اسلام آباد/ بیجنگ ۔23اکتوبر (اے پی پی)سپریم کورٹ آف پاکستان اتے چین دی سپریم پیپلز کورٹ وچال عدالتی تعاون اتے تبادلے دے حوالے نال مفاہمتی یادداشت (ایم او یو) تے دستخط کیتے ڳئن جیڑھے ݙوہیں ملکاں وچال عدالتی تعلقات دے ہک نویں دور دا آغاز اے۔ سپریم کورٹ آف پاکستان دے شعبہ تعلقات عامہ توں جاری اعلامیہ موجب معاہدے تے چیف جسٹس آف پاکستان جسٹس یحییٰ آفریدی اتے چین دی …
سپریم کورٹ آف پاکستان اتے چین دی پیپلز سپریم کورٹ وچال مفاہمتی یادداشت تے دستخط
مزید خبراں
اسلام آباد/ بیجنگ ۔23اکتوبر (اے پی پی)سپریم کورٹ آف پاکستان اتے چین دی سپریم پیپلز کورٹ وچال عدالتی تعاون اتے تبادلے دے حوالے نال مفاہمتی یادداشت (ایم او یو) تے دستخط کیتے ڳئن جیڑھے ݙوہیں ملکاں وچال عدالتی تعلقات دے ہک نویں دور دا آغاز اے۔ سپریم کورٹ آف پاکستان دے شعبہ تعلقات عامہ توں جاری اعلامیہ موجب معاہدے تے چیف جسٹس آف پاکستان جسٹس یحییٰ آفریدی اتے چین دی سپریم پیپلز کورٹ دے چیف جسٹس و صدر جسٹس ژانگ جون دستخط کیتے۔ ایں موقع تے ݙوہیں سربرہواں عدالتی اداریں وچال تعاون، استعداد کار اچ ودھارے اتے علم و تجربے دے تبادلے دے عزم دا اظہار کیتا۔ ایں عدالتی تعاون دا تصور اُوں ویلھے سامݨے آئے جݙاں چیف جسٹس آف پاکستان نے ایں سال چین دے شہر ہانگژو اچ ایس سی او رکن ملکاں دیاں سپریم کورٹس دے چیف جسٹس صاحبان دی 20ویں کانفرنس اچ شرکت کیتی ۔ مفاہمتی یادداشت دے تحت ݙوہیں ملکاں دے عدالتی ادارے مصنوعی ذہانت، سائبر کرائم، مالیاتی جرائم، ماحولیاتی تبدیلی، بین الاقوامی تجارتی قانون، کمرشل جھیڑے دے حل اتے متبادل نظام انصاف (اے ڈی آر) جِیھے شعبیں اچ آپت دے تعاون کوں ودھارا ݙیسن۔ معاہدے اچ عدالتی تربیتی پروگرام، سیمینار، تعلیمی تبادلے اتے مطالعاتی دوریں دے ذریعے عدالتی استعداد ودھاوݨ تے وی اتفاق کیتا ڳئے۔ ݙوہیں فریقاں بیلٹ اینڈ روڈ انیشی ایٹو (بی آر آئی) اتے چائنا پاکستان اکنامک کوریڈور (سی پیک ) دی اہمیت کوں تسلیم کریندے مؤثر جھیڑے دے حل دے نظام تے زور ݙتا۔ ایں توں انڄ بین الاقوامی عدالتی تعاون، فیصلیں دے نفاذ اتے عالمی قانونی فورمز تے سانجھی شمولیت تے وی اتفاق تھیا تاں جو قانون دی حکمرانی اتے عالمی عدالتی ہم آہنگی کوں ودھارا ݙتا ونڄ سڳے۔ معاہدے موجب ݙوہیں عدالتاں آپݨے اہم فیصلیں دا تبادلہ کریسن، عالمی قانونی چیلنجز تے سانجھے تحقیقی مُطالعہ کریسن اتے رابطے کیتے ہک لیازان میکنزم قائم کیتا ویسی جِتھاں سپریم کورٹ آف پاکستان دے رجسٹرار اتے چین دی سپریم پیپلز کورٹ دے انٹرنیشنل کوآپریشن ڈیپارٹمنٹ دے ڈائریکٹر جنرل شامل ہوسن۔ ایں مفاہمتی یادداشت ݙوہیں ملکاں دے عدالتی نظاماں وچال تعاون، شفاف انصاف اتے بین الاقوامی معیارموجب عدالتی عمل کوں تکڑا بݨاوݨ دی سانجھی کوششاں کوں ظاہر کریندی اے۔
