حکومت رابطیں اتے اشتراک عمل دے ذریعے اقتصادی نمو اتے خطے دی اجتماعی خوشحالی کیتے پرعزم اے، وزیر خارجہ اسحاق ڈار دا علاقائی وزرائے ٹرانسپورٹ کانفرنس دے افتتاحی اجلاس توں خطاب

اسلام آباد۔23اکتوبر(اے پی پی)نائب وزیراعظم / وزیر خارجہ سینیٹر محمد اسحاق ڈار آکھیے جو پاکستان دا سٹریٹجک محلِ وقوع اُینکوں علاقائی رابطے دا قدرتی مرکز بݨیندا پئے، اساݙا وژن اے جو سڑک، ریل، فضائی، بحری، توانائی اتے ڈیجیٹل راہداریاں دے ذریعے خطے اچ پائیدار ترقی اتے سانجھی خوشحالی کوں ودھارا ݙتا ونڄے ، رابطہ کاری صرف انفراسٹرکچر نی بلکہ اعتماد، موقع اتے سانجھے مقدر دی تعمیر دا ذریعہ اے۔ اے ڳالھ انہاں علاقائی وزرائے ٹرانسپورٹ کانفرنس دے افتتاحی اجلاس توں خطاب کریندے آکھی ۔ ایں موقع تے وفاقی وزیر مواصلات عبدالعلیم خان، کابینہ دے ارکان، اقوامِ متحدہ دے سیکرٹری جنرل دے خصوصی ایلچی روڈ سیفٹی، مختلف ملکاں دے سفراء، سفارتی نمائندے اتے اعلیٰ حکومتی حکام وی موجود ہن۔ دفتر خارجہ توں جاری بیان موجب نائب وزیراعظم وزیر خارجہ سینیٹر اسحاق ڈار آکھیا جو وزیراعظم محمد شہباز شریف دی قیادت وچ حکومت پاکستان رابطیں اتے اشتراک عمل دے ذریعے اقتصادی نمو اتے خطے دی اجتماعی خوشحالی کیتے پرعزم اے۔ انہاں وفاقی وزیرمواصلات عبدالعلیم خان اتے انہاں دی ٹیم دی ایں کانفرنس دے انعقاد کیتے کوششاں دی تعریف کیتی ۔ انہاں آکھیا جو دنیا جغرافیائی و اقتصادی تبدیلیاں، نویاں تجارتی راہداریاں، ڈیجیٹل اِنضمام اتے پائیداری دے پاسے ودھدی پئی اے ایں کیتے علاقائی رابطے استحکام، ترقی اتے اجتماعی پیشرفت ناگزیر اے۔ انہاں آکھیا جو وسطی ایشیا ہݨ ہک حقیقی ٹرانس یوریشین لینڈ برج دی شکل اختیار کر ڳئے جِتھاں سڑک، ریل، تیل و گیس دے منصوبے منڈیاں کوں ݙیوݨ دا ذریعہ بݨدے پئن ، اے منصوبے صرف انفراسٹرکچر نی بلکہ سانجھے موقع دے دروازے ہن۔ انہاں آکھیا جو پاکستان دیاں تکھی رفتار موٹرویز اتے قومی شاہراہواں علاقائی و داخلی رابطے دی ریڑھ دی ہݙی ہن جیڑھیاں اہم سرحدی گزرگاہواں کوں کراچی اتے گوادر دیاں بندرگاہواں تئیں پڄیندن ۔ چین-پاکستان اقتصادی راہداری (سی پیک) پاکستان دے وژن دی ساریں توں چمکدی مثال اے جیڑھی توانائی، ٹرانسپورٹ اتے تجارت دے ودھارے نال پورے خطے کیتے فیدہ مند بݨ چکی اے۔ انہاں آکھیا جو ازبکستان-افغانستان-پاکستان ریلوے فریم ورک معاہدہ ہک تاریخی اقدام اے جیڑھا نویں تجارتی رستے کھولیسی جݙاں جو استنبول-تہران-اسلام آباد (آئی ٹی آئی) سڑک و ریل راہداری یورپ، وسطی ایشیا، مشرقِ وسطیٰ اتے جنوبی ایشیا دے وچال گھٹ لاگت زمینی پل ݙیندی اے۔ انہاں آکھیا جو پاکستان کاسا-1000 اتے تاپی-500 جیھے توانائی دے منصوبیں اچ سرگرم شراکت دار اے جیڑھے خطے اچ توانائی دے تحفظ اتے اقتصادی نمو اچ کلیدی کردار ادا کریسن۔ نائب وزیراعظم آکھیا جو پاکستان 126 ملکاں دے شہریاں کیتے ای-ویزا سہولت متعارف کروائی اے خصوصاً خلیجی ریاستاں اتے وسطی ایشیا کیتے تاں جو تجارت، سیاحت اتے عوامی رابطے کوں ودھارا ݙتا ونڄ سڳے ۔ انہاں آکھیا جو پاکستان بندرگاہواں اتے لاجسٹکس نظام کوں جدید خطوط تے استوار کریندا پئے اتے فضائی و ڈیجیٹل رابطے دے ودھارے تے ھک ہکو سواں توجہ ݙیندا پئے، ملک اچ ڈیجیٹل ٹریڈ پلیٹ فارمز اتے ای-پورٹ انٹیگریشن نال تجارت کوں مؤثر، شفاف اتے مسابقتی بݨایا ویندا پئے۔ انہاں ترقیاتی شراکت داراں، اقوامِ متحدہ دیاں ایجنسیاں، کثیرالملکی بینکاں اتے علاقائی تنظیماں دی معاونت دی تعریف کیتی جنہاں پاروں اے منصوبے ودھدے پئن ۔ انہاں آکھیا جو اے اقدامات صرف ترقیاتی منصوبے نی بلکہ علاقائی انضمام، اقتصادی تبدیلی، امن و استحکام دے ضامن ہن۔ انہاں آکھیا جو اے کانفرنس تعاون دے نویں عملی اقدامات طے کرݨ دا موقع ݙیسی۔ انہاں آکھیا جو پاکستان رابطہ منصوبیں دی ہم آہنگی، سرحد پار سہولت کاری، سانجھی سرمایہ کاری دے ودھارے اتے علاقائی ویلیو چینز کوں مضبوط کرݨ کیتے تیار اے۔ انہاں زور ݙتا جو اساں ساریں کوں آپݨیاں حکمت عملیاں کوں ہم آہنگ کر تے پائیدار شراکت داریاں قائم کرݨیاں ہوسن، اساں رَل تے ایں راہداریاں کوں ترقی اچ بدل سڳدوں۔