاحات کوں خوش آئند قرار ݙتا اتے برطانیہ دی طرفوں خصوصاً آئی ٹی، ماحولیاتی مالیات اتے پبلک فنانشل مینجمنٹ دے ترجیحی شعبیں اچ تکنیکی معاونت ݙیوݨ دے عزم دا اعادہ کیتا۔ انہاں ریمیٹ دے ذریعے برطانوی تعاون اچ ودھارے دے امکانات تے وی ڳالھ کیتی اتے جاری سانجھے منصوبیں تے وقتی پیش رفت دی اہمیت تے زور ݙتا۔ فریقین آپت دے تعاون کوں ٻیا تکڑا بݨاوݨ خصوصاً معاشی اصلاحات، ماحولیاتی اقدامات، نجی شعبے دی قیادت اچ ترقی اتے پائیدار ترقی کیتے رَل تے کَم کرݨ دے عزم دا اظہار کیتا۔